¹ Ty fahisaha Obadia. Ezao ro tsarae Tompo Yaveh mikasike ani Edoma: fa naharey tatetse bakamy Yaveh naho ty masovoho ze nalefa ho amy reo firene eo zahay, nanao tihoe: "Mitsangana! Ao tika hitsanga mba hialy handietse aze!" ² Ingo, hanoeko kele amy reo firene eo riha, ho anoeko tsisy dikane vatane riha. ³ Namitake anao ty firengerenge ty fonao, iriha ze mitoboke egne an-kalo ty vato, amity tragnonao abo; ze manao ampiay tihoe: "Ia ro hanjotso ahy ho agne amity tane? ⁴ Na le mitily abo manahake ty vorombey naho naore tamy reo vasia aza ty tragnonao, le hanjotso anao bakegne raho, hoe Yaveh. ⁵ Laha avy aminao ao ty mpangalatse, laha avy hale ty dahalo (hanao akore ty faharavanao!), feie vao tsy ze sahaza aze avao ro angalarene? Laha avy taminao ao ty mpambole mpangalake voaloboke, feie vao tsy engane eo nipoke reo? ⁶ Henhe ty fila andr'Esao, naho ty fipaiava reo hanagna miviny! ⁷ Reo lahilahy iaby nifagnarake taminao le handefa anao amity lalanao mbagne amity sisin-tane. Reo lahilahy nilongo taminao lefa namitake anao, vaho nandrese anao. Reo ze mihina ty mofonao le fa nampipoke fandrike tambenao eo. Tsy misy fahazavan-tsay amine ao. ⁸ "Feie vao tsy amy ze andro zay raho" hoe ty Yaveh, "ro hamoteke reo lahilahy hendre bakagne Edoma naho mazava say an-bohy dr'Esao ao? ⁹ Hatahotse reo lahilahy mafenao, Temana, ka ho lany amity alala ty famonoa bakagne an-bohy dr'Esao ty lahilahy iaby. ¹⁰ Naho ty hereloha natao tamy Jakoba rahalahenao, le ho feno hegnatse riha, vaho ho lany zisikagne. ¹¹ Tamity andro nandialianao, tamity andro nindaisa reo vahiny ty hanagnane, naho ty nilira reo firene hafa ty vavahadine, vaho ty nanova loka ani Jerosalema, le manahake ty raike tamy iereo riha. ¹² Fa ko mifale amity andro ty rahalahinao, amity andro ty fahavoazane, vaho ko mifale amy reo vahoa i Joda eoamity andro handania aze; ko mirengerenge amity andro maha osa iereo. ¹³ Ko militse ty vavahdy ty vahoako amity androm-pahavoaza gniereo, ko mifale amity fijalea amity andro hahisahane loza, ko mandrava ty hanagna gniereo amity andro maharava aze. ¹⁴ Ko mitsanga amy o sampagnan-dalagnio, mba handany reo mpilay vaho ko magnomey ty sisa tsy matene amity andro maha sahira. ¹⁵ Fa fa mariketse ty firene iaby ty andro gn'Yaveh. Manahake ty nanoenao, ro mboe hatao aminao; hihere an-dohanao ao ty zaka vitanao. ¹⁶ Fa hanahake ty fa ninomenao tan-bohiko masy ao, ro hinoma reo firene iaby tsy ankijano. Hino naho hitele iereo, vaho hanahake ty tsy aroy iereo. ¹⁷ Fa an-bohitse Ziona agne ro hisy reo ze tafalay vaho ho masy zay; vaho ty foko Jakoba hahazo ty hanagnane manoka. ¹⁸ Ty foko Jakoba le ho afo, vaho ty foko Josefa le ho lelan'afo, vaho ty foko Esao ho lila, vaho hagnoro aze iereo zay, kea handevo iereo. Tsy hisy ho velo ty foko r'Esao, satria izay ro tsara Yaveh." ¹⁹ Reo ze bakamy Negeva le hana ty vohy Esao vaho reo ze bakamy Sefela hana ty tane reo Filistina. Hana ty tane Efraima naho ty tane ndre Semaria iereo; vaho Benjamina hana andre Gileada. ²⁰ Reo sesentane ty ana Israely maro le hana ty tane Kanana ka zisikagne Zarefata. Reo sesentane Jerosalema, ze agne Sefarada le hana ty tana Negeva. ²¹ Reo mpamonje le ho mbagne an-bohy Ziona vaho handily magnera ty tane haboa ndr'Esao, vaho ty fanjaka le ahy Yaveh.