¹ Niakatre bakao Gilgala ho mbaeo Bokima anjely Yaveh, naho nanao ty hoe:" Ninday anareo niakatre bakao Egypta reho, naho ninday anareo tagne amity tane nifantako homea reo razanareo. Hoe raho:' Tsy handrava ty fagnenkeako aminareo mihintsy raho. ² Ko manao fagnenkea amiereo ze mitoboke ao amity tane toy nareo. Ao horavaenareo ty alitara iereo.' Nefa tsy nijano ty feoko nareo. Fa ino ro anoenareo? ³ Ka henanekezao raho le mirehake fa:' Tsy handroake reo Kananita eo agnoloa nareo raho, fa ho lasa tsilo eo agnoloa nareo iereo, naho reo zagnaharene le ho lasa fandrike ho anareo."' ⁴ Laha nirehake reo rehake reo tamity vahoake Israely iaby ty anjelin'Agnahare, le nikoiake vaho nitagny ty vahoake. ⁵ Natao iereo ty hoe Bokima ze toera zay. Nanolotre fagnatetre ho ahy Yaveh tao iereo. ⁶ Naho laha fa nagnirake ty vahoake tamity lily iereo Josoa, le nimbaeo amity toera voamare ty vahoake Israely kirai-kiraike, mba hangalake ty tane iereo. ⁷ Nanompo Yaveh zisike ty androm-piaignane ty Josoa vaho reo Olobey ze mboe velo tafara ty vahoake, naho reo ze nahisake ty asa bey Yaveh iaby nataone ho ahy Israely. ⁸ Josoa anagn'i Nona mpanompo Yaveh, le mate teo amity faha-110 tao. ⁹ Nandeve aze ao amity faritane ty tane nanendrea aze tao Timnata-heresa iereo, tao amity tane tazoa i Efraima, avara ty vohitse i Gasa. ¹⁰ Ze foko iaby zay avao kea le navory ho amity razagniereo. Nisy foko hafa nitombo tafara iereo ty tsy nahay Yaveh na ze nataone tamireo Israely. ¹¹ Nanao ty raty teo amaso Yaveh vahoake Israely naho nanompo i Bala iereo. ¹² Nisarake tamy Yaveh iereo, ty Zagnahare ty razagniereo, ty ninday iereo niakatre bakao amity tane Egypta. Nagnorike reo zagnahare hafa iereo, reo tena zagnahare ty vahoake ze nagnodidy iereo, naho nihohoke tamireo. Nagnetreke ty helo Yaveh iereo satria ¹³ nisarake tamy Yaveh naho nanompo Bala vaho reo Astarta. ¹⁴ Nirehetre tamy Israely ty helo Yaveh, naho nomeane reo mpanafike ze nangalatre ty fanagna iereo tamy iereo. Naviline ho ndevo reo ze voata tamity here ty fahavalo magnodidy iereo, mba tsy hahaia iereo sasy miaro ty vatane amity fahavalone. ¹⁵ Na taia na taia nindehana Israely nialy, ty tagna Yaveh le nandietse iereo mba haharesy iereo, arake ty nifantane tamy iereo naho tao agnate fijalea raty iereo ¹⁶ Naho Yaveh nagnakatre mpitsara, ty namonje iereo tamity tagna reo ze nangalatre ty fanagna iereo. ¹⁷ Nefa tsy nijano reo mpitsarane iereo. Tsy natoky tamy Yaveh iereo naho nanolotre ty vatane manahake ty mpitsangatsanga tamireo zagnahare hafa vaho nanompo reo. Niotake malaky tamity lala niaigna reo razane iereo _reo ze nitea ty lily Yaveh_nefa tsy mba nanao hoe izay iereo. ¹⁸ Laha fa nagnakatre mpitsara ho ahy iereo ty Yaveh, nagnampe reo mpitsara ty Yaveh naho namonje iereo tamity tagna reo fahavalo iereo tamity andro iaby niaigna reo mpitsara. Niferegnay iereo ty Yaveh laha nitompo noho reo ze nampijale vaho namparare iareo iereo. ¹⁹ Fa laha fa mate ty mpitsara, le niala vaho nanao reo zaka raty vatane toezay ty natao reo razane aza iereo. Nagnorike reo zagnahare hafa mba hanompo vaho hankalaza aze iereo. Nilietse ty hiala tamity fanaone raty iaby na tamireo lala ty reharehane iereo. ²⁰ Nirehetre tamy Israely ty helo Yaveh; hoe Re:" Satria ty firene toy le nandrava reo safa ty fagnenkeako ze napetrako ho ahy reo razane_satria tsy nijano ty feoko iereo_ ²¹ Izaho, manombok'zao, le tsy handroake eo agnoloa iereo na ty raike amireo firene ze nenga Josoa laha fa mate re. ²² Hanao zay raho mba hahafahako mitsapa ty Israely, na hiambe ty lily Yaveh vaho hindeha amizay iereo na aha, hoe ty niambena ty razagn'iereo zay." ²³ Izay ro antone niala Yaveh reo firene reo vaho tsy nandroahane iereo malaky tao naho nagnomeane iereo teo antagna i Josoa.