¹ Nitsara tamy ndre Mosesy re Yaveh le nanao tihoe: ² "Lilio ty vahoagn'Israely vaho talilio iareo tihoe: ' Lafa hilitse ty tane Kanana nareo, iaze tane ze ho anareo, ty tane Kanana naho ty faritse ty tanine, ³ hikisake zisik'agne amy ty tane tsy misy na ino na ino ndre Zina magnarake ty sisy ndre Edoma ty atimonareo. Ty sisine atignana amy ty sisine atimo le ho eo amy ty tsipike ze mijano ao amy ty fijanogna atimo ty Ranomasy Sira. ⁴ Ty efe-taninareo le hihidike miagnatimo ty kaboa ndre Akrabima vaho mandeha mamakivake ty tane tsy misy na ino na ino ndre Zina. Bak'agne, ro mandeha miagnatimo ndre Kadesi-barnea zane vaho magnagne Azmona. ⁵ Bak'agne, ty sisin-tane le hitsoloke bak'ao Azmona magnagny amy ty vavabaibon-driake ty Egypta le magnarake zane zisik'agne an-dranomasy. ⁶ Ty morontsirake andrefa ro ho sisin-tane Ranomasy Bey. Io ro ho efe-tane andrefanareo. ⁷ Ty efe-tanenareo avaratse hikisake magnarake ty tsipike ze havahanareo zisik'agne amy ty Ranomasy Bey le zisik'agne amy ty vohitse Hora, ⁸ vaho kea bak'agne amy ty vohitse Hora le zisik'agne Lebo-hamata, bak'eo le zisik'agne Zedada. ⁹ Bak'eo ty fari-tane hitohy zisik'agne Zifrona le mijano ao Hazar-Enana. Zane ro ho efe-tane avatsinareo ¹⁰ Bak'eo mariho ty efe-tanenao atignana zisik'agne Hazar-Enana atimo le zisik'agne Sefama. ¹¹ Afara zane ty efe-tane atignana hizotso bak'agne Sefama le zisik'agne Ribla, ao amy ty faritse atignana ty Ranomasy Kinereta. ¹² Bak'eo ty efe-tane le hitohy miagnatimo magnarake ty Sihanake Jordane le zisik'agne amy ty Ranomasin-tsira. Zane ro ho tanenareo, magnarake ty sisine magnodidy iaby.'" ¹³ Le nandily ty vahoagn'Israely re Mosesy vaho nanao tihoe: " Toy ro tane ze ho azonareo amy ty filoka, ze fa nililia Yaveh homea hoahy reo foko sivy naho ty atsasake ty foko. ¹⁴ Ty foko ty taragna ndre Robena, arake ty fanendream-panagna ho ahy ty fokon-draza iareo, vaho ty foko ty taranagne ndre Gada, arake ty nanendream-panagna ho ahy ty fokon-draza iareo, vaho ty antsasa-poko ndre Manase iaby fa nandrabe ty tane iareo. ¹⁵ Reo foko roa naho ty antsasa-poko fa nandrabe ty anjara-tane agne an-dafy ty Jordana miatignana andre Jeriko, tandify ty fiboaha ty masoandro." ¹⁶ Nitsara tamy ndre Mosesy Yaveh le nanao tihoe: ¹⁷ "Reto iaby ty agnara reo lehilahy ze hizara ty tane ty lovanareo: Eleazara mpisoro naho Josoa ana ndre Nona. ¹⁸ Lonike riha hifily mpitarike raike iaby saky ty foko soa hizara ty tane ho ahy ty fianakaviambey iareo. ¹⁹ Reto iaby agnara reo lehilahy reo: Bak'amy ty foko ndre Joda, le kaleba ana ndre Jefona. ²⁰ Baka amy ty foko ty tarana ndre Simeona, le Semoela anan-dre Amihoda. ²¹ Baka amy ty foko ndre Benjamina, le Elidada ana ndre Kislona. ²² Bak'amy ty foko ty tarana ndre Dana mpitarike raike, le Boky ana ndre Jogly. ²³ Bak'amy ty tarana ndre Josefa, Bak'amy ty foko ty tarana ndre Manase mpitarike raike, le Haniela ana ndre Efoda. ²⁴ Bak'amy ty foko ty tarana ndre Efraima mpitarike raike, le Kemoela ana ndre Siftana. ²⁵ Bak'amy ty foko ty tarana ndre Zebolona mpitarike raike, le Elifaza ana ndre Parnaka. ²⁶ Bak'amy ty foko ty taranagn'Isakara mpitarike raike, le Paltiele ana ndre Azana. ²⁷ Bak'amy ty foko ty tarana ndre Asera mpitarike raike, le Ahihody ana ndre Selomy. ²⁸ Bak'amy ty foko ty taran ndre Naftaly mpitarike raike, le Pedahela ana ndre Amihoda." ²⁹ Yaveh nandily reo lehilahy reo soa hizara ty tane Kanana naho hagnomea ty saky fokogn'Israely ty anjara iareo.