¹ Laha misy lahilahy mangala valy ka manambaly aze, naho laha tsy mahisake saotre eo amasone ty ampela satria nahisake zaka tsy mete tamine re, le tsy maintsy manoratre taratasy fagnamaregna fisaraham-panambalia amine re, atoboho eo antagnane zay naho roaho ao antragnone re. ² Laha fa hiala tao amity tragnone re, le afake mindeha vaho ho valy ty lahilahy hafa. ³ Laha malay aze ty valine faharoe ka hanoratre taratasy fahamarea fisaraham-panambalia, le atoboho eo antagnane zay, naho roaho ao antragnone re; na laha mate ty valine faharoe, ty lahilahy ze nangalake aze ho valy__ ⁴ le afake tsy mangalake valy aze sase ty valine taloha, ty voalohane nandroake aze, laha fa voaloto re; satria ho haratia amy Yaveh zay. Ko manao ze mahavy ty tane ho meloke riha, le ty tane ze namea Yaveh Zagnaharenao ho lova. ⁵ Laha misy lahilahy vaho nangala-baly, le tsy tokone hindeha agnaly miarake amity tafike re, na baikoe hindeha hanao asa antseresere; ho afake hitoboke ao antragnone zisike ty heren-tao naho hampifale ty valine ze nakarene re. ⁶ Tsy misy lahilahy mangalake fikosoham-bare na ty vatone ho antoke, satria zay le mangalake ty fiaign'ondaty ho antoke. ⁷ Laha misy lahilahy tratre mangalake ankerene ty raike amireo rahalahine ze eo amity vahoake Israely, vaho manao aze hanahake ty ndevo naho hivarotre aze, le tsy maintsy ho mate ze mpangalatre zay; naho hagnafake ty raty aminao eo riha. ⁸ Miambena amity arete-mandany ty haboka, mba hahafahanao magnara-maso soa vaho magnorike ty toro-hevetre iaby ze namea anareo vaho ze nagnanara reo mpisoro, reo Levita anareo; arake ty nandiliako iereo, ka horihenareo. ⁹ Tiarovo ty natao Yaveh Zagnaharenao tamy Miriama laha fa bakagne Egypta nareo. ¹⁰ Laha fa mampidran-jaka ty mpirai-belo aminao riha, le ko militre ao antragnone mba hangalake ty antokene. ¹¹ Hitsanga ao ambaline riha, naho ty lahilahy ze nampidramenao le hinday ty antoke hiakatre aminao eo. ¹² Laha lahilahy mahantra re, ko ente miroro ho fanagnanao ty antokene. ¹³ Fa tsy maintsy aherenao agne amine ty antoke amity andro hitsofora ty andro, mba hahafahane miroro aoagnate lambane naho hitahiane anao; ho fahamarea ho anao agnooa Yaveh Zagnaharenao eo zay. ¹⁴ Ko mampijale ty mpanompo kinarama ze mahantra vaho ao agnate ty tsy fahampea, na ana reo Israelita namanao, na reo vahiny ze ao amity tane ze ao ambavahady ty tana nao; ¹⁵ ameo aze isanan'andro ty karamane; ko enga ho tratre ty masoandro mitsofotre zay, satria mahantra re naho mitama zay. Anovo zay mba tsy hitaraigna agne amy Yaveh ty aminao, naho mba tsy ho hadisoa ho anao zay. ¹⁶ Ty rae-amandrene le tsy tokone ho vonoe noho reo anane, na ty anake ho vonoe noho reo rae-amandrenene. Fa kea, ty kirai-kiraike iaby le tsy maintsy vonoe noho ty hadisoane arere. ¹⁷ Tsy tokone hampiasa here riha mba hagnafaha ty rarene amity vahiny na ty bode, na hangalake ty lamba ty mpivem-bata ho antoke. ¹⁸ Fa kea, tiarovo fa riha le ndevo tagne Egypta, naho Yaveh Zagnaharenao ro namonje anao tagne. Laha zao magnanatre anao hagnenke zay lily zay raho. ¹⁹ Laha mihaza ty vokanao agne amity baibonao riha, naho laha nagnaligno amboara raike tagne ambaibo, le ko mihere mangalake zay; engao ho ahy ty vahiny, ho ahy ty bode naho ho ahy ty mpivem-bata zay, mba hitahia Yaveh Zagnaharenao anao amity asa ty tagnanao iaby. ²⁰ Laha fa magnintsa ty hetaen'olivanao riha, le ko magnere mitsimpo reo egne amity tahone sase; ho ahy ty vahiny, ho ahy ty bode, naho ahy ty mpivem-bata zay. ²¹ Laha fa mamory ty voaloboke egne amity tanem-boaloboke riha, le ko mitsimpo zay sase. Fa ze sisa tavela le ho ahy ty vahiny, ho ahy ty bode, naho ho ahy ty mpivem-bata. ²² Tiarovo fa ndevo tagne amity tane Egypta riha; laha zao magnanatre anao hienke ze lily zay raho.