¹ Vaho laha niala tao an-tokontane ty tempole Jesosy, le nitsara tamine ty raeke tamy reo mpianane tihoe: "Mpampianatse, vambao ty hasoa ty vato naho ty hasoa ty rafitse!" ² Nanao tihoe reke tamine: "Hisanao vao reo rafitse bey reto? Tsy hapoke hisy vato raeke hifanongoa eo le tsy ho rava." ³ Vaho laha nitoboke teo ambone vohitse Oliva tandrife ty tempole Reke, le nagnontane Aze arere Petera, Jakoba naho Andrea tihoe: ⁴ "Atalilio aminay, Ombia ro hiseo zay raraha iaby zay? Ino ro famantara lafa hiseho reo raraha reo?" ⁵ Vaho Jesosy nanomboke nitsara tamy iareo: "Mitaoa soa tsy hisy ndaty hampitsile lala anareo. ⁶ Te maro ro ho avy amy ty Agnarako naho hitalily tihoe: 'Raho ro ie,' vaho maro ro ho voafitane. ⁷ Lafa mahajanje aly naho resabey mikasike ty ale nareo, le ko misalasala; tsy maintse hiseho reo, te tsy mboe zay ty farane. ⁸ Te hisy firenena hitsanga hamofoke ty firenena, vaho hisy fanjaka hamofoke fanjaka. Vaho hisy horohoron-tane amy ty toera maro sade hisy kere. Zay ro fiandoha ty fijalea ty fiteraha. ⁹ Mitaoa nareo. Hamea iareo amy ty Synedriona nareo, vaho hofofohy ao amy ty synagoga. Hitsanga magnoloa reo mpanapake naho reo mpanjaka noho ty Amiko nareo, ho vavolombelo amy iareo. ¹⁰ Te ty Filazantsara le tsy maintse ho tory agne amy ty firenena iaby aolo. ¹¹ Lafa misambotse naho magnomea anareo iarei, le ko misalasala ty may ze tokone ho talilinareo. Te amy igne lera igne, le homea nareo ze tokone ho tsarainarei; tsy nareo sase ro hitsara, te ty Fagnahy Masy. ¹² Ty rahalahe hagnomey ty rahalahine ho mate, vaho ty rae hagnomey ty anane. Ty anake hitsanga hanohitse ty rae aman-drenine le hahafate aiereo. ¹³ HO heje ty ndaty iaby nareo noho ty Agnarako. Te na ia na ia maharitse hatramy ty farane, le voasarombake zay ndadty zay. ¹⁴ Te laha hisanareo mitsanga eo amy ty tsy tokone hitsanganane ty fahavetaveta ty fandrava (lonike handineke ze mamake), le lonke ze bak'agnee Jodia iaby hilay egne ambone vohitse, ¹⁵ ze ao amy tafon-tragno blonike tsy hizotso ao an-tragno lonike tsy hizilke ao an-tragno na hamoake raraha bak'ao amy zay, ¹⁶ vaho ze agne an-tsaha lonike tsy himpole hangalake ty lambane. ¹⁷ Loza reo ampela bevoka naho mampinono amy zay andro zay! ¹⁸ Mivavaha nareo soa tsy ho amy ty asotry ro hisehoa zay. ¹⁹ Te hisy fijalea bay, ze tsy mboe nisy hatramy ty voalohane, lafa namoro zao tontolo zao Andragnahare, le zisike amy henane zao, aha, vaho zisikam-parane tsy hisy sase zay. ²⁰ Vaho laha tsy tihoe nihafohesy ty Tompo zay andro zay, le tsy hisy nofotse ho sarombake, ze nifiniline, le nihafoze ty isake zay andro zay. ²¹ Vaho laha misy ndaty mitsara aminao tihoe: 'Vambao, atia Iaze Kristy! na kea tihoe: 'Vambao, Eroy Reke!' Le ko mino zauy. ²² Te hisy Kristy Tsy ie naho mitoke tsy ie himboake vaho haneho famantara naho haveregna, soa hamitaha, na le ty ndaty voafile kea, laha azo atao. ²³ Miambena! Fa voataliliko taminareo miaolo ty fotoa reo zaka iaby reo. ²⁴ Feie afara ty fijalea reo andro reo, le hihamaike ty masoandro, ty vola tsy hagnome ty hazavane, ²⁵ reo vasia hipopoke bak'egne amy ty lagnitse, vaho reo here ao an-dagnitse ho hozongnizongne. ²⁶ Le ho hisa iareo ty Anagn'Ondate bak'egne amy ty hiboke amy ty here bey naho hase. ²⁷ Vaho hagnirake ty anjele reke le hamore miarake reo ndaty voafile bak'agne amy ty vazan-tane efatse, bak'agne amy ty fara ty tane le hatragne amy ty fara ty lagnitse. ²⁸ Mangala lesona bak'amy ty hetae aveave. Laha vao mitaroke naho mandrave ty rantsane, le hainareo te fa marine ty lohatao. ²⁹ Manahake zay kea, laha vao hisanareo miseho zay raraha iaby zay, le hainareo te famarine Reke, marinike ty vavahade. ³⁰ Ataliliko aminareo vatane ty to, toy taranake toy le tsy koake zisike hisehoa zay raraha zay. ³¹ Ho rava ty lagnitse naho ty tane, te ty tsarako kea tsy ho rava zisikam-parane. ³² Te ty mikasike zay andro na lera zay, le tsy misi mahay, na reo anjele agne an-dagnitse, na ty Anake, te ty Baba avao. ³³ Mitaoa! MIambena, satria tsy hainareo ty lera. (fagnamariha: reo fahefa taolo le tihoe: Mitaoa! Miambena vaho mivavah, satria...) ³⁴ Zay le manahake ty lehilahy raeke handeha lavitse_nagnenga reke le reo mpiasane ro nataone nitanjake ty tragnone, sambe amy ty rarahane iaby, vaho nadily ty mpiambe Reke soa tsy hatore. ³⁵ Kea miambena, satria tsy hainareo tihoe ombia ro ho avy ty tompon-tragno; met ho amy ty halike zay, na amy ty sasak'alike, na magneno akoho, maraindray. ³⁶ Te laha avy tampoke reke, le ko apoke hahisake anareo matore re. ³⁷ Ze talilieko aminareo le talilieko amy ty ndaty iaby kea: Miambena!"