² "Yaveh Tompo ty maro mitalily zao: Zao ro nisafa reo vahoake reo:' Tsy andro hiaviantika na hagnoregnantika tragno ho ahy Yaveh zao." ³ Bakeo le niavy tamity alala ty tagna Hagay mpaminane ty safa Yaveh, nanao hoe: ⁴ "Andro hagnoregnanareo ao amity tragno vitanareo vao zao, laha ohatre ka mboe rava ze tragno zay? ⁵ Ka amizao Yaveh Tompo ty maro mirehake zao: Dineho reo fombanareo! ⁶ Namafe voa maro nareo, fa nihaza vokatre kele; nihina nareo nefa tsy entsake; nino nareo fa tsy mamo. Nisiky akanjo nareo fa tsy afake nagnafana ty vatanareo, naho ty mpikarama le handrae vola hatao ao agnate kitapo feno loake avao avao! ⁷ Zao ro safa Yaveh Tompo ty maro:" Dineho reo fombanareo! ⁸ Miakara agne ambohitse , mindaisa hetae, naho aoregno ty tragnoko, le hofale ao amizay raho, naho homean-kasy Raho!__hoe Yaveh." ⁹ "Mipay ty maro nareo, kanefa ingo! tragno kele ro nientenareo, satria nitiofeko zay! Nagnino?" nagnombara Yaveh Tompo ty maro." Satria ty tragnoko le rava, laha ohatre ka miasa ho ahy ty tragnone iaby ty kirai-kiraike aminareo. ¹⁰ Laha zao ty lagnitre le hita ty mika tsy ho anareo, naho ty tane le hita reo vokane. Nikaike main-tane teo amity tane vaho teo amireo vohitse, teo amity vare vaho teo amity divay vaovao, teo amity diloilo vaho teo amity vokatre ty tane, teo amity ndaty vaho teo amireo biby, naho teo amireo asa ty tagnanareo iaby Raho!" ¹² naho Zerobabela anadahy Sealtiela, vaho Josoa mpisorombey anadahy Jozadaka, miarake amireo ndaty sisa tavela, le nagnenke ty feo Yaveh Zagnahare iereo vaho reo safa Hagay mpaminane, satria Yaveh Zagnahare iereo ro nandefa aze naho reo vahoake le natahotre ty tarehe Yaveh. ¹³ Naho Hagay, ty mpinday ty talily Yaveh, le nirehake ty talily Yaveh tamity vahoake nanao hoe:" Miarake aminnareo raho!__zay ro talily Yaveh!" ¹⁴ Ka nagnetseke ty fagnahy Zerobabela anadahy Sealtiela, governora Joda, vaho ty fagnahy Josoa mpisorombey anadahy Jozadaka, naho ty fagnahy reo vahoake sisa tavela iaby ty Yaveh, mba hindeha iereo ka hiasa amity tragno Yaveh Tompo ty maro, Zagnahare iereo ¹⁵ tamity andro fahefatre amby roapolo ty vola fahaene, tamity faharoe tao nanjaka Dariosa mpanjaka.