¹ Nisy kaike avy ho ahy reo lahilahy Efraima; namakivaky i Zafona iereo naho nirehake tamy Jefta hoe:" Nagnino riha ro nindeha hialy amity vahoake Amona naho tsy mikaike anay hiarake aminao? Horoanay riha vaho ty tragnonao." ² Hoe ty jefta tamiereo hoe:" Izaho vaho ty vahoakeko le nana fifandieram-bey tamireo vahoake Amona. Tamity nikaike anao raho, le tsy namonje ahy teo amiereo riha. ³ Laha fa hisako fa tsy namonje ahy riha, le napetrako tamity hereko iaby ty fiagnako naho namakivaky ty vahoake Amona raho, ka namea Yaveh ahy ty faharesea. Nagnino riha ro avy hialy amiko amizao? ⁴ Navory Jefta niarake ty lahilahy iaby tao Gileada ka nialy tamy Efraima re. Nanafike reo lahilahy Efraima reo lahilahy Gileada satria hoe iereo hoe:" Inareo Gileadita le mpilay agne Efraima__ao Efraima vaho Manase." ⁵ Tsinepa reo Giledita reo fita Jordana mbaeo Efraima. Laha misy amireo sisa velo manao ty hoe:" Engao raho hitsake ty renerano," le hirehake iereo lahilahy Gileada hoe: Efraimita vao riha?" laha mirehake re hoe:" Aha" ⁶ le hirehake amine iereo hoe:" Tognono ty hoe: Shiboleta," naho laha mirehake re hoe:" Shiboleta" (satria tsy nahay nanogno ty rehake mazava re ), le hotsepahe reo Gileadita re naho hovonoe eo amity fita Jordana. Roe arivo vaho efatre ale reo Efraimita vinono tamize andro zay. ⁷ Niasa manahake ty mpitsara nagnera Israely zisike ty enen-tao ty Jefta. Bakeo le mate ty Jefta Gileadita naho naleve tao amity raike amireo tana i Gileada. ⁸ Tafarane, le Ibzana bakao Betlehema ro niasa ho mpitsara Israely. ⁹ Nana anadahy telo-polo re. Nahafoe anak'ampela vave telo-polo hampiakare re, naho ninday reo anak'ampela telo-polo ahy ty lahilahy hafa bakagne ambalike ho ahy anadahine re. Nitsara Israely zisike ty fito tao re. ¹⁰ Mate Ibzana naho naleve tao Betlehema. ¹¹ Tafarane le i Elona Zebolonita ro niasa manahake ty mpitsara Israely. Nitsara Israely zisike ty folo tao re. ¹² Mate ty Elona Zebolonita naho naleve tao Aialona tagne amity tane i Zebolona. ¹³ Nagnorike aze, le i Abdona anadahy Elela Piratonita ro niasa manahake ty mpitsara Israely. ¹⁴ Nana anadahy efapolo re naho zafe lahy telopolo. Nitikitse ampondra fitompolo iereo. Naho nitsara Israely zisike ty valo tao re. ¹⁵ Mate ty Abdona anadahy Elela Piratonita naho naleve tao Piratona tagne amity tane i Efraima tane tazoa ty firene reo Amalekita.