¹ Avy tamiko ndraike ty tsara Yaveh, manao tihoe: ² "Ino ty toenao ho tsarae, iriha ze mampiasa ze ohatse zay mikasike ty tane Israely vaho manao tihoe: 'Ty rae le mihina voaloboke madiro, vaho ty nife ty anake le niragnite? ³ Laha mboe velo kea raho-izay ty fitalilia ty Tompo Yaveh-tsy hisy fahfaha ho anao hampiasa ty ohatse toy a Israely agne sasy! ⁴ Ingo! Ty fiagna iaby le ahy-ty fiagna ty rae manahake ty fiagna ty anake, ahy iereo! Ty fagnahy ze mandiso ro ho mate! ⁵ Ino ty hae tsarae mikasike ty ndaty ze mare naho ze manao ty rarene naho ty fahitia- ⁶ laha tsy mihina amity vohitse eo na manondrotse ty masone amity aoly ty foko Israely re, vaho tsy mandoto ty mpiharo tana amity valine, na magnarikitse ampela zisike ty reglane, feie vao lahilahy mare re? ⁷ Ino ty hae volagne mikasike ty lahilahy tsy mampijale na ia na ia, vaho magnere ahy mpitrosa ze natobo ho fiaro ho ahy ty fitrosam bola re, vaho tsy mangalatse fa magnomey ty hanene ho ahy ty kere naho mandrakoke ty tsy misiky amity sikine, feie vao ndaty mare re? ⁸ Ino ty hae tsarae mikasike ty ndaty tsy mangalake bey loatse amity vola indrame, vaho tsy mangalake tombone bey loatse amy gnize aviline? Vinola mikasike aze fa minday ty rarene naho mampipoke Toky amity ndaty eo re. ⁹ Laha mandeha amity lalako ze ndaty zay ka mitanjake ty liliko soa hiasa ampitokia, le izao ty fampagnatena ho ahy ty ndaty mare toy: ho velo vatane re-izay ro fitalilia ty Tompo Yaveh. ¹⁰ Fa laha atao tihoe managnake mahereloha ze mampipo dio naho manao amy zaka reo ze tinogno teto re ¹¹ Le tsy nanao reo zaka reo aza ty raene, fa mihina amy vohitse reo naho mamitake ty mpiharo tana amity valine re, ino ty hae volagne mikasike aze? ¹² Mampijale ty tsy mana naho ty mila fagnavota ze ndaty zay, vaho magnadevo naho mandroba re, vaho tsy magnere ty fita, ka manondrotse ty masone amy aoly naho manao sata mampangory reo, ¹³ vaho mampitrosa bey loatse re ka mangalake tombone bey loatse amy ze aviline, tokone ho velo vao ze ndaty zay? Itokisa fa tsy ho velo! Ho mate vatane re vaho ty lione le ho amine eo satria nanao reo zaka raty iaby reo re. ¹⁴ Fa ingo! Dineho tihoe misy ndaty miterake kolo lahy, vaho ty anane lahy le mahisake ty hadisoa iaby ze nanoe ty raene, vaho ndra le hisane aza reo, le tsy manao reo zaka reo re. ¹⁵ Tsy mihina amity vohitse eo ze anake lahy zay, vaho tsy manondrotse ty masone amy aoly ty foko Israely reo, naho tsy mamitake ty mpiharo tana amity valine, ino ty hae volagne mikasike aze? ¹⁶ Tsy mampijale ndra ia ndra ia ze anake zay, na manao antoke, na mangalake zaka nangalare, fa kea magnomey ty hanene ho ahy ty kere naho manako ty tsy misiky amity siky. ¹⁷ Tsy mampijale ndra ia ndra ia mindra bola bey loatse na mangalake tombone bey loatse amity findramam bola ze anake lahy zay, nefa minday ty liliko naho mandeha amity liliko; tsy ho mate naho ty hadisoa droane ze anake lahy zay: itokisa fa ho velo re! ¹⁸ Satria mampijale ty hafa aman kere naho mandroba ty rahalahine, vaho manao ze tsy mete amity ndaty ao, ty raene-ingo, ho mate amity hadisoane re. ¹⁹ Fa iriha mivola tihoe:'Nanao akore ianake lahy ro minday ty hadisoa ty raene?'Satria Minday fahitia naho hamaregna vaho miambe ty liliko iaby ianake lahy; manao reo re. Azo antoke fa ho velo re! ²⁰ Iaze raike mandisoy, ro ho mate. Ty anake lahy le tsy hinday ty hadisoa ty raene, vaho ty raike tsy hinday ty hadisoa ty anane lahy. Ty fahitia iaze raike miasa soa ay le ho amine avao, vaho ty haratia ty raty fagnahy le ho amine avao. ²¹ Fa laha miala amity hadisoa iaby ze nanoene iraty fagnahy, vaho miambe ty liliko naho manao ty rarene vaho ty fahitia, le azo antoke fa ho velo re fa tsy ho mate. ²² Ty fandikan dily ze fa nanoene le tsy hampitiahive aze. Hiay amity fahitia ze hanoene re. ²³ Feie vao tena fale zisikagne amity havilasy ty raty fagnahy raho-izay ro fitalilia ty Tompo Yaveh-fa tsy amity fialane amity lalane soa hiaiagnane? ²⁴ Fa laha miala amity hamaregna naho mandiso vaho manao hadisoa naho zaka ratiraty manahake ty zaka raty iaby anoe ty ndaty raty ty ndaty mare, le ho velo vao re? Ty fahitia iaby ze fa nanoene le tsy hampitiahive sasy lahafa nivalike amiko amity famadihane re. Ka ho mate amity hadisoa ze nanoene re. ²⁵ Fa iriha mivola tihoe: 'Ty lala ty Tompo le tsy rarene! Njigno, nareo foko Israely! Feie vao tsy rarene ty lalagnareo? ²⁶ Lahafa miala amity hamaregna ty ndaty mare, vaho mandiso le mate naho reo, le ho mate amity hadisoa ze nanoene re. ²⁷ Fa laha miala amity haratia ze nanoene naho manao ty rarene naho ty hamaregna ty raty fagnahy, le hahavonje ty fiagnane re. ²⁸ Fa fa nahisake vaho niala tamity fandikan dily iaby ze fa nanoene re. Mete ho velo re, vaho tsy ho mate. ²⁹ Fa ty foko Israely mivola tihoe: 'Ty lala ty Tompo le tsy rarene!' Amity fomba manao akore ro tsy maha rarene ty liliko, nareo foko Israely? Lilignao reo ro tsy rarene. ³⁰ Naho izay le hitsara ty lahilahy kiraidraike aminareo eo manahake fombane reo raho, nareo foko Israely!-izay ro fitalilia ty Tompo Yaveh. Miheregna vaho miala amity fandikan dily gnareo soa tsy ho vato misaka hadisoa aminareo iereo. ³¹ Alao amity vatagnareo fandikan dily iaby reo ze fa nanoenareo reo; anovo fo mbao naho fagnahy mbao ty vatagnareo. Nanao akore riha ro tokone ho mate, nareo foko Israely? ³² Fa tsy fale amity fate gnize mate raho-izay ro fitalilia ty Tompo Yaveh!"