¹ Tianay ho fatasindrareo , ry rahalahy , gny momban'gny fahasoavan'Agnahary ze nome tao amin'ereo fiangonan'i Makedonia. ² Nandrisy gny fisapa lahibe amin'gny fahoria, gny fitobaky gny hafaliany vo gny fara-fahatran'ereo dra niteraky hanagnan-dehiben'gny falalan-tagna. ³ Satria misanga vavolombelo zaho fa nanao be arak'izay vitany ereo , dra mihoasy an'izay vitany avo. Dra tamin'gny sitrapon'ereo manoka ⁴ vo niaraky tamin'gny fitalahoa fatrasy gny nangatahan'ereo taminay gny fahafaha ba hana azara amin'itiho asa fanopoa eo amin'ereo mpino itiho. ⁵ Sy niboaky arak'izay natenay zay. Fa dra, nanolosy gny vatany mialoha tamin'Agnahary ereo. Dra nanolo-vata ho anay ereo tamin'gny sitrapon'Aagnahary. ⁶ Ka nampirisiky an'i Titosy zahay, ze fa nanomboky an'izay asa zay, ba hagnatateraky gny fahasoava eo amindrareo. ⁷ Fa andrareo koa dra mana-kanagna amin'gny raha iaby, amin'gny finoa, amin'gny zaka, amin'gny falalana. amin'gny fahazotoa iaby, dra amingny fitiavandrareo anay. Koa atovy azo atoky ba hana-kanagna amin'izay asa fahasoava andrareo. [ Gny ULB vo gny UDB, miaraky amin'ireo dika-zaka maro hafa, dra mivaky manahaky anizao:''Ao amin'gny fitiavanao anay.''Gny dika-zaka hafa dra mivaky manahaky aniza:''Dra ao amin'gny fitiavanay andrareo''] ⁸ Sy mizaka manahaky gny didy zaho. Fa dra, mizaka zaho amin'gny fisangana gny fahamarignan'gny fitiavandrareo amy fampitaha anizay amin'gn zotom-pon'gny olo hafa . ⁹ Satria fatasindrareo gny fahasoavan'gny Toposika Jesosy Kristy. Ka na nanan-kanagna avo izy, dra lasa majaly noho andrareo, koa amin'gny alalan'gny fahatra no mety ahazoandrareo hanagna. ¹⁰ Amin'izay resaky zay dra hagnome toro-hevisy andrareo zaho ze hagnapy andrareo. Heritao lasa zay, dra sy nanomboky nanao raha avo andrareo, fa nagniry gny manao avo. ¹¹ Amizao vitao zay, manahaky gny nisian'gny zotom-po so gny fagniria hanao anizay , dra enganie hagnatateraky anizay koa andrareo, arak'izay azondrareo hatao. ¹² Satria raha magniry fatrasy gny hanao anizay asa zay andrareo dra raha soa vo azo eke zay. Sy maisy mifotosy amin'izay hanagnan'gny olo raiky zay, fa sy ze sy anagnany. ¹³ Fa asa zay dra sy ba hagnameva gny hafa sady hagnavesasy andrareo. Fa dra, tokony hisy gny rariny. ¹⁴ Gny hanagnandrareo amin'izao fotoa zao dra hagnome ze taliavin'ereo .Ka zay koa dra ba hagnomezan'gny hanagnan'ereo ze taliavindrareo. Dra ba agnomezan'ereo gny rariny ¹⁵ Araky ze fa voasaorasy ho:''Gny raiky ze nana maro dra sy nana ambiny, dra gny raiky ze nana gny kely dra sy nana gny sy apy. ¹⁶ Fa an'Agnahary gny fisaora, ze nametraky gny tao am-pon'i Titosy gny fahamatora ze ananako amindrareo. ¹⁷ Fa izy sy magneky gny tokasika avo, fa tena matosy gny amin'izay avo koa. Nagnato anao tamin'gny sitrapony manoka izy. ¹⁸ Nalefafanay izy niaraky tamin'gny rahalahy ze nidera teo agnevon'gny fiangona aby noho gny asany ze mitory gny filazasara. ¹⁹ Sy zay avo, fa izy avo koa dra nitendren'ereo fiangona ba handeha hiaraky aminay hinday zao asan'gny fahalala-tagna zao. Zay dra ho agny voninahisy Topo dra ho agny fagnirianay hagnapy. ²⁰ Mitandrina izahay gny amin'gny mety hisian'gny olo mitaray mombanay mahakasiky an'io asa fahalala-tagna ze hataonay io. ²¹ Ka mila mitandry zahay ba hanao gny mendriky, fa sy eo anatrehan'gny Topo raiky avo, fa eo alohan'gny olo koa. ²² Mandefa rahalahy raiky hafa avo koa zahay miaraky amin'ereo. Matetiky zahay gny nisapa anazy , dra nahita anazy mafana fo tamin'gny asa maro. Mazoto izy zao amizao noho gny fahatokisa lahibe ze anagnany amindrareo. ²³ Raha gny amin'i Titosy, izy gny namako vo mpiara-miasa aminahy ho andrareo. Raha gny amin'gny rahalahinay, dra nalefan'ereo fiangona ereo. Voninahisy ho an'i Kristy ereo. ²⁴ Dra aboao anazy reo gny fitiavandrareo , dra aboao amin'gny fiangona gny aton'gny fireharehanay momba andrareo.