¹ Naho nihere ka nanohy ty lianay nimbaeo angnefetre mbamity riake mena zahay,arake ty nirehafe Yaveh tamiko; le nindeha nagnodidy ty vohitse Seira zisike ty andro maro zahay. ² Naho nirehake tamiko ty Yaveh, nanao ty hoe: ³ 'Le fa ampe ty fotoa lava nindehananareo nagnodidy ty vohitse toy; fa mindehana magnavaratre. ⁴ Baiko ty ndaty, manao ty hoe:" Mila mandalo ty sisin-tane reo raghalahinareo nareo, le ty foko i Esao, ze mitoboke agne Seira; hatahotre anareo iereo. Laha zao miambena ⁵ mba tsy hialy amiereo, fa tsy hameiko amity tane iereo nareo, na le tane fenon-tomboke hamindra ty tomboko aza; satria le fa nomeako i Esao ho fanagna ty vohitse Seira. ⁶ Vola ro hivilianao sakafo amiereo, mba hahafahanao mihina; vola avao kea ro hivilianao rano amiereo, mba hahafahanao mino. ⁷ Satria Yaveh Zagnaharenao le nitahy anao tamity asa ty tagnanao iaby; le fa haine ty fandehananao amity tane efetre bey toy. Satria niarake taminao Yaveh Zagnaharenao zisike ty efa-polo tao zay, ka tsy sahira na ino ino riha."' ⁸ Ka le nandrio tagne amity tane reo rahalahintika tika, le ty foko i Esao ze mitoboke agne Seira, lavitre ty lala Araba, bakagne Elata vaho bakagne Ezion-Gebera. Bakeo nihere tika ka nandrio teo amity lala mbaeo amity tane efetre Moaba. ⁹ Hoe ty Yaveh tamiko ty hoe:' Ko magnakoronta i Moaba, naho ko mialy amiereo. Fa tsy hoeako anao ho fanagnanao arere ty tenene, satria are le fa nomeako reo foko i Lota, ho fanagnane iereo.' ¹⁰ (Nitoboke tagne ty Emima taloha, zay firene bey, maro agnisa, naho lava manahake ty Anakita; ¹¹ niraise manahake ty Refaita avao kea reo, manahake reo Anakita; fa natao reo Moaba ty hoe Emima iereo. ¹² Nitoboke tagne Seira avao kea reo Horita taloha, nefa niraese ty foko i Esao iereo. Naravane tsy ho eo agnoloane iereo ka nitoboke teo amity toeragn'iereo, manahake ty natao Israely tamity tane ze nomea Yaveh iereo.) ¹³ "'Henanezao mitsangana naho mindehana agne amity baibon-driake Zareda.' ¹⁴ Naho ty andro nindehananay bakagne kadesi-Barnea zisikagne amity baibon-driake Zareda, le naharetre valo amby telo-polo tao. Tamize andro zay ro nahalasa reo lahilahy mpialy tamio foko o teo amity ndaty, arake ty nandilia Yaveh tamiereo. ¹⁵ Fagnampe zay, nandietre ze foko zay ty tagna Yaveh mba hamoteha iereo tsy ho eo amity ndaty mandran-pahafate iereo. ¹⁶ Ka le zao ro niseho, lafa fa mate reo lahilahy mpialy ka niala teo amireo ndaty, ¹⁷ le nirehake tamiko Yaveh, nanao ty hoe: ¹⁸ 'Henanezao riha le handrio agne agne Ara, sisy Moaba. ¹⁹ Laha fa miharine ty tane i Amona riha, le ko magnakoronta na mipay aly amiereo; fa tsy hagnomea anareo ty tane ty vahoake i Amona ho fanagna raho; satria le fa nomeako reo foko Lota ho fanagnane zay."' ²⁰ (Zay kea le raese ho tane i Refaita. Le fa nitoboke tao reo Refaita taloha__fa reo Amonita nikaike iereo hoe Zamzomita__ ²¹ firene bey, maro agnisa, naho lava manahake reo Anakita. Fa Yaveh nandrava iereo tsy ho eo agnoloa reo Amonita, naho rinoane iereo ka nitoboke teo amity toera iereo. ²² Hoe zay kea ro natao Yaveh tamity vahoake Esao, ze nitoboke tagne Seira, laha fa nandrava reo Horita tsy ho eo agnoloane iereo, ka nandroake iereo ty foko i Esao naho nitoboke teo amity toera iereo zisike zao. ²³ Naho ty amireo Avita ze nitoboke tagne amity tana lavitre manahake i Gaza, le rinava ty Kaftorita, zay bakagne Kaftora iereo, ka nitoboke tao amity toerane iereo.) ²⁴ "'Henanezao mitsangana, mindehana amity lianareo, naho mandalova agne amity baibo i Arnona; ingo, natoloko eo ampelatagnanao ty Sihona ty Amonita, mpanjaka i Hesbona, vaho ty tanene. Santaro ty fanagnanao, naho mialia amine. ²⁵ Henanezao le hanomboke hametrake ty tahotre vaho horohoro anao eo amireo ndaty ze ambane ty lagnitse iaby raho; haharey vaovao momba anao iereo naho hiholiboro vaho hangorohoro noho ty aminao.' ²⁶ Nagnirake mpinday talily bakagne agnefetre Kedemota raho hombaeo amy Sihona, mpanjaka i Hesbona, niarake tamity rehake filongoa, manao ty hoe: ²⁷ 'Engao raho handrio eo amity tanenao; fa magnorike ty lalambey ty hindehanako; naho tsy hiotake hiankavia na hiankavana raho. ²⁸ Vola ro hiviliako sakafo aminao, mba hahafahako mihina; vola ro hiviliako rano, mba hahafahako mino; engao avao raho hindeha; ²⁹ arake ty natao ty foko Esao ze mitoboke agne Seira, vaho reo Moabita ze mitoboke agne Ara tamiko; mandram-pitsahako i Jordana mbaeo amity tane ze amea Yaveh Zagnaharenay ho anay.' ³⁰ Fa Sihona, mpanjaka Hesbona, le tsy hagnenga antika handrio amine eo; satria Yaveh Zagnaharenao le nagnamafe ty saine naho nagnamafe ty arofone, mba hahafahane mandrese aze amity herenao, ze le fa nataone amizao. ³¹ Hoe ty Yaveh tamiko ty hoe:' Ingo, le fa nanomboke nanolotre Sihona vaho ty tanene teo agnoloanareo raho; santaro ty fanagna zay, mba hahafahanareo mandova ty tanene.' ³² Bakeo Sihona avy nandietse antika, re vaho reo vahoakene iaby, mba hialy agne Jahaza. ³³ Fa natolo Yaveh Zagnaharentika tamintika re ka resentika; vinonontika ho mate re, naho reo anadahine, naho reo vahoakene. ³⁴ Nalaentika iaby ty tanane iaby tamize andro zay naho pinotentika vatane ty tanane iaby__reo lahy vaho vave naho reo malineke; tsy nisy napoke ho velo. ³⁵ Ty biby hare zay azontika, niarake tamireo fanagna tao amity tana avao ro nalaentika. ³⁶ Zisikagne Aroera, ze agne amity sisy ty baibo i Arnona, ka zisikagne amity tana ze agne amity baibo, ka zisikagne amity lala iaby mbaeo Gileada, le tsy nisy tana abo loatre ho antika. Yaveh Zagnaharentika le nagnomea faharesea ho antika tamireo fahavalo teo agnoloantika. ³⁷ Tagne amity tana reo foko i Amona avao ro tsy nindehananao, amity sisy ty renerano Jakoba iaby, vaho reo tana ty tazoa__na taia na taia nirara Yaveh Zagnaharenay tsy hombantika.