¹ Laha zao le ao hotea Yaveh Zagnaharenareo nareo naho hiambe zisikagne reo fagnanarane, ty lalane, ty fotsipine, naho reo liline. ² Ambeno fa tsy mirehake amireo ananareo Raho, ze tsy nahay kea na nahisake ty fagnaliloa Yaveh Zagnaharenareo, ty habeine, ty tagnane mahere, na ty tagnane mahity, ³ reo famantara vaho asa ze nataone tagne agnivo Egypta tamy Farao, mpanjaka Egypta, naho tamireo tanene iaby. ⁴ Na nahisake ty nataone tamity tafike Egypta, tamireo soavaline, na tamity kalese iereo, ty fomba nagnanoane ty Riake Mena hampikifotre iereo laha nagnia anareo iereo, naho ty fomba nandrava Yaveh iereo zisikandroany, ⁵ na ze nataone ho anareo tagne agnefetre mandram-pahavianareo tamity toera toy. ⁶ Tsy hisa iereo ze natao Yaveh tamy Datana vaho Abirama, reo ana i Eliaba anadahy Robena, ty fomba nanokafane tagne ty vavane naho nitele iereo, ty foko iereo, ty tragno iereo, naho ty zaka-manam-piay iaby nagnorike iereo, teo agnivo Israely iaby. ⁷ Fa ty masonareo ro le fa nahisake reo asa bey Yaveh iaby ze nataone. ⁸ Laha zao ambeno reo lily iaby ze handiliako anareo androany, mba hahavy anareo homafe, ka hilitse vaho hangalake ty tane ze hisanareo mba ho fanagna, ⁹ naho mba ho lava andro nareo agne amity tane ze nifanta Yaveh tamireo razanareo fa hamea iereo vaho ty foko iereo, ty tane feno ronono vaho tantele. ¹⁰ Fa ty tane, ze hiliranareo mba hahazoa zay, le tsy manahake ty tane Egypta, ty niboahanareo, ze namendrahanareo ty voanareo vaho nanondrahanareo rano zay tamity tombonareo, manahake ty baibo magnitse maintso; ¹¹ fa ty tane, ze hombanao mba ho fanagna, le tanen-tazoa vaho baibo, naho minoma rano bakamity ranon'oran-dagnitse, ¹² ty tane ze maike Yaveh Zagnaharenareo; ty maso Yaveh Zagnaharenareo, zisikamity fiatomboha ty tao ka zisikamity faran-tao. ¹³ Zay le hiseho, laha hidranjy soa reo liliko ze handiliako anareo androany nareo, le ty hotea Yaveh Zagnaharenareo vaho hanompo Aze amity arofonareo vaho ty fagnahinareo iaby, ¹⁴ mba hagnomeako ranon'ora amity tanenareo amity fotoane, le ty voalohan'ora vaho ty faran'ora, mba hahafahanareo mamory ty varenareo, ty divainareo vaovao, naho ty diloilonareo. ¹⁵ Hagnisy akata amity tanenareo Raho ho ahy reo biby harenareo, naho hihina nareo ka ho voky. ¹⁶ Ambeno ty vatanareo mba tsy ho voafitake ty arofonareo, ka hivio vaho hanompo zagnahare-hafa vaho hihohoke amiereo nareo; ¹⁷ mba tsy hirehetre aminareo ty helo Yaveh; naho mba tsy hampikato ty lagnitse Re mba tsy hisia ty ranon'ora, naho ty tane tsy hamoa ty voane, naho mba tsy haharava anareo malaky amity tane soa ze namea Yaveh anareo. ¹⁸ Laha zao tano ao ampo vaho fagnahinareo reo rehako reo, feheo ho famantara eo amity tagnanareo zay, naho engao zay ho feheloha eo agnivo reo masonao. ¹⁹ Hampianarenareo reo ananareo zay naho mirehafa momba iereo laha fa mitoboke ao antragno nareo, laha fa mindeha egne andala, laha fa miroro, na laha fa mifoha nareo. ²⁰ Ho soratanareo eo amity tolam-baravara ty tragnonareo vaho eo amity vavahady ty tana nareo zay, ²¹ mba hihamaro ty andronareo vaho ty andro reo ananareo agne amity tane ze nifanta Yaveh tamireo razambeinareo amea iereo laha mboe ambone ty tane kea ty lagnitse. ²² Fa laha miambe soa ty lily iaby ze handiliako anareo nareo, ka manao zay, hotea Yaveh Zagnaharenareo, hindeha amity lalane iaby, naho hipiteke Amine, ²³ le handroake reo firene iaby reo hiala eo agnoloa nareo Yaveh, naho nareo le handroake firene bey vaho mahere noho nareo. ²⁴ Ze toera lia ty tombonareo le ho anareo; zisikagne agnefetre ka hatragne Libanona, zisikagne amity renerano, ty renerano Eofrata, ka zisikagne amity riake ahandrefa le ho faritanenareo. ²⁵ Tsy hisy ndaty hahafitsanga eo agnoloa nareo. Yaveh Zagnaharenareo ro hanao ty tahotre anareo vaho ty horohoro anareo amity tane iaby ze liaenareo, arake ze le fa nirehafene taminareo. ²⁶ Ingo, atoboko eo agnoloanareo androany ty fitahia vaho ty ozo: ²⁷ ty fitahia, laha magnenke ty lily Yaveh Zagnaharenareo ze handiliako anareo androany nareo, ²⁸ naho ty ozo, laha tsy magnenke ty lily Yaveh Zagnaharenareo nareo, fa hivio amity lala ze handiliako anareo androany, ka hagnorike zagnahare hafa ze tsy mboe hainareo. ²⁹ Zay le hiseho, laha fa hinday anareo agne amity tane ze hombanareo mba ho fanagna Yaveh Zagnaharenareo, le hametrake ty fitahia agne ambohitse Gerizima nareo, naho ty ozo agne ambohitse Ebala. ³⁰ Tsy agne andafe Jordana vao reo, ahandrefa ty lala ahandrefa, agne amity tane ty Kananita ze mitoboke agne Araba, tandrife Gilgala, agnila ty hetae terebinta More? ³¹ Satria hitsake Jordana nareo hilitse hangalake ty tane ze amea Yaveh Zagnaharenareo anareo, naho ho fanagnanareo zay ka hitoboke ao nareo. ³² Ho ambenanareo ty lily aman-dala iaby ze apetrako eo agnoloanareo androany.