¹ Magniry zaho ba ahafahandrareo magnenga anahy hanao fahadala kely gn'ilany. Fa tena magnenga anahy tokoa andrareo! ² Fa saro-piaro gny momba andrareo zaho. Mana fahasarotam-piaro araky an'Agnahary amindrareo zaho, hatramin'gny nagnomezako toky andrareo tao amin'gny fanambalia hô agny valy raiky avo. Nagnome toky zaho gny hanolosy andrareo tahaky gny veriziny malio ho an'i Kristy. ³ Fa matahosy zaho fandrao, tahaky gny namitahan'gny menarana an'i Eva tamin'gny alalan'gny hafeseny, gny eriserisindreo dra mety hiala amin'gny fanolora-vata amin-kisim-po vo malio amin'i Kristy. ⁴ Fa erisereto hô misy olo raiky torisika . Na erisereto hô mandramby Fagnahy hafa noho ze rambesindrareo andrareo. Na erisereto ho mandray filazasara hafa noho gny raiky ze nirambesindrareo. Mamela anio raha soa io avo andrareo! ⁵ Satria mieriserisy zaho fa sy farany ambany noho reo zaka fa hô apostoly agn'abony. ⁶ Fa dre dra sy nizara nandeha-zaka avo zaho, dra nizara tamin'gny fahalala. Tamin'gny fomba iaby vo tamin'ereo raha aby dra nataonay ho fatasindrareo zay. ⁷ Moa nanota se zaho tamin'gny fanetre-tegnako ba hisandratandrareo? Fa nitory gny filazasaran'Agnahary maimaipoa ho andrareo zaho. ⁸ Nandrobaky gny fiangona hafa zaho tamin'gny alalan'gny faneke fanohana laha tamin'ereo ba ahafahako manopo andrareo. ⁹ Gny fa niaraky tamindrareo zaho vo nila fagnapia , dra sy nagnavesasy na iza na iza. Fa reo raha nitaliaviko dra nomen'ereo pirahalahy ze laha tagny Makedonia. Tamin'gny raha iaby dra nitandry gny vatako sy ho eta-mavesasy amindrareo zaho, dra hanohy hanao anizay. ¹⁰ Raha ato aminahy gny fahamarignan'i Kristy , dra sy hangina zay fireharehako zay agny amin'gny farisin'i Akaia. ¹¹ Nanao akory? Satria sy tiako se andrareo? Zagnahary mahalala. ¹² Dra gny raha ataoko dra bo ho ataoko avo, ba mety ahafahako mangalaky gny fitaraigna nohon'gny fanakiana anahy vo gny fitaraigna noho reo ze tian'ereo hirehareha-fa ereo dra hita manao asa mitovy amin'izay ataonay. ¹³ Fa gny olo tahaky anizay dra apostoly sandoky vo mpiasa mamitaky. Izy reo dra manao sarisarin'gny vatany tahaky gny apostolin'i Kristy. ¹⁴ Dra zay dra sy mahalasa , fa dre gny satana avo maneho gny vatany tahaky gny azelin'gny fahazava . ¹⁵ Sy mahalasa sasy raha mampiboaky gny vatan'ereo tahaky gny mpanompon'gny fahamarina reo mpanompony. Gny azaran'ereo dra ze mendriky gny asan'ereo. ¹⁶ Zakako draiky hô: ''Ka anga hisy hieriserisy hô mola (adala) zaho. fa raha manao anizay andrareo , dra rambeso tahaky gny mola zaho dra ba hirehareha kely. ¹⁷ Ze zakako momba anitiho dra sy araky gny zakan'gny Topo, fa mizaka manahaky gny mola zaho. ¹⁸ Fa maro gny olo gny mirehareha araky gny nofy, dra hirehareha avo koa zaho. ¹⁹ Nagneky am-pifalia reo mola andrareo. Dra hô hendry gny vatandrareo! ²⁰ Fa mandefisy amin'olo andrareo raha magnandevo andrareo, mandany andrareo, magnararaosy andrareo, mandramby gny vatany ho agn'abony noho andrareo, na raha mamely tehamaina andrareo izy. ²¹ Ho zakako amin'gny fahafaham-barakanay fa mamely loasy zahay tamin'gny fanova anizay. Raha misy mirehareha -dra miresaky manahaky gny mola zaho-Izaho avo koa dra hirehareha. ²² Hebreo se ereo? Zaho avo koa. Israelita se ereo? Zaho avo koa. Taranak'i Abrahama se ereo? Zaho avo koa . ²³ Mpanompon'i Kristy se ereo? ( Miresaky manahaky gny olo very say zaho) Mihoasy noho zay zaho. Bo niasa fatrasy nihoasy noho zay avo zaho, tagny am-ponja matiteky, tamin'gny kapoaky mihoasy gny fepetra, tamin'gny fiatreha loza maro mahafaty. ²⁴ Laha tamin'gny alalan'ereo Jiosy gny nandresako'' kapoaky efapolo lasaky raiky''Indimy. ²⁵ Itelo zaho gny nizerany tamin'gny hazo. Indraiky nitorahiny vato zaho. Itelo vaky sambo zaho. Nandany raihaly vo andro raiky tegny an-dranomasy zaho. ²⁶ Nandeha matetiky zaho, tamin'gny lozan'ony, tamin'gny lozan'ereo mpandrobaky, tamin'gny lozan'gny oloko, tamin'gny loza tagny amin'gny tana, tamin'gny loza tagny agn'efisy . tamin'gny loza tagny an-dranomasy , tamin'gny loza laha tamin'ereo rahalahy sandoky. ²⁷ Fa tamin'gny asa fatrasy vo raha -sarosy zaho, tamin'gny hariva sy misy torimaso, tamin'gny haresia vo hetaheta, tamin'gny fifalia-kany matetiky, tamin'gny hasiaky vo fitazaha. ²⁸ Akoasy gny raha hafa, misy sindry isan'andro aminahy nohon'gny fagnahiako amin'gny fiangona aby. ²⁹ Iza gny malemy , ka sy malemy zaho? Iza gny manafitohy, ka sy mirehisy zaho? ³⁰ Raha sy maisy mirehareha zaho, dra hirehareha momba ze mapiboaky gny fahalemeko. ³¹ Gny Zagnahary vo Ran'i Topo Jesosy , gny raiky ze dera mandrakizay , dra mahafatasy fa sy mavandy zaho! ³² Tagny Damaskosy, gny governora ambanon'i Areta Pajaka dra niamby gny tanan'i Damaskosy ba hanambosy anahy. ³³ Fa nampizoso tamin'gny sobika teo amin'gny vatrangara-kely raiky teo ami'gny manda zaho. ka dra nandositry gny tanany.