¹ Naho tika ze mafe le tokone handefetre ty halemea ty maleme, naho tsy tokone hanao ze mhafale ty vatantika. ² Ao ty kirai-kiraike iaby amintika hanao ze mahafale ty mpiara-belo amine fa zay ro soa, mba hagnakara aze. ³ Fa ndra Kirisity aza tsy manao ze nahafale ty vatane. Fa kea, zay le arake ty voasoratre ty hoe:" Ty fagnaratia reo ze magnaraty anao le nahazo ahy." ⁴ Fa ndra ino ino voasoratre taloha le voasoratre ho fagnanara antika, mba amity alala ty fiareta vaho amity alala ty fagnamafea ty Soratre Masy ro hanagnantika toky. ⁵ Naho ty Zagnahare ty fahareta vaho fagnamafea anie hagnomea say mitovy hoahy ty kirai-kiraike iaby arake Kirisity Jesosy. ⁶ Ie anie hanao zay mba ho amity say raike vaho amity vava raike avao ro hiantsanao an'Agnahare vaho Rae ty Tompontika Jesosy Kirisity. ⁷ Laha zao mifandraesa, manahake ty nadraesa Kirisity anareo avao kea aza, ho fiantsa an'Agnahare. ⁸ Fa rehafeko fa Kirisity le fa lasa mpanompo ty voasavatre hoahy hamarean'Agnahare, mba hahafaha magnamare reo fampagnategna ze namea reo rae, ⁹ naho hoahy reo Jentilisa mba hagnomean-kasy an'Agnahare naho ty fandeferane. Zay le arake ty le fa voasoratre ty hoe:" Laha zao le hagnomea fiantsa Anao eo amity Jentilisa Raho naho hihira antsa ty agnaranao." ¹⁰ Mboe voarehake zisikagne ty hoe:"Mifalea, miarake amity vahoakene, ry Jentilisa." ¹¹ Naho kea ty hoe:" Antsao ty Tompo, ry Jentilisa iaby; engao ty ndaty iaby hiantsa Aze." ¹² Hoe ndraike, Isaia ty hoe:"Hisy tahone ty Jese, naho ty raike ze hitsanga handily eo amity Jentilisa. Hana fatokisa amine reo Jentilisa." ¹³ Naho ty Zagnahare ty fatokisa anie hamneo anareo amity hafalea vaho fiadagna iaby amity finoa, mba ho lako fatokisa nareo, bakamity here ty Fagnahy Masy. ¹⁴ Ty vatako zao avao kea le rese-lahatre ty miomba anareo, ry rahalahy. Rese lahatre raho fa nareo avao kea le lako hasoa, lako ty fahaia iaby. Rese lahatre raho fa nareo avao kea le afake mifagnanatre. ¹⁵ Fa manoratre ampahasahia aminareo raho miomba reo zaka ilane mba hampitiarove anareo ndraike, naho ty fagnomeam-pahasoava ze nomean'Agnahare ahy. ¹⁶ Ze fagnomeam-pahasoava zay le ty tokone mba hanompoako Kirisity Jesosy nalefa tagne Jentilisa, mba hanolotre hoe ty soro ty talily soan'Agnahare. Tokone hataoko zay mba ho azo enkene ty fagnate reo Jentilisa, voatoka ty Fagnahy Masy. ¹⁷ Laha zao ty hafaleako le ao amy Kirisity Jesosy vaho reo zakan'Agnahare. ¹⁸ Fa tsy hahasahy hirehake ndra ino ino laha tsy reo zaka vita Kirisity tamity alalako hoahy ty fagnenkea reo Jentilisa raho. Reo azak reo le vita tamity tsara vaho ty asa, ¹⁹ tamity here reo famantara vaho fahagaga, naho tamity here ty Fagnahy Masy. Zay le mba bakagne Jerosalema, vaho lavi-davitre manahake i Ilyrikioma, ro hahafahako manao ty zaka-soa Kirisity. ²⁰ Amizay, ty fagniriako le ty hitalily ty zaka soa, fa tsy agne amize hahaia Kirisity amity agnara, mba tsy hagnoregnako eo amize le fa nagnoregna ty hafa. ²¹ Zay le arake ty voasoratre ty hoe:" Tamireo ze tsy nirehafa Aze ro hahita Aze, naho reo ze tsy naharey ro hahazo." ²² Laha zao avao kea le voasaka mateteke tsy hoagne aminareo raho. ²³ Fa henanezao, tsy mana toera amireo faritre reo sase raho, naho tao maro ro le fa nagniriako mafe hoagne aminareo. ²⁴ Laha zao ndra mbia mbia handehanako agne Espagna, le manantena raho ty hahita anareo laha fa mandrio, naho herentao agne amity ombako, laha fa baka tea ty fiaraha nareo tsiela Raho. ²⁵ Fa henanezao hoagne Jerosalema Raho hanompo reo mpino. ²⁶ Fa hafalea Makedonia vaho Akaia ty hanao fandraesa anjara hoahy reo mahantra agnate ty mpino ze agne Jerosalema. ²⁷ Eka, hafalea hoahy iereo zay, naho, mpitrosa amine vatane iereo. Fa laha ty Jentilisa ro nizara tamity zaka masy iereo, le tokone hanompo iereo avao kea iereo amireo zaka ara-materiele. ²⁸ Laha zao, laha fa nataoko ze asa zao naho nagnamafe fa voarae iereo ty vokatre ze navory, le hoagne Espaigne raho naho hitlike anareo amity lalako. ²⁹ Haiko fa laha mbaeo aminareo raho le hilitre amity hafenoa ty fitahia Kirisity. ³⁰ Henanezao mandrisike anareo raho, ry rahalahy, amy Jesosy Kirisity Tompontika, vaho amity hatea ty Fagnahy, mba hiarake hialy amiko nareo amity vavake ataonareo amin'Agnahare hoahy. ³¹ Mivavaha mba ho avotre amireo ze tsy magnenke agne Jodia raho, naho mba ho enkene reo mpino ty fanompoako hoahy Jerosalema. ³² Mivavaha mba hahaviako aminareo amin-kafalea amity sitrampon'Agnahare, naho mba hahafahako, mahita fitofa, miarake aminareo. ³³ Zagnahare ty fiadagna anie hiomba anareo iaby. Amena.