¹ Vaho ty vahoagn'Israely, ty fiharoa iaby, le nandeha agne amy ty tane tsy misy raraha ty Zina tamy tyvola voalohane; nijano tao Kadesy iareo. Tagne Miriama ro maty naho nalevy. ² Tsy nisy rano ho ahy ty fikambana, vaho niarake nivory hanohitse ahy ndre Mosesy naho Arona iareo. ³ Nitaray tamy ndre Mosesy ty vahoake. Nanao tihoe iareo: "Soa vatagne laha maty manahake ty Israelita namanay maty teo agnatreha Yaveh zahay! ⁴ Nanao akore ro nandesinao soa ho maty atoy amy toy tane tsy misy raraha toy ty fiharoa Yaveh, le zahay naho ty biby fiharenay? ⁵ Nanao akory iriha ro nampiakatse anay niboake bak'agne Egypta nanday anay amy ty toera raty toy? Ingo tsy misy voa, aviavy, voaloboke, na apongadendagnitse eto, vaho tsy misy rano hinome." ⁶ Vaho niala teo agnatreha ty fikambana ndre Mosesy naho Arona. Nizilike teo amy ty filira ty ajomba-lay fihaogna iareo vaho niondrike. Vaho niseho tamy iareo tao ty famirapirata ty hasy Yaveh. ⁷ Nitsara tamy ndre Mosesy Yaveh vaho nanao tihoe: ⁸ "Alao ty fitogno vaho avorio ty fikambana, iriha, naho Arona rahalahinao. Mirehafa amy ty vatobey eo amaso iareo, vaho mandalia soa hiterake rano zane. Hamokatse rano ho aiereo bak'ao amy ty vatobey iriha, vaho tsy maintse omeinao ty fikambana naho reo biby fiharine soa hinomine zane." ⁹ Nirambesa ndre Mosesy bak;eo agnoloa Yaveh ty fitogno, arake ty namdilia Yaveh aze soa hatao. ¹⁰ Le namory ty vahoake teo agnoloa ty vatombey re Mosesy naho Arona. Zao ty nata ndre Mosesy tamy iareo: "Amy henanezao mitsanogna, nareo mpilietse. Nao tsy maintse hampimboake ranobak'amy toy vatombey toy ho anareo vao zahay?" ¹¹ Le nampitsanga ty tagnane re Mosesy vaho namofoke indroa ty vatombey tamy ty fitogno, le rano bey ro niboake. Nino ty fikambana naho reo biby fiharine. ¹² Vaho nanao tihoe Yaveh tamy ty Mosesy naho Arona: "Satria tsy natoky na nagnomey hasy Ahike ho masy teo amaso ty vahoagn'Israely nareo, le tsy handay ty fiangona agne amy ty tane ze fanomeoko aiereo nareo." ¹³ Toy toera toy le kinaike tihoe rano ndre Meriba satria ty vahoagn'Israely le nifamale tamy Yaveh teo, vaho naneho ty vatagne tamy iareo ho masy Reke. ¹⁴ nagnirake mpanday hafatse bak'ao Kadesy ho agne amy ty mpanjaka ndre Edoma re Mosesy: Zao ro talilign'Israely rahalahinao: "Hainao ty aly sarotse ze fa nahazo anay. ¹⁵ Hainao te nizotso tagne Egypta reo razagnay vaho nitoboke tao Egypta agnate ty fotoa ela. nanday anay tamy ty fasiake naho reo razagnay avao kea reo Egyptiana. ¹⁶ Lafa nikaike mafe ahy Yaveh zahay, le nandre ty feonay Reke le nandefa anjely vaho nanday anay niboake bak'ao Egypta. Ingo, Atoy Kadesy zahay, Tanà raike eto amy ty faritsy ty tanenao. ¹⁷ Mangatake aminao raho soa hampimpohanao anao handalo eo amy ty tanenao. Tsy handalo amy ty baibo na tanem-boaloboke, na hino ty rano ao amy reo lava-dranonao zahay. Handeh egne amy ty lalambey ty mpanjaka zahay. tsy hitsily hagnankavana na hagnankavia zahay zisikem-piavianay egne amy ty sisin-tanenao." ¹⁸ Te ty mpanjaka ndre Edoma namale aze tihoe: "Tsy mahazo mandalo eto nareo. Laha mandalo nareo, le ho avy miarake amy ty meso hanafike anaeo raho." ¹⁹ Vaho ty vahoagn'Israely nanao tihoe tamine: "hamakivake ty lalam-bey zahay. Laha mino ty ranonao zahay na ty biby fiharenay, le havahanay zane. Apoho avao zahay soa handeha tomboke, te tsy anao raraha hafa." ²⁰ Te ty mpanjaka ndre Edoma namale tihoe: "Tsy mahazo mandalo nareo." Le avy namofoke ahy Israely ty mpanjaka ndre Edoma niarake tamy ty tagna-mahere reo miaramila maro bey. ²¹ Tsy nagneke ty hamela ty Israely hiampita teo amy ty sisitane iareo ty mpanjaka ndre Edoma. Noho zane, le nivio tamy ty tane ndre Edoma ty Israely. ²² Kea niala tao Kadesy ty vahoake. Ty Vahoagn'Israely, ty fikambana iaby, nandeha agne am-bohitse Hora. ²³ Nirehake tamy ndre Mosesy naho Arona tao am-bohitse Hora Yaveh, eo amy ty sisitane ndre Edoma. Nanao tihoe Re: ²⁴ "Tsy maintse hampiarahy amy ty vahoagne re Arona, te tsy hizilike amy ty tane ze fa nomeiko ty vahoagn'Israely reke. Zane le satria samy nilietse nanohitse ty tsarako tao amy ty rano ndre Meriba nareo. ²⁵ Alao re Arona naho Eleazara anandahine, vaho andeso miakatse agne am-bohitse Hora iareo. ²⁶ Afaho amy ndre Arona reo akanjo fisorogna le ampanaovo andre Eleazara anagne. Tsy maintse ho mate Arona vaho hampiarahy amy ty vahoagne agne." ²⁷ Nanao arake ze nandilia ndre Yaveh re Mosesy. Niakatse tagne am-bohitse Hora teo amaso ty fikambana iaby iareo. ²⁸ Nafaha ndre Mosesy ty akanjo fisorogna ndre Arona vaho nampanaovine ahy ndre Eleazara anagne reo. maty teo ambone vohitse re Arona. Vaho nizotso re Mosesy naho Eleazara. ²⁹ Lafa hisa ty fiharoa iaby te maty re Arona, le nisao ahy ndre Arona agnate ty telopolo andro ty firenena iaby.