¹ Ko manao soro agnombe na agnondry ty misy havoa na zaka raty ho ahy Yaveh Zagnaharenareo, satria zay le zaka-raty amy Yaveh Zagnaharenareo. ² Naho laha misy aminareo eo, ao amireo vavahady ty tana nareo ze namean'Agnahare anareo, lahilahy na ampela hisake manao ze raty eo amaso Yaveh Zagnaharenareo naho mivalike amity fagnenkea, ³ na ia ia nindeha vaho nanompo zagnaharen-kafa naho mihohoke amiereo, na masoandro, na vola, na ze zaka iaby egne amity lagnitse __ze tsy nandiliako anareo__ ⁴ naho laha talilie ty amizay nareo, na le fa reinareo zay, le ao nareo hanao hagnontane soa. Laha mare naho azo antoke fa nisy fagnaratia hoe zay natao tao Israely, le zao ro tokone ataonareo. ⁵ Ao ho entenareo eo amity vavahady ty tana, ty lahilahy na ampela, ze nanao zay zaka-raty zay, ao ho torahenareo amity vato ho mate ze ndaty zay. ⁶ Amity reha ty vavolombelo roe, na vavolombelo telo, le ao ho vonoe ho nate re; fa amity reha ty vavolombelo raike avao le ao tsy ho vonoe ho mate re. ⁷ Tsy maintsy ty tagna reo vavolombelo ro voalohane mamono aze ho mate, naho afara zay le ty tagna reo vahoake iaby; naho hafahanao tsy ho eo aminareo ty raty. ⁸ Laha misy raraha miseho ze sarotre loatre aminareo ty mitsara aze__mete hoe mikasike vono ndaty na fate tsy kinahy, teo amity zo ty ndaty vaho ty ndaty raike hafa, na karazana fere natao, na kara raraha hafa, raraha mampialy hevetre eo amireo vavahady ty tana nareo__le ao nareo hiakatre agne amity toera ze ho filie Yaveh Yaveh Zagnaharenareo ho fitoboha ty masy. ⁹ Ao nareo hindeha agne amireo mpisoro, reo foko Levy, naho agne amireo mpitsara ze tompon'anjara amize andro zay; hipay ty heveiereo nareo, naho hamea iereo anareo ty lilim-pitsara. ¹⁰ Ao horihenareo ty lily namea anareo ao amity toera hofilie Yaveh ho fitoboha ty masy. Hiambe hanao ty zaka-iaby ze hanoroa iereo lala hataonareo nareo. ¹¹ Oriho ty lala ze nampianare iereo anareo, naho anovo arake reo fanam-pahan-kevetre amea iereo anareo. Ko mivio amize nirehafe iereo nareo, ho agne ankavana na ho agne ankavia. ¹² Na ia ia miavognavo, amity tsy fidranjigna ty mpisoro ze mitsanga hanompo eo agnoloa Yaveh Zagnaharenareo, na amity tsy fidranjigna ty mpitsara__ze ndaty zay le ho mate ; hagnafake ty raty amy Israely nareo. ¹³ Ao ty ndaty iaby haharey naho hatahotre, naho tsy hiavognavo sase. ¹⁴ Laha fa avy agne amity tane ze namea Yaveh Zagnaharenareo anareo nareo, naho laha fa azonareo zay ka mamototse mitoboke ao nareo, le hoe nareo ty hoe:" Hametrake mpanjaka amiko eo raho, manahake reo firene iaby ze magnodidy ahy,' ¹⁵ naho le tsy maintsy hametrake mpanajaka aminareo eo vatane nareo ze ndaty ho filie Yaveh Zagnaharenareo. Tsy maintsy hametrake mpanjaka aminareo eo nareo ze ndaty bakamireo rahalahinareo. Tsy afake mametrake vahiny, ze tsy rahalahinareo, aminareo eo nareo. ¹⁶ Kanefa tsy azone atao ty magnamaro soavale ho ahy ty vatane, na hahavy ty vahoake hihere agne Egypta mba hahafahane magnamaro reo soavale, fa hoe Yaveh taminareo hoe:" Tsy hihere amize lala zay sase nareo.' ¹⁷ Tsy mahazo mangalake valy maro ho ahy ty vatane re, mba tsy himpolia ty arofone agne amity hafa. Tsy mahazo mamory volafoty vaho volamena bey loatre re. ¹⁸ Laha fa mitoboke eo amity sezan-droandria ty fanjakane re, le tsy maintsy soratene ho ahy ty vatane amity sare-sare ty liline, bakamity lily ty eo agnoloa reo mpisoro, zay Levita. ¹⁹ Tsy maintsy miarake amine ty sare-sare, naho tsy maintsy vakie zay amity andro iaby hifantane, mba hahafahane mianatre magnaja Yaveh Zagnaharenareo, mba hitanane reo rehake iaby ty lily aman-dala toa, mba hiambena iereo. ²⁰ Tsy maintsy zay mba tsy hirehareha ty arofone amireo rahalahine, naho mba ty hiviognane amireo lily, ho agne ankavana na ho agne ankavia; mba hahalava reo androne vaho reo anane ao amity fanjakane, amy Israely eo.