¹ Amizao le toa iaby reo baiko, reo lily, naho reo lalana ze nandilia Yaveh Zagnaharenao ahy mba hampianare anao, ka mba hahafahanao miambe reo agne amity tane ze hombanao tandrife Jordana ze ho fanagnanao; ² mba hahafahanao magnomea hasy Yaveh Zagnaharenao, amity fiambena reo lalana vaho ty lily iaby ze nandiliako anao__riha, reo ananao, naho reo zafenao, amity andro iaby hivelognanao, mba hitombo ty andro hivelognanao. ³ Laha zao dranjigno reo, ry Israely, naho ambeno reo, mba hahasoa anao zay, mba hitomboanao mafe, agne amity tane feno-ronono vaho tantele, arake ze le fa nampagnantegna Yaveh, ty Zagnahare ty razambeinao taminao hatao. ⁴ Dranjigno, ry Israely: Yaveh Zagnaharentika le raike. ⁵ Hotea Yaveh Zagnaharenao amity arofonao iaby riha, amity fagnahinao iaby, naho amity herenao iaby. ⁶ Reo rahake ze handiliako anao androany le ho ao amity arofonao; ⁷ naho hagnanatre soa reo amity ananao riha; hirehake momba reo riha laha fa mitoboke ao antragnonao, laha fa mindeha egne andala, laha fa miroro, naho laha fa mifoha. ⁸ Hamehe reo riha mba ho famantara eo amity tagnanao, naho atao manahake ty fehen-kandry eo agnivo ty masonao reo. ⁹ Hanoratre zay eo amity tolam-baravara ty tragnonao vaho ty vavahadinao riha. ¹⁰ Laha fa minday anao agne amity tane ze nampagnantegna Yaveh Zagnaharenao tamireo razambeinao, Abrahama, Isaka, vaho Jakoba, fa hameane anao riha, miarake amity tana bey vaho tena soa ze tsy namboarenao, ¹¹ vaho tragno maro feno karazan-jaka soa ze tsy nataonao, famorian-drano ze tsy nihalienao, naho tanem-boaloboke vaho hetaen'oliva ze tsy nambolenao, hihina riha ka ho entsake__ ¹² naho miambena riha mba tsy hagnaligno Yaveh, ze ninday anao hiala tao amity tane Egypta, hiakatre ty tragno fagnandevoa. ¹³ Hagnomea hasy Yaveh Zagnaharenao riha; re ro ho tompoenao, naho hifanta amity agnarane riha. ¹⁴ Tsy hanompo zagnahare hafa riha, reo zagnahare ty ndaty ze magnodidy anao iaby__ ¹⁵ satria Yaveh Zagnaharenao ty eo agnivonao le Zagnahare saro-tene__fa laha manao zay riha, le hirehetre aminao ty helo Yaveh Zagnaharenao, naho handrava anao amity tane iaby re. ¹⁶ Tsy hitsapa Yaveh Zagnaharenao manahake ty nitsapanao aze tagne Masaha riha. ¹⁷ Riha le hiambe soa reo baiko Yaveh Zagnaharenao, reo liline, vaho reo lalane, ze nandiliane anao. ¹⁸ Hanao ze mare vaho soa eo amaso Yaveh riha, mba hahasoa anao zay, naho mba hahafahanao militre vaho mana ty tane soa ze le fa nifanta Yaveh tamireo razanao, ¹⁹ mba hagnafaha reo fahavalonao iaby tsy ho eo agnoloanao, arake ty le fa safagne Yaveh. ²⁰ Laha fa magnotane anao ty ananao lahy amity andro hoavy, manova hoe:' Ino aby reo lalana ty fagnenkea, reo fotsipike, naho reo lalana hafa ze nandilia Yaveh Zagnaharentika anao?' ²¹ le hirehake ty ananao lahy riha hoe:' Ndevo Farao tagne Egypta tika; ninday antika niala ty tagne Egypta tamity tagna mahere Re, ²² naho nanoro famantara vaho fahagaga, bey vaho mafe vatane, tamy Egypta, tamy Farao, naho tamity tragnone iaby, teo amasontika Re; ²³ naho ninday antika hilitse ao, mba hagnomea antika ty tane ze le fa nampagnantegnane reo razantika. ²⁴ Yaveh le nandily antika zisikagne mba hiambe reo lily iaby, mba hatahotre Yaveh Zagnaharentika hahasoa antika, mab hahavelo antika zisikagne, manahake antika amizao. ²⁵ Laha miambe reo lily iaby reo eo agnoloa Yaveh Zagnaharentika tika, arake ze nandiliane antika, le hamaregnantika zay.'