¹ Paoly, mpanompo Jesosy Kirisity, le voa kaike ho apositoly, naho voatoka ho mpitalily ty zaka soan'Agnahare. ² Io ty zaka soa ze lefa nampagnategnaene aloha tamity alala reo mpamisavisa tao amity Soratre Masy. ³ Zay le miomba ty Anadahine, te terake bakamity foko Davida arake ty nofo. ⁴ Tamity fitsangana tamity mate, le voatalily fa ty anake maheren'Agnahare tamity here ty Fagnahy ty hamasigna Re_le Jesosy Kirisity Tompontika. ⁵ Tamity alalane ro nandraesantika hasoava fagnenkea ty finoa eo amity firene iaby, naho ty agnarane. ⁶ Amireo firene reo, nareo avao kea le voa kaike ho ahy Jesosy kirisity. ⁷ Ty taratasy toy le hoahy reo iaby ao Roma, te malalan'Agnahare, ty voa kaike ho ndaty masy. Ho aminareo anie ty hasoava, vaho fiadagna bakamin'Agnahare Raentika vaho Jesosy kirisity Tompo. ⁸ Voalohane, isaorako ty Zagnahareko amity alala Jesosy kirisity naho ty aminareo iaby, satria ty finoa nareo le fa natalily magnera zao iaby zao. ⁹ Fa Zagnahare ro vavolombeloko, te tompoeko ao amity fagnahiko ao amity zaka soa ty Anane, fa tsy mitofa mirehake anareo Amine Raho. ¹⁰ Mangatake avao Raho amity vavake ataoko te mba hahasoa ahy amity fomba iaby arake ty sitrampon'Agnahare mba hoavy aminareo. ¹¹ Fa zaho le magniry ty hahita anareo, mba hahafahako magnomea fagnomeam-pagnahy ilane ho anareo, mba hahamafe anareo. ¹² Zay, le magniry raho mba hifankamafeantika eto agnivontika, amity alala ty kirai-kiraike iaby, ty agnaranao vaho ty ahy. ¹³ Henanezao tsy teako nareo tsy hahay, ry rahalahy, ty hoe mateteke raho ro mana fikasa hamonje anareo, (nefa Raho le voasaka zisikezao), mba hahazoa vokatre aminareo eo, heo ty le fa nahazoako ty sisa reo Jentilisa avao kea. ¹⁴ Zaho le mpitrosa amireo Grika vaho reo vahiny, amity mare vaho gege. ¹⁵ Laha zao, amiko, le vogno avao kea raho hitalily ty zaka soa ho anareo te agne Roma. ¹⁶ Fa zaho le tsy megnatre amity zaka soa, fa zay ro heren'Agnahare ho famonjea reo iaby ze mino, hoahy ty Jiosy aloha naho hoahy ty Grika. ¹⁷ Fa amizay ro anoroa ty hamarean'Agnahare bakamity finoa ho amity finoa, arake ze voasoratre ty hoe:"Ty mare le ho velo amity finoa." ¹⁸ Fa ty helon'Agnahare le natoro bakagne andagnitse mandietre ty haratiam-pagnahy vaho ty tsy hamarea ty ndaty, te manaka ty hamarea. ¹⁹ Zay le satria ze hay hay miomba an'Agnahare le hita iereo maso. Fa hinazan'Agnahare iereo. ²⁰ Fa reo toerane te tsy hita maso, te here tsy misy farane vaho maha-Zagnahare Aze, le hita nazava soa, nanomboke tamity famorogna zao iaby zao, tamireo zaka ze finoro. Laha zao le tsy mana fialan-tsiny iereo. ²¹ Zay le satria, ndra le fa nahay ty miomba an'Agnahare aza iereo, le tsy nagnomea hasy amity maha Zagnahare Aze, ndra kea nisaotre Aze. Fa kea, lasa gege tao antsaine iereo, naho nihamaieke ty arofo donto iereo. ²² Iereo le nirehake iereo ho mare, kanefa le niha-lasa gege. ²³ Ty hasin'Agnahare tsy mete lo le natakalo iereo sare ndaty mate ho lo, voro, buby manan-tomboke efatre, vaho reo zaka mikisake. ²⁴ Laha zao le natolon'Agnahare ho amity paie ty arofo iereo ho amity falotoa iereo, mba ho afan-kasy eo amiereo avao ty vata iereo. ²⁵ Iereo ro nanakalo ty hamarean'Agnahare tamity vande, naho ze miantsa vaho manompo ty zaka-namboare fa tsy ty Namboatre, te antsae zisikagne. Amena. ²⁶ Laha zao, natolon'Agnahare ho amity zaka-raty faly iereo, fa reo ampela iereo le nanakalo reo fifandraesa vonjagnahare tamireo ze tsy voanjagnahare. ²⁷ Hoe zay kea, reo lahilahy le namototre ty fifandraesa iereo voanjagnahare miarake amity ampela ka narehe ty paia ara-nofo hoahy ie sambe ie. Reo le lahilahy ty nanao fihetseke mahamegnatre miarake amity lahilahy naho nandrae tao amiereo ty saze ze mete amiereo naho ty haratia iereo. ²⁸ Satria tsy nagnenke ty hana an'Agnahare ao amity dinene iereo, le nameane say tsy sao iereo, mba hanova reo zaka ze tsy mete. ²⁹ Iereo le feno ty tsy hamarea, haratia, hatea-lava, naho lolompo iaby. Iereo feno fialogna, vonoa, fifandiera, fitake, naho zaka raty. ³⁰ Iereo le mpifosa, mpavande, naho mpalay an'Agnahare. Iereo le maherem-bata, miavo, naho mirehareha. Iereo le mpamoro zaka-raty, naho iereo le tsy magnenke ty rae aman-drene. ³¹ Iereo le tsy mana fahaia; iereo le tsy azo atokisa, tsy misy hatea voanjagnahare, naho tsy mandefetre. ³² Hay iereo ty lilin'Agnahare, fa reo ze manao zaka hoe zay le mete amity ho mate. Fa tsy reo zaka reo avao ro ataone, fa magnenke reo hafa ze manao rey kea.