¹ Yaveh nitsara tamy ndre Mosesy. Nanao tihoe Re: " Mirehafa amy ty vahoagn'Israely. Talilio amy iareo tihoe: 'Laha misy lehilahy na ampela mivantotse ho ahy Yaveh amy ty sareke manoka ty Nazirita, ³ le lonike hfaly divay na zaka-finome mahere re. Lonike tsy hino vinengire natao tamy ty divay na tamy ty zaka finome mahare re. Lonike tsy hino ranom-boaloboke reohitava voaloboke soa na voaloboke maike. ⁴ Amy ty andro iaby zay iavahane ho Ahike, le lonike tsy hitava na ino na ino zay vita amy ty voaloboke re, agnisa zane ty raraha iaby vita hatramy ty voane le hatramy ty holine. ⁵ Agnate ty fotoa ty sarekem-pitokana iaby, le tsy hisy hareza hampiasay amy ty lohane mandra-pahatapitsy ty andro ty fitokagnagne ho ahy Yaveh. Lonike hatoka ho ahy Yaveh re. lonike hagnenga ty volone hihalava amy ty lohane re. ⁶ Agnate ty fotoa iaby zay hitokanagne ho ahy Yaveh, le lonike tsy hhariny fate re. ⁷ Lonike tsy handoto ty vatane re egne te na le ho ahy ty raene, renene, rahalahine, na rahavavine kea, laha maty reo. Zane satria fa nitoka ho ahy ty Andragnahare re, zay hisa ty ndaty amy ty halava ty volone. ⁸ Agnate ty fotoa tyh fitokanagne iaby le masy re, voatoka ho ahy Yaveh. ⁹ Laha misy ndaty maty tampoke eo agnilane le mandoto ty lohane voahasy, le lonike hagnaratse ty lohane re amy ty andro ty fagnadiova aze__amy ty andro fahafito ro tsy maintse hagnaratse zane ¹⁰ Amy ty andro fahavalo le lonike handay voromahilala roe na ana-boromahilala roe ho ahy ty mpisoro eo amy ty fiziliha mandeha ao amy ty ajomba-lay fihaogna re. ¹¹ Lonike hagnomey voro raike ho fagnatitse oroa ty mpisoro. Reo le hagnavake aze satria nanao raty tamy ty naha-teoa agnila ty faty aze re. Lonike hagnamasy ty lohane ndraik re amy zane andro zane. ¹² Lonike hanoke-bata ho ahy Yaveh agnate ty andro ty fagnamasigna aze re. Lonike handay anak'aondre kahy harentao ho fagnatitse noho ty heloke re. Ty andro nialoha ty nandotoane te vatane le lonike tsy hisafe, satria noltoy ty fahamasignane. ¹³ Zane ro lalàgna mikasike ty Nazirita lafa feno ty foto ty fitokanagne. Lonike handesy eo amy ty fiziliha mandeha ao amy ty ajomba-lay fihaogna re. ¹⁴ Lonike hagnomey ty fagnatine ho ahy Yaveh re. Lonike hagnomey anak'aondre lahy herentao noho tsy misy handra ho fagnatitse oroa re. Lonike hagnomey anank'aondre vave herentao vaho tsy misy handra ho fagnatitse noho ty haratia re. Lonike handay aondrelahy zay tsy misy handra ho fagnti-pilongoa re. ¹⁵ Lonike handay mofo vita amy ty kobam-bary soa lisa mihari menake, Mofo matify tsy misy lalivay najo tao amy ty menake, miarake amy ty fagnatitse hotvay naho fagnatitse inomy avao kea re. ¹⁶ Lonike hagnomey reo eo agnatreha Yaveh ty mpisoro. Lonike hagnomey ty fagnatitse noho ty haratiane naho ty fagnatitse oroa re. ¹⁷ Miarake amy ty mofo tsy masirasira feno ty haro, ro lonikr hagnomezane ty aondrelahy ho soro, le ty fagnati-pihavana ho ahy Yaveh. Lonike hagnomey ty fagnatitse hotavae naho ty fagnatitse inome avao kea ty mpisoro. ¹⁸ Lonike hagnaratse ty lohane iaze Nazirita ho fanehoa ty fitokanagne ho ahy ty Andragnahare eo amy ty fiziliha mandeha ao amy ty ajomba-lay fiahogna. Lonike hangalake ty volo eo an-dohane re le handefa zane ao ampo afo zay ao ambany ty soro ho fagnati-pilongoa. ¹⁹ Lonike hangalake ty soroke ty aondrelahy mandevy, tsila-mofo tsy misy lalivay ao amy ty haro, vaho mofo matify tsy lalivay raike ty mpisoro. Lonike hametrake reo eo an-tagna iaze Nazirita re lafa baka nagnaratse ty lohane hanehoa ty fitokanagne re. ²⁰ ty mpisoro le lonike hagnelahela reo ho fagnatitse eo agnatreha Yaveh, anjara masy ty mpisoro, miarake amy ty aragna zay fagnelahelaha naho ty fe zay namey ho ahy ty mpisoro. Afara zay, le afake mino divay iaze Nazirita. ²¹ Zane ro lalàgna ho ahy ty Nazirita zay miboake handay fagnatine ho ahy Yaveh ho ahy ty fitokanagne. Na ino na ino mete omeine, le lonike hiamby reo lily ty sareke nataone re, soa hitajake ty fampagnantena talily ty lalàgna ho ahy ty Nazirita.'" ²² Nitsara tamy ndre Mosesy ndraike Yaveh. Nanao tihoe Re: ²³ "Mirehafa amy ndre Arona naho reo anandahine. Talilio tihoe: 'Tsipazonareo rano amy zao fomba zao ty vahoagn'Israely. Talilionao amy iareo tihoe: ²⁴ "Hitahy anao naho hiaro anao vantae Yaveh. ²⁵ Hampamiratse ty vatane aminao na hamindra arofo aminao vntae Yaveh. ²⁶ Hivamba anao amim-pitiava naho hagnaomey havotora anao vantae Yaveh.'" ²⁷ Amy zane fomba zane ro tsy maintse hametraha iareo ty agnarako eo amy ty vahoagn'Israely. Le hitahy aiereo Raho."