¹ Laha zao le tsy misy fimelofa sase amizao hoahy reo ze ao amy Kirisity Jesosy. ² Fa ty lily ty Fagnahy havelo ao amy Jesosy Kirisity ro nagnafake ahy tamity lily ty hadisoa vaho ty fate. ³ Fa ze tsy afake natao ty lily naho ty halemea zay tamity nofo, le nataon'Agnahare. Nandefa ty anadahine Re tamity toera ty nofo feno hadisoa mba ho fagnatetre hoahy ty hadisoa, naho nimeloke ty hadisoa tao amity nofo re. ⁴ Nataone zay mba ho lefe ao amintika ty zaka paie ty lily, tika ze mandeha tsy arake ty nofo, fa arake ty Fagnahy. ⁵ Reo ze mivelo arake ty nofo le mifagnenke amireo zaka ty nofo, fa reo ze velo arake ty Fagnahy le miarake amireo zaka ty Fagnahy. ⁶ Satria ty fisaigna miore amity nofo le fate, fa ty fisaigna miore amity Fagnahy kea le fiaigna vaho fiadagna. ⁷ Ty fisaigna miore amity nofo le fandrafea eo agnoloan'Agnahare, fa tsy mifagnarake amity lilin'Agnahare zay, ro vaho tsy haine kea ty manao zay. ⁸ Reo ze ao amity nofo le tsy afake ty ho tean'Agnahare. ⁹ Kanefa, nareo le tsy ao amity nofo fa ao amity Fagnahy, laha mare fa mivelo ao amireo ty Fagnahin'Agnahare. Fa laha misy ndaty tsy mana ty Fagnahy Kirisity, le tsy Aze re. ¹⁰ Laha aminareo ao Kirisity, le mate naho ty hadisoa ty vata, fa ty fagnahy le velo naho ty hamarea. ¹¹ Laha ty Fagnahy ty nananga Jesosy tamity mate ro velo ao aminareo, le Re ty nananga Kirisity tamity mate ro hagnomea havelo avao kea hoahy ty vatanareo ze mete mate amity alala ty Fagnahine, te velo aminareo ao. ¹² Laha zao, ry rahalahy, le mpitrosa tika, fa tsy ao amity nofo mba ho velo arake ty nofo. ¹³ Fa laha velo arake ty nofo nareo, le ho mate, fa laha amity fagnahy ze amonoanareo ty asa ty vata, le velo nareo. ¹⁴ Fa manahake reo iaby voatary ty Fagnahin'Agnahare, iereo ro anan'Agnahare. ¹⁵ Fa tsy nandrae ty fagnahy ty fagnandevoa ndraike nareo ka hatahotre. Fa kea, nandrae ty Fagnahy ty fananganagnanake nareo, te hikaike-kaike antika ty hoe:"Baba, Rae!" ¹⁶ Ty Fagnahy vatane ro vavolombelo amity fagnahintika fa anan'Agnahare tika. ¹⁷ Laha anake tika, le mpandova avao kea, mpandova an'Agnahare. Naho mpiara-lova ao amy Kirisity tika, laha vatane mijale miarake Amine vatane tika le amean-kasy miarake Amine kea. ¹⁸ Fa ataoko fa reo fijalea amizao andro zao le tsy soa ampitovie amity hasy ze hatoro antika. ¹⁹ Fa ty zaka iaby ze magnategna mafe le mandrae ty fanoroa reo anan'Agnahare. ²⁰ Fa ty zaka le natao ho zaka-foa tsy naho ty sitrampone arere, fa naho ty nanao zay. Zay le ao amity fatokia namea ²¹ fa reo hare vatane ro ho afahe amity fagnadevoa ty halavoa, naho handay agne amity fahafaha ty amity hasy ty anan'Agnahare zay. ²² Fa haintika fa ty hare iaby le miara-miay vaho miara-miasa ao agnate ty tebetebe ndra amizao aza. ²³ Tsy zay avao, fa ndra ty vatantika aza, ze mana ty loham-bokatre ty Fagnahy_ndra ty vatantika aza le miay ao agnatentika, miambe ty fanangana antika ho anake, le ty fagnavota ty vatantika. ²⁴ Fa tamize toky zay ro namonjea antika. Fa ze atokisantika fa hiseho le mboe tsy hita, fa ia ro miambe ampatokia te le fa hitane? ²⁵ Fa laha matoky amize mboe tsy hitantika tika, le miambe zay ampahareta. ²⁶ Hoe zay kea, ty Fagnahy le magnampe ao amity halemeantika. Fa tika tsy mahay ze vavake tokone hataontika, fa ty Fagnahy vatane ro mifona ho antika amity fitempoa tsy hay rehafe. ²⁷ Re teie mandineke ty arofo ro mahay ty dine ty Fagnahy, satria Re ro mifona hoahy ty mpino arake ty sitrampon'Agnahare. ²⁸ Haintika fa hoahy reo ze tea an'Agnahare, le miarake ampiasaene ho amity soa iaby ty zaka iaby, (Fagnamarea: Laha tokone ty hoe" Miarake ampiasaene ho amity soa iaby ty zaka iaby," le ty dikan-drehake ilane taloha manao ty hoe:" Ty zaka iaby le miarake miasa ho amity soa.") hoahy reo ze voakaike arake ty fandaharene. ²⁹ Satria reo ze haine aloha, le tinendrene aloha avao kea mba hitovy toera amity Anane, mba ho lahy voalohane eo agnivo reo rahalahy maro re. ³⁰ Reo ze tinendre aloha, le kinaike avao kea. Reo ze kinaike, le nihamaregne avao kea. Reo ze nihamaregne, le namea hasy avao kea. ³¹ Ino are ro tokone ho rehafentika miomba reo zaka reo? Laha miomba antika Zagnahare, ie ro matahotre antika? ³² Re te tsy niaro ty Anadahine arere fa nanolotre Aze hoantika iaby, akore ro tsy hagnomeane antika maimaimpoa miarake Amine ty zaka iaby avao kea? ³³ Ia ro handay fitana handietrereo ndaty voafilin'Agnahare? Zagnahare ro raike ze magnamare zay. ³⁴ Ia ty raike ho meloke? Kirisity ro raike mate ho antika, naho mihoatre zay, natsanga avao kea Re. Mpandily miarake amin'Agnahare eo amity toeran-kasy Re, naho Re ro mifona ho antika. ³⁵ Ia ro hanarake antika amity hatea Kirisity? Fahorea, sa Fijalea, sa faneseha, sa hakere, sa tsifisikina, sa loza, sa meso? ³⁶ Arake ty voasoratre ty hoe:" Naho riha le voavono andro lava zahay. Niraese hoe ty agnondry ho vonoe zahay." ³⁷ Ao agnate ze zaka iaby zay le mihoatre naho ty mpandrese zahay amity alala ty raike tea anay. ³⁸ Fa rese lahatre raho fa mdra ty fate, ndra ty havelo, ndra reo anjele, ndra reo fanjaka, ndra reo raraha amizao, ndra reo zaka hoavy, ndra reo here, ³⁹ ndra ty ambone, ndra ty laleke, ndra zaka-namboare hafa, le tsy hahasarake antika amity hatean'Agnahare, ze ao amy Kirisity Jesosy Tompontika.