¹ Vaho tamity tao fahafito, tamity andro fahavalo ty vola fahadime, le niavy ty roandria Israely hagnotane ani Yaveh ka nitoboke tagnoloako eo. ² Vaho niavy tamiko ty tsara gn'Yaveh, manao tihoe: ³ "Nareo anagnodaty, atalilio amity roandria Israely vaho volagno iereo tihoe: 'Ty Tompo Yaveh mivola izao: Avy hagnotane ahy vao riha? Laha velo koa raho, le tsy hanontaneanao!-izay ty fitalilia ty Tompo Yaveh.' ⁴ Hitsara iereo vao riha? Hitsara vao riha, nareo anagn'ondaty? Ao iereo hahay ty zaka raty ty razagne. ⁵ Volagno iereo fa: 'Yaveh Tompo mivola izao: Tamity andro ze nitinginako ty Israely naho nanondrotako ty tagnako soa hifanta fifanta tamy foko reo ty foko Jakoba, naho nampahaieko iereo ty vatako tamity tane Egypta agne, lahafa nanondrotse ty tagnako soa hifanta fifanta tamy gniereo eo raho. Hoe raho tihoe: "Iraho ro Yaveh Zagnaharenareo-reo"- ⁶ tamy gnize andro zay ro nanondrotako ty tagnako soa hifanta fanta tamy gniereo eo fa hinday iereo hiboake amity tane Egypta ho amity tane ze fa tiningiko Soa hoe iereo raho. Feno rano naho tantele zay; izay ro ravake soa vatane amity tane iaby eo. ⁷ Hoe raho tamy gniereo: "Ao ty ndaty kiraidraike hagnary reo zaka mampangory reo agnoloa ty masone naho reo aoly Egypta reo. Ko mandoto ty vatagnareo; Iraho ro Yaveh Zagnaharenareo." ⁸ Nefa nivory tamiko iereo vaho tsy nimete ninjajy ahy. Ty ndaty kiraidraike tsy nisy nagnary ty zaka mampangory tagnoloa ty masone eo na nahafoe ty aoly Egypta, kea le tapam kevetse hagnisy ty siako amy gniereo eo raho soa hahafapo ty siako amy gniereo eo agnivoa ty tane Egypta. ⁹ Niasa ho ahy ty agnarako raho soa tsy ratiedratie amaso gnireo firene ze nitobohane eo zay. Nampahaieko tamaso gniereo eo ty vatako, tamity findaisa iereo niboake ty tane Egypta. ¹⁰ Kea le nandefa iereo niboake ty tane Egypta raho vaho ninday iereo ho ahy ty efetse. ¹¹ Le nagnomey iereo ty liliko raho vaho nampahay iereo ty liliko, ze hahavelo ty ndaty laha magneke reo re. ¹² Nagnomey iereo ty Sabatako ho famantara Amiko eo naho iereo avao kea raho, soa hahaiza gniereo fa Iraho ro Yaveh ze magnamasy iereo. ¹³ Nefa ty foko Israely le nivory handietse ahy tagnefetse agne. Tsy nagnorike ty liliko iereo; fa kea, nandietse ty liliko, ze hahavelo ty ndaty laha magneke izay iereo. Rinatidraty iereo vatane ty Sabatako, kea nivola raho fa hapoko amy gniereo agnefetse agne ty siako soa hilania iereo iaby. ¹⁴ Nefa niasa ho ahy ty agnarako raho soa tsy ho ratiratie amaso gnireo firene eo zay, ze tamasone eo ro nindaisako iereo ta Egypta agne. ¹⁵ Kea nanondrotse ty tagnako avao kea raho soa hifanta fifanta amy gniereo agnefetse agne fa tsy hinday iereo amity tane ze fa hameako iereo, le tane feno rano naho tantele, ze ravake soa vatane amity tane iaby eo. ¹⁶ Nifanta izay raho satria nandietse ty liliko iereo vaho tsy nagnorike ty liliko, vaho nandratiraty ty Sabatako, satria nagnorike aoline reo ty fone. ¹⁷ Fa niferegnay iereo tamity harobahane ty masoko vaho tsy nandrobake iereo tagnefetse agne raho. ¹⁸ Hoe raho tamy anane lahy reo naho anak'ankapela tagnefetse agne reo tihoe: "Ko mandeha amity lily ty rae naho roenegnareo; ko miambe ty liline na mangnadevodevo ty vatagnareo amity aoly. ¹⁹ Iraho ro Yaveh Zagnaharenareo, mandehana amity liliko; ambeno ty liliko vaho anovo reo. ²⁰ Ambeno ty Sabatako masy soa ho famantara Amiko eo naho aminareo reo, soa hahainareo fa Iraho ro Yaveh Zagnaharenareo." ²¹ Fa nivory tamiko anane lahy reo naho anak'ampelane reo. Tsy nandeha tamity liliko iereo na niambe ty liliko, ze mahavelo ty ndaty laha magneke reo re. Nandratiraty ty Sabatako iereo, la le tampakevetse ty hagnisy ty siako tamy gniereo eo aho soa hahafapo ty siako tamy gniereo tagnefetse agne. ²² Nefa nampio ty tagnako raho vaho niasa naho ty amity agnarako, mba tsy ho ratiratie amaso gnireo firene eo zay tamasone eo ro namoaha ty Israely izay. ²³ Nanondrotse ty tagnako soa hifanta amy gniereo agnefetse agne avao kea raho, fa hagnele iereo amy reo firene reo naho hagnaparitake iereo amity tane. ²⁴ Nanampa kevetse ty hanao izay raho satria tsy nagneke liliko reo iereo, vaho satria nandietse liliko reo iereo vaho nagnaratiraty ty Sabatako. Ty masone le nagnorike ty aoly ty razagne iereo. ²⁵ Lahafa izay le nagnomey iereo lily ze tsy soa, vaho ty lily ze tsy hahavelo iereo avao kea raho. ²⁶ Nandoto iereo tamity fagnomeza gniereo raho lahafa nanao soro ty voaloha nanaka iaby naho nanorake reo tamity afo ao iereo. Nanao izay raho soa hampatahotse iereo ka hahaizane fa Iraho ro Yaveh!' ²⁷ Naho izay, nareo anagn'ondaty, mivolagna amity foko Israely vaho volagno iereo tihoe: 'Ty Tompo Yaveh mivola izao: Tamy zay avao kea le nivolagna ty razagnareo raty ahy tamy tsy natoky ahy I iereo. ²⁸ Lahafa Ninday iereo ho amity tane ze fa nifantako hamea iereo raho, vaho ndra ombia ndra ombia nahisaha haboa abo iereo vaho hetae mandoroboke, le nagnomey sorone iereo, nahameloke ahy tamity rakene iereo, vaho tao avao kea ro nagnoroa gniereo ty linte ketae magnitse naho nanjotsoane ty rakene hinome. ²⁹ Le hoe raho tamy gniereo: "Ino ty pilasy abo ze hindaisagnareo raketse toy? Kea le kinaike tihoe Bama ty agnarane zisik'androany.' ³⁰ Naho izay volagno amity foko Israely tihoe: 'Ty Tompo Yaveh mivola izao: Nanao akore nareo ro mandoto ty vatagnareo amity fomba razagnareo reo? Kea nanao akore nareo ro manao manahake ty mpivarotegna, mila reo zaka mampangory? ³¹ Fa lahafa magnomey ty anagnareo lahy agnate afo ao, manomboke amo andro o nareo le mandoto ty vatagnareo amity aolinareo iaby. Kea nanao akore raho ro tokone hagnega anareo hagnotane ahy, nareo foko Israely? Laha velo kea raho -izay ro fitalilia ty Tompo Yaveh-le tsy hagnega anareo hagnotane ahy raho. ³² Ty hevetse miforo antsaignareo ao le tsy ho tanterake mihintsy. Hoe nareo tihoe: "Ao zahay hanahake ty firene hafa, manahake ty foko amity tane hafa ao ze manompo hetae naho vato." ³³ Laha velo kea Raho- izay ro fitalilia ty Tompo Yaveh-le azo antoke fa hanjaka aminareo eo raho amity tana mafe, vata misondrotse, vaho siake ze ataoko aminareo eo. ³⁴ Hinday anareo hiala bakao amy reo ndaty hafa eo raho vaho hamory anareo bakamy reo firene tamy ze nagnaparitaha anareo. Hanao izay amity tana mafe naho amity siake nanoeko raho. ³⁵ Le hinday anareoagnefetse agne ty ndaty raho, vaho agne ro hitsarako anareo mivanta. ³⁶ Manahake ty nitsarako ty razagnareo tagnefetse ty tane Egyptao, ro hitsarako anareo avao reo-izay ro fitalilia ty Tompo Yaveh. ³⁷ Hampandrio anareo ambane ty hetae eo raho, vaho hampagneke anareo ty lily fagnekea. ³⁸ Handio mpivory reo naho reo ze mandietse ahy baka aminareo eo raho. Handefa iereo bakeo amity tane ze itoboha gniereo manahake ty vahiny raho, nefa tsy ho hilitse amity tane Israely ao iereo. Le ho hainareo fa Iraho ro Yaveh. ³⁹ Ka ho anao, nareo foko Israely, izao ro tsarae ty Tompo Yaveh: Ty kiraidraike aminareo le tokone handeha amity aoline agne aby. Manompoa iereo lahafa tsy hinjajy ahy nareo, nefa ao tsy handratiraty ty agnarako masy amity fagnomeza naho aolinareo reo sasy nareo. ⁴⁰ Fa amity vohitse masy eo, an-dingolingo ty vohitse Israely eo-izay ro fitalilia ty Tompo Yaveh- ty foko Israely iaby le hanompo ahy amy taney ao. Hahafale ahy ty mitake ty rakegnareo agne, vaho ty lohavoy ty fokognareo miarake amity zaka masignareo iaby avao kea. ⁴¹ Hagneke anareo manahake ty linten ketae magnitse raho lahafa magnakatse anareo bakeo amity ndaty vaho mamory anareo amy tana ze fa nagnisia anareo. Haneho ty vatako ho masy aminareo eo raho soa hisa gny firene reo. ⁴² Vaho, lahafa minday anareo amity tane ty Israely agne raho, amy iaze tane ze fa nanondrotako ty tagnakoy hifanta fa omea ty razagnareo, le ho hae gnareo fa Iraho ro Yaveh. ⁴³ Bakeo le ho tadidignareo fomba ratignareo reo, naho ty asagnareo iaby ze nandoto ty vatagnareo, vaho halay ty vatagnareo amasognareo eo avao nareo naho ty sata ratinareo iaby ze fa nanoenareo. ⁴⁴ Kea ho hainareo fa Iraho ro Yaveh lahafa manao izay aminareo naho ty amity agnarako raho, fa tsy ho ahy fomba ratignareo na ty sata ratignareo, nareo foko Israely-izay ro fitalilia ty Tompo Yaveh."" ⁴⁵ Le niavy tamiko ty tsara Yaveh, nanao tihoe: ⁴⁶ "Nareo anagnondaty, magnatreha ty antimo ty tane, vaho mivolagna miagnatimo, mitokia ty amity handiera ty ala Negeva. ⁴⁷ Volagno amity ala Negevo tihoe: 'Izao ro fitalilia gn'Yaveh-ty Tompo Yaveh mivola izao: Ingo, handrehetse afo aminareo eo raho. Handrava ty hetae mbao iaby naho ty hetae maike iaby aminareo eo zay. Tsy ho vonoe ty lelan afo mirehetse; ho oroa ze iaby bakantimo agne ka zisika avaratse agne. ⁴⁸ Le ho hisa ty nofo iaby fa iraho ro Yaveh lahafa mandrehetse ty afo raho, vaho tsy ho mate zay."" ⁴⁹ Vaho hoe raho tihoe: "Feie! Nao Tompo Yaveh, mivola ty amiko iereo tihoe: 'Feie vao tsy mpivola fagnohara avao re?