¹ Bakeo le nivavake tamy Yaveh Zagnaharene baka an-tro i fiay ty Jona. ² Hoe re tihoe: "Nikaike ani Yaveh tamity fijaleako raho ka namale ahy re; baka an-tro ty fiagna tsy hisake ro nikaihako vonje! Le regnao ty feoko. ³ Fa natoranao tagne amity laleke raho, tagne amity farane lale ty riake, vaho nagnodidy ahy ty heren-driake; nandrakoke ahy iaby ty lia-ndranognao. ⁴ Hoe raho tihoe: 'Voaroake tsy ho agnoloa ty masonao eo raho; kanefa le mboe hitolike hagnatreke ty tempolignao masy.' ⁵ Nihily nagnodidy ahy ka zisikegne amity vozoko ty rano; vaho nagnodidy ahy vatane ty laleke; nitiry nagnodidy ty lohako i ahe-dranoey. ⁶ Nirikitse ty vane i vohitsegne raho; le nihily tamiko zisikagne ty tane naho ty hiline. Kanefa mboe nagnakatse ty fiako bakan-davakao riha, Yaveh, Zagnahareko! ⁷ Laha rerake tagnateko ato ty fagnahiko, le nahatiaro ani Yaveh raho; le niavy taminao eo ty vavake natako, tamity tempolignao masy. ⁸ Reo ze minjajy Zagnahare tsy misy dikane le magnary ty fahatokiagnao magnoloa iereo. ⁹ Fa laha ty amiko kea, le hanao soro ho anao amity feo fagnomeza pisaora raho; ho tanteraheko ze fa nataoko sareke. ¹⁰ Bakamy Yaveh ty famonjea!" Le nivola tamity fiagny ty Yaveh, vaho naloane tegne amity tane maike ty Jona.