¹ Niala io toera io Reke le namonje ty tanindrazane, vaho nagnarake Aze reo mpianane. ² Vaho lafa avy ty andro Sabata, le nampianatse teo amy ty synagoga Reke. Maro ty ndaty nahajanje Aze le vere iareoe. Nanao tihoe iareo: "Bak'aia ro nahazoane reo fampianara reo?" "Ino zao fahendrea ze nomeine Aze zao?" "Ino reo haveregna ze nataone tamy tagnane reo?" ³ "Tasy iaze mpanmdrafitse vao io, iaze ana ndre Maria vaho rahalahy ndre Jakoba naho Josesy naho Jodasy vaho Simona? Tsy miarake amintika etoa vao reo rahavavine?" Nalahelo tamy ndre Jesosy iareo. ⁴ Vaho nanao tihoe Jesosy tamy iareo: "Tsy misy mpitoke tsy omein-kase ankoatse ao amy ty tanindrazane naho ao amy ty longone marinike vaho ao amy ty hasaveragnane arere avao." ⁵ Tsy afake nanao asa mahavere Reke, ankoatsy ty fametrahanne tagne amy ty marare kelekele vaho magnafake aiereo. ⁶ Vere noho ty tsy finoa iareo Reke. Bak'eo nandeha nagnodidy reo tanà Reke Hampianatse. ⁷ Bak'eo le nikaike reo folo roa ambe lahy Reke vaho nanomboke nagnirake aiereo kiroekiroe, vaho nameane fahefa teo amy ty fagnhy maloto iareo, ⁸ vaho nandily aiereo tsy handay na ino na ino amy ty liane, na mofo, na kitapo, ndrala amy ty setira iareo_ ankoatsy fitogno avao_ ⁹ Te hanao hana, vaho tsy hanao akanjo roe. ¹⁰ Nanao tihoe Reke tamy iareo: "Na ombia na ombia nareo mizilike amy ty tragno raeke, le mitoboha ao mandra-pialanareo agnhe. ¹¹ Vaho laha misy tanà tsy mandrambe anareo na mijanje anareo, lafa miala ao amy zay toera zay narep, le ampopoho ty vovoke amy ty tombonareo soa ho fijoroa vavolombelo amy iareo." ¹² Le niala iareo vaho nitore tebty ndaty le tokone hifona amy ty harateane. ¹³ nandroake demone maro iareo, le nagnosotse marare lahiale tamy ty menake le nagnafake aze regne. ¹⁴ Janjy ndre Heroda mpanjaka zay, satria lasa fanta-daza ty agnara ndre Jesosy. Ty ilane nitalily tihoe: "Nitsanga tamy ty maty Jaona mpanao batisa vaho noho zay, le miasa ao apo reo here mahavere reo." ¹⁵ Teo ilane kea mitalily tihoe: Elia Reke." Ty ilane mboe nitsara tihoe: "Mpitoky Reke, manahake raeke amy reo mpitoke tamy ty andro taolo." ¹⁶ Te lafa nahajanje zay Heroda le nanao tihoe reke: "Jaona, iaze nitapahiko loha, ro nitsanga tamy ty mate." ¹⁷ Te heroda ro nampisambotse ahy ndre Jaona le nandefa aze tagne an-tragnomaike noho ty raraha Herodiasy (vale ndre Filipo rahalahine), satria nivaline ampela igne. ¹⁸ Te Jaona nitsara ahy ndre Heroda tihoe: "Tsy arake ty lalàgna ty hanambalianao ty valy ty rahalahina." ¹⁹ Te nasiake tamine Herodiasy le nipay ze hamonoa aze, feie tsy afake, ²⁰ noho ty fatahora ndre Heroda ahy ndre Jaona; haine te ndaty marene naho feno fahamasina reke, vaho niaro aze reke. Nanahiran-tsay aze ty fihenioa aze, feie mboe nijanje aze tamim-pifalea reke. ²¹ Bak'eo nisy irike tamy ty fitsingeregna ty tao niteraha ndre Horada le nanao fagnamabara ho ahy reo lehibeine, naho reo mpifehine, vaho reo mpitarike ty Galilia reke. ²² Le nizilike ty efitragno fagnasa ty anak'ampela Herodiasy vaho nisijake ho aiereo, vaho nahafinaritse ahy ndre Heroda naho reo mbahine nagnambarane tamy ty fitava reke. Nanao ty mpanjaka tamy ty ajaj'ampela tihoe: "Angataho amiko ze iaby teanao le omeko anao zay. ²³ Vaho nifanta tamine reke nanao tihoe: "Na ino na ino angatahinao amiko, le homeiko anao, hatramy ty antsasake ty fanjakako." ²⁴ Le niboake reke vaho nitsara tamy ty renine tihoe: "Ino ro tokone angatahiko amine?" Le nanao tihoe renine: "Ty loha ndre Jaona mpanao Batisa." ²⁵ Teo no ho eo le nimpole tagne amy ty mpanjaka reke, le nangatake, nanao tihoe: "teako omeanao ahike, henane zao, eo ambone finga ty loha ndre Jaona mpanao batisa." ²⁶ Na le nampalahelo mafe ty mpanjaka kea zay, le tsy afake nandà ty fangatahane reke noho ty fifantane nataone naho reo mbahinine nagnambarane tamy ty fitava. ²⁷ Noho zay le nandily miaramila rake bak'amy ty mpiambe ty mpanjaka vaho nandily aze handay ty loha ndre Jaona ho eo amine. Lasa iaze mpiambe vaho nanapake ty lohane tao an-tragnomaike. ²⁸ Nandesine teo ambone finga ty lohane vaho nomeine ahy ty ajaj'ampela, vaho iaze ajaj'ampela nagnomey zay an-drenine. ²⁹ Lafa nahajanje zay reo mpianane, le avy iareo vaho nangalake nofone le nampipoke zay tao am-balavato ³⁰ Nimpole tagne amy ndre Jesosy reo apostole vaho nitalily tamine ze iaby vita iareo naho nampianary iareo. ³¹ Vaho nanao tihoe Re tamy iareo: "Ndao tika ho agne amy ty tane tsy misy raraha le hitofa kele." Te maro ty ndaty ro nivezeveze, vaho tsy nanam-potoa hinana mahatanjake iareo. ³² Le nandeha an-tsambokele iareo soa ho agne amy ty tane tsy raraha. ³³ Te iareo nahisake aiereo nandeha vaho lahiale ro nahay aiereo, le niara- nilailay an-tamboke bak'agne teo amy tanà iaby iareo, vaho teo taolo iareo. ³⁴ Lafa avy tegne amy ty sisine iareo, le nijilo vahoake maro Reke vaho nahaferegnay aiereo Reke satria manahake ty aondre tsy mana mpiarake iareo. le nanomboke nampianatse zaka maro aiereo Reke. ³⁵ Vaho lafa hariva ty andro, le namonje Aiereo mpianane le nanao tihoe: "Toera tsy mihy raraha toy vaho ty andro fa marine ho hariva kea. ³⁶ Alefaso iareo soa handehanane agne amy reo vohitse naho tanà magnodide hivile hane aho ahy ty vata iareo." ³⁷ Te namale Reke le nanao tamy iareo tihoe: "Ameonareo zaka hoane iareo." Le nanao tihoe iareo tamine: "Afake mandeha vaho mivile mofo azo ty denaria roanjato vao zahay le ganome zay aiereo hoane?" ³⁸ Le nanao tihoe Reke tamy iareo: "Firy ty mofo anagnanareo? Mandena vaho heteo." Lafa hisane, le nanao tihoe iareo: "MOfo lime naho fia roe." ³⁹ Le nadile ty ndaty iaby soa hitoboke mitsitokotoko teo amy ty ankata maitso Reke. ⁴⁰ Le nitoboke an-tokone iareo; an-tokone zato naho dimampolo. ⁴¹ Nagalake reo mofo lime naho fia roe Reke, niandrandra ty lagnitse le nisaotse le nizarazara ty mofo vaho nagnome zay tamy ty reo mpianane soa homeine eo agnoloa ty ndaty. Nizaraine avao kea ty fia roe ho ahy iareo iaby. ⁴² Le nihina iaby iareo zisike nahavoke aiereo. ⁴³ Nala iareo ty sisasisa mofo, zay nahafeno roambinifolo haro, vaho kea sisasisa reo fia. ⁴⁴ nisy dime arivo lehilahy nihina ty mofo. ⁴⁵ Teo no ho eo le nangatahine niakatse tao an-tsambokele reo mpianane soa hiaolo Aze ho egne ampita, ho agne Betsaida, laha nandefa ty vahoake Reke. ⁴⁶ Lafa lasa iareo, niakatse tagne ambone vohitse Reke soa hivavake. ⁴⁷ Avy ty hariva, vaho fa teo agnivo ty ranomsy ty sambokele, te re raeke tegne an-tane. ⁴⁸ Vaho hisane te sahira mafe iareo nive ty sambokele, satria nanohitse mafe aiereo ty tioke. Tokone amy ty ora fiambena fahefatsy ty halike le nandeha o amy iareo Reke, nandeha tegn ambone ranomasy, vaho te-handalo teo amy iareo Reke. ⁴⁹ Te lafanahisake AZe nandeha tegne ambone ranomasy iareo, le natao iareo ho angatse Reke le nikoaikoaike iareo, ⁵⁰ satria nahisake Aze iareo le natahotse. Teo no eo le nitsara tamy iareo Reke le nitalily aiereo tihoe: "Matokia! Raho avao toy! Ko matahotse!" ⁵¹ Vaho nizilike tao an-tsambokele niarake tamy iareo Reke, le nijano tsy nitioke ty tioke. Le vere iaby iareo. ⁵² Vaho Tsy taka ty say iareo ty dika iaze mofo. Te kea, nihamafe ty arofo iareo. ⁵³ Lafa tafita iareo, le avy tao Genesereta reo le ninjano tao. ⁵⁴ Vaho lafa nizotso bak'ao amy ty sambokele iareo, avy hatragne le hay ty ndaty tao Reke, ⁵⁵ le nilailay feno ty faritse iaby iareo vaho nanomboke nanday ty marare tamy ty fandreane tagne amy ze iaby heno iareo misy Aze. ⁵⁶ Te na aia na aia nalehane na an-tanà, na tanàm-bey, na tegne amy ty vohitse kele, le napo iareop teo amy ty kianja ty marare. Nangatake Aze iareo soa hagnenga aiereo hikasike ty rambo ty akanjone, vaho reo maro ze nikasike Aze le afake.