¹ Laha fa nitoboke tao antragnone ty mpanjaka, naho laha fa nagnomea fitofa aze tamireo fahavalone magnodidy aze iaby ty Yaveh, ² le hoe ty mpanjaka tamy Natana mpaminane hoe:" Ingo, mitoboke amity tragno sedera raho, fa ty tomabilen'Agnahare kea mijano ao agnivo ty tragno." ³ Le hoe Natana tamity mpanjaka hoe:" Mindehana, anovo ze ao amponao, fa hiomba anao Yaveh." ⁴ Kanefa tamio hale eo avao le niavy tamy Natana ty safa Yaveh, naho nanao ty hoe: ⁵ "Mindehana naho ambarao Davida mpanompoko ty hoe:' Ia ro ambara Yaveh: Hagnamboatre tragno hitoboha ho ahy vao riha? ⁶ Fa tsy nitoboke tao antragno Raho zisikamity andro ze nindaisako ty vahoake Israely niakatre bakao Egypta zisikamizao amdro amizao zao; fa kea, nifindrafindra tragno raho, le ty tabernakele. ⁷ Tagne amity toera iaby Ze nifindrako niarake tamity vahoake Israely iaby, feie nirehake na ino ino tamireo mpitarike Israely ze tinondroko hiambe ty Israely vahoakeko vao raho, nanao ty hoe:" Nagnino nareo ro tsy nagnamboatre tragno sedera ho ahy?"" ⁸ Ka amizao are, rehafo ty Davida mpanompoko ty hoe:" Zao ro ambara Yaveh tompo ty maro:' Nalaeko bakegne amity baibo riha, tamity fagnoriha reo agnondry, mba ho mpandily Israely vahoakeko riha. ⁹ Niarake taminao avao raho na taia aia nombanao. Nalaeko teo agnoloanao iaby ty fahavalonao iaby. Amizao hataoko foloay ty agnaranao, manahake ty agnara reo bey teto antane. ¹⁰ Hifily toera raike ho ahy Israely vahoakeko Raho naho hambole iereo agne, mba hivelo ao amity toera iereo arere iereo naho tsy ho voakoronta sase ty ndaty raty fagnahy, hoe ty natao iereo taloha, ¹¹ hoe ty natao iereo zisikamity andro nandiliako reo mpitsara mba handily Israely vahoakeko iaby. Amizao raho le hagnomea fitofa anao amireo fahavalonao. Fagnampe zay, Zaho, Yaveh le magnombara aminao fa hanao tragno ho anao raho. ¹² Laha fa tampetre ty andronao naho homate miarake amireo razambeinao riha, le hananga foko handimbe anao raho, ze ho bakamity vatanao, naho hampitoereko ty fanjakane. ¹³ Hagnamboatre tragno ho ahy ty agnarako re, naho hametrake ty sezan-droandria ty fanjakane zisikezay Raho. ¹⁴ Ho raene raho, naho re ho anako. Laha fa manonta re, le hagnanatre aze amity tsilan-ketae ty ndaty vaho amity famofoha ty ndaty raho. ¹⁵ Fa ty fatokiako le tsy hiala aze, laha nalaeko tamy Saoly zay, ty nafahako talohanao. ¹⁶ Ty tragnonao vaho ty fanjakanao le ho soa zisikezay eo agnoloanao. Hitoboke zisikezay ty sezan-droandrianao."' ¹⁷ Le nirehake tamy Davida ty Natana naho nitao tamine reo safa iaby reo, naho rinehane tamine ty miomba ty fahisaha iaby iaby. ¹⁸ Le nilitre Davida Mpanjaka naho nitoboke nagnoloa Yaveh ka nanao hoe:" Ia raho, ry Yaveh Zagnahare, naho ino ty fokoko ro nientenao ho amize fagniria zao raho? ¹⁹ Naho zaka kele eo amasonao zay, ry tompo Yaveh. Nirehake miomba ty foko ty mpanomponao ty amize foloay ho avy Riha, naho nanoro foko afara tamiko, ry Tompo Yaveh! ²⁰ Ino ro mboe azoko, zaho Davida, ambara aminao? Nagnomea hasy ty mpanomponao Riha, ry Tompo Yaveh. ²¹ Noho ty amity rehanao, vaho mba hahalefe ty fagnirianao arere, le nanao ze zaka-foloay zao Riha naho nanoro zay tamity mpanomponao. ²² Laha zao le foloay riha, ry tompo Yaveh, satria tsy misy mitovy aminao, naho tsy misy Zagnahare hafa tsy riha, arake ze rey ty sofinay avao. ²³ Ino ro firene hoe Israely vahoakenao, ty firene eto antane zay, nombanao Zagnahare vaho vinonjenao zao mba ho lasa vahoake ho anao iereo, mba hanao agnara ho ahy vatanao, naho mba hanao asa bey vaho mampitahotre ho ahy ty tanenao. Nandroake reo firene vaho reo zagnahare iereo teo agnoloa ty vahoakenao, ze vinonjenao bakao Egypta Riha. ²⁴ Natobonao hoe ty vahoakenao arere zisikezay Israely, naho Riha, Yaveh, le lasa Zagnahare iereo. ²⁵ Ka amizao, ry Yaveh Zagnahare, enga anie hatoboke zisikezay ty fampagnantegna ze nataonao mikasike ty mpanomponao vaho ty fokone. Anovo arake ze nirehafenao. ²⁶ Ho bey zisikezay anie ty agnaranao, ka hirehake ty vahoake hoe:' Yaveh tompo ty maro ro Zagnahare Israely,' laha atoboke agnoloanao, ty tragnoko, Davida mpanomponao. ²⁷ Satria Riha, Yaveh tompo ty maro, ty Zagnahare Israely, ro nagnambara tamity mpanomponao fa fagnore tragno ho aze Riha. Zay ro antone, nahisahako, zaho mpanomponao, harisiha hivavake Aminao. ²⁸ Amizao, ry Tompo Yaveh, le Zagnahare riha, naho soam-patokia ty rehanao, naho nanao io fampagnantegna soa ao tamity mpanomponao riha. ²⁹ Ka amizao are, ao hahafale Anao ty hitahy ty tragno ty mpanomponao, mba hitohy eo agnoloanao zisikezay zay. Satria Riha, ry Tompo Yaveh, ro nirehake reo zaka reo, naho tamity tso-dranonao ro nitahia zisikezay ty tragno ty mpanomponao."