¹ Ka ino are zane ty tombon-tsoa anagna ty Jiosy? Naho ino ro tombon-tsoa ty savatre? ² Soa zay amity foma iaby. Voalohane vatane, reo Jiosy le nagnaky ty talily bakamin'Agnahare. ³ Fa akore laha tsy nanam-pinoa reo Jiosy ilane? Ty tsy finoa iereo vao ro hahavy ty fatokian'Agnahare tsy ho lefe? ⁴ Tsy hiny vatane anie zay. Fa kea, engao ho hita fa mare Zagnahare, ndra le mpavande aza ty ndaty kirai-kiraike. Arake ty voasoratre hoe:" Haseho amity rehanareo fa ndaty nareo, naho hatoro laha fa avy amity fitsara nareo." ⁵ Fa laha ohatre ty tsy hamareantika ro manoro ty hamarean'Agnahare, ino ro azontika hambara? Afake mirehake vao tika fa tsy mare Zagnahare amity fagnakarane ty helone amintika, sa tsy zay? (Mampiasa laha-drehake ty ndaty raho.) ⁶ Tsy hisy vatane anie zay! Satria amity fomba akore naho ro hitsaran'Agnahare zao iaby zao? ⁷ Fa laha ohatre ty hamarean'Agnahare ka magnomea fiantsa maro hoaze amity alala ty vandeko, le akore naho raho ro mboe tsarae ho mpanota? ⁸ Fa akore ro tsy mirehake, arake ty talily diso te rehafe fa rehafentika, naho kea arake ty hamafe ty ilane fa nirehafentika ty hoe:"Engao zahay hanao raty, mba hiavia ty soa"? Rarene ty fitsara atao amiereo. ⁹ Ka ino are? Magnomea rarene ty vatantika vao tika? Tsy zay kea. Fa tika le fa nimeloke ty Jiosy vaho ty Grika, ie iaby, ho mpanota. ¹⁰ Zay le arake ty voasoratre ty hoe:"Tsy misy ndaty mare, ndra le raike aza. ¹¹ Tsy misy ndra raike aza mahay. Tsy misy ndra raike aza mipay an'Agnahare. ¹² Lasa nihatake iaby iaby. Lasa tsy misy ipaia aze ie iaby. Tsy misy mba manao ty soa, tsy misy, ndra le raike avao aza. ¹³ Ty vozo iereo le kibory mivoha. Ty lela iereo le mamitake. Ty poizy iereo le mere le ao ambane ty sogny iereo. ¹⁴ Ty vava iereo le feno ozo vaho lolom-po. ¹⁵ Ty tombo iereo le havana amity fampimpohan-dio. ¹⁶ Ty fanimba vaho ty fijalea le egne amity lala iereo. ¹⁷ Rey ndaty rey le tsy nahay ty lala ty fiadagna. ¹⁸ Tsy mba misy tahotre an'Agnahare eo agnoloa ty maso iereo." ¹⁹ Henanezao le haintika fa ndra ino ino rehafe ty lily, le mahazo reo ze ambane lily. Zay le mba hahavy ty vava ty kirai-kiraike hitsy, naho mba hahazo valene bakamin'Agnahare zao iaby zao. ²⁰ Zay le satria tsy hisy nofo hohamaregne amity asa ty lily eo amasone. Fa amity alala ty lily ro hahavia ty fahaia ty hadisoa. ²¹ Fa henanezao le nampahaie avao kea ty hamarean'Agnahare tsy amity lily. Nihamarene ty lily vaho reo mpamisavisa, ²² fa zay, ro hamarean'Agnahare amity alala ty finoa Jesosy Kirisity hoahy iaby ze mino. Satria tsy misy fifilia. ²³ Fa nanonta ty ndaty iaby ka tsy mana ty hasin'Agnahare, ²⁴ naho iereo le hamaregne maimaimpoa amity hasoane amity alala ty fagnavota zao ao amy Kirisity Jesosy. ²⁵ Fa Zagnahare nagnoma Kirisity Jesosy ho fagnatetre amity alala ty finoa ty lione. Natolone ho porofo ty hamareane ty kirisity, naho ty hagnenteane ty hadisoa taloha gne ²⁶ amity faharetane. Niseho iaby iaby zay ho fanehoa ty hamareane amize andro amizao zao. Zay le mba hahafahane magnamare fa mare ty vatane, naho mba hanoroa fa Re le magnamare iaby naho ty finoa i Jesosy. ²⁷ Aia are zane ty rehareha? Voafafa zay. Fa ino ro antone? Amity asa vao? Aha, fa naho ty finoa. ²⁸ Manam-pakevetre zay tika fa ty ndaty raike le hamaregne arake ty finoa tsy misy reo asa ty lily. ²⁹ Sa Zagnahare ty Jisoy arere avao vao ty Zagnahare? Feie vao tsy Zagnahare reo Jentilisa kea Re? Eka, ahy ty Jentilisa kea. ³⁰ Laha, raike vatane Zagnahare, le ho hamaregnene amity finoa reo voasavatre, naho reo tsy voa-savatre kea amity alala ty finoa. ³¹ Foagnantika amity alala ty finoa are vao zay ty lily? Tsy hisy vatane anie zay! Fa kea, magnenke ty lily tika.