¹ Naho Joaba anadahy Zeroia le nahay fa nagniry ty hahisake i Absaloma ty arofo ty mpanjaka. Laha zao le nandefa rehake ho ahy Tekoa ty Joaba naho ninday ampela mare tagne amine. Hoe re tamin-drampela hoe:" Mba mangatake rie anovo hoe ty mandala riha naho misikina akanjo fandala. Mba mangatake rie ko hosora diloilo ty vatanao, fa manova hoe ty ampela ze nandala ty mate le fa ela. ³ Bakeo le mindehana mbaeo amity mpanjaka naho rehafo amine ty miomba ze ho fariteko." Le nirehafe Joaba tamine reo rehake ze tokone ho rehafene amity mpanjaka. ⁴ Laha fa nirehake tamity mpanjaka ty ampela bakagne Tekoa, le nagnohoke ty tarehene tamity tane re naho nanao hoe:" Ampeo raho, ry mpanjaka." ⁵ Le hoe ty mpanjaka tamine hoe:" Ino ro hasahira?" Namale re hoe:" Ty mare le mpivem-bata raho, naho mate ty valiko." ⁶ Zaho, mpanomponao, le managnanake roe lahy, naho nialy tegne ambaibo iereo, ka tsy nisy nandrara iereo. Ty raike nagnisy ty raike ka namono aze. ⁷ Amizao le mitsangana mandietre ty mpanomponao ty foko iaby iaby, naho hoe iereo hoe:' Atoloro ty lahilahy ze nagnisy ty rahalahine, mba hamonoanay aze ho mate, mba handietre ty arofo ty rahalahine ze vinonone.' Ka le ho vonoe iereo kea ty mpandova. Le hoe zay kea ro hagnafaha iereo ty vaen'afo mirehetre ze nengako, naho tsy hamototre agnara na foko eto ambone ty tane ho ahy ty valiko iereo." ⁸ Ka le hoe ty mpanjaka tamin-drampela hoe:" Mindehana agne antragnonao, naho handily zaka hatao hoanao raho." ⁹ Le namale ty mpanjaka ty ampela Tekoa hoe:" Ry mpanjaka, tompoko, ao ho amiko vaho ho amity fokon-draeko ty heloke. Tsy manan-tsiny ty mpanjaka vaho ty sezan-droandriane." ¹⁰ Namale ty mpanjaka hoe:" Na ia ia mitalily zaka aminao, le ento amiko atoy re, naho tsy hikasike anao sase re." ¹¹ Le hoe re ty hoe:" Mba mangatake rie, ao ty mpanjaka hahatiaro Yaveh Zagnaharenao, ka tsy hamoteke na ia ia vatane ty mpamale lio, mba tsy hamoteha iereo ty anadahiko." Le namale ty mpanjaka hoe:" Laha mboe velo kea Yaveh, le tsy hisy na le tsilam-bolo raike amity anagnao aza hihintsa amity tane." ¹² Le hoe rampela hoe:" Mba mangatake rie engao ty mpanomponao mba hitalily rehake fagnampene amity tompoko ty mpanjaka." Le hoe re ty hoe:" Mirehafa." ¹³ Le hoe rampela hoe:" Ka nagnino are riha ro midineke zaka hoe zay amity vahoaken'Agnahare? Fa amity firehafa ze zaka zay, le hoe ty ndaty ze meloke ty mpanjaka, satria tsy mboe nampoly ndarike ty anadahine voaroake ty mpanjaka. ¹⁴ Fa tsy maintsy ho mate tika iaby, naho hoe ty rano aily amity tane tika, te tsy afake raofe sase. Fa Zagnahare tsy hangalake ty arofo; fa kea, mahisake lala ho ahy reo ze voaroake Re mba hahere ndraike. ¹⁵ Ka amizao are, niavy hirehake ze zaka zay amity mpanjaka tompoko raho, zay le satria nampitahotre ahy ty vahoake. Ka nanao tamity vatane ty mpanomponao hoe:' Hirehake amity mpanjaka raho zao. Asa hanao ty hata ty mpanompone ty mpanjaka. ¹⁶ Satria hidranjy ahy ty mpanjaka, mba hanolora ty mpanompone ho afake amity tagna ty lahilahy ze hamoteke ahy vaho ty anadahiko, ho afake amity lovan'Agnahare.' ¹⁷ Bakeo le nivavake ty mpanomponao hoe:" Ry Yaveh, ao hagnamaiva ahy ty reha ty mpanjaka tompoko, satria hoe ty anjelen'Agnahare, le hoe zay kea ty mpanjaka tompoko amity firehafa ty soa bakamity raty.' Hiomba anao anie Yaveh Zagnaharenao." ¹⁸ Bakeo le namale ty mpanjaka ka nirehake tamin-drampela hoe:" Mba mangatake rie ko ahaja amiko iaby ze hagnontaneako anao." Le namale rampela hoe:" Ao hirehake ty mpanjaka tompoko amizao." ¹⁹ Le hoe ty mpanjaka hoe:" Feie vao tsy miarake aminao amiaby iaby zao ty tagna Joaba?" Le namale rampela ka nanao hoe:" Laha mboe velo kea riha, ry mpanjaka tompoko, le tsy misy afake milay mbaeo ankavana na ankavia amity zaka iaby ze nirehafe ty mpanjaka tompoko. I Joaba mpanomponao ro nandily ahy vaho nirehake tamiko mba hitalily reo zaka ze nirehafe ty mpanomponao reo. ²⁰ Le fa nanao zay ty Joaba mpanomponao mba hagnova ty zaka-misy. Mare ty tompoko, hoe ty hamarea ty anjelen'Agnahare, naho haine ty zaka iaby ze miseho eo amity tane." ²¹ Le hoe ty mpanjaka tamy Joaba hoe:" Ingo are, hanao ze zaka zay raho. Mindehana, naho ento mihere ty ajalahy Absaloma." ²² Laha zao Joaba le nagnohoke ty tarehene tamity tane ho hasy vaho fisaora ty mpanjaka. Hoe Joaba hoe:" Amizao le hay ty mpanomponao fa nahisake saotre teo amasonao raho, ry mpanjaka tompoko, amity fagnanoa ty mpanjaka ty hata ty mpanompone." ²³ Le nitsanga ty Joaba, ka nimbaeo Gesora, naho ninday i Absaloma nihere tagne Jerosalema. ²⁴ Hoe ty mpanjaka hoe:" Ao re hihere agne antragnone, fa ko atao mahisake ty tareheko." Laha zao le nihere tagne antragnone arere ty Absaloma, fa tsy nahisake ty tarehe ty mpanjaka. ²⁵ Naho nagnera Israely le tsy nisy ndaty nilazao tamity hasoan-tarehe mandako noho i Absaloma. Bakagne antombone ka zisikagne antampon-dohane le tsy nisy havoa tagne amine. ²⁶ Laha fa mandily ty volon-dohane re isake ty fara ty tao, satria navesatre tamine zay, le nientene ty volone; milanja eo amity roanjato sekele eo Zay, ty lanjae amity fandanja ty mpanjaka. ²⁷ Absaloma le niterake telo lahy vaho raike ampela, Tamara ro agnarane. Ampela soa tarehe re. ²⁸ Nitoboke roe tao feno tao Jerosalema Absaloma, fa tsy nahisake ty tarehe ty mpanjaka. ²⁹ Bakeo Absaloma le nandefa rehake ho ahy Joaba mba handefa aze agne amity mpanjaka, feie tsy niavy tagne amine ty Joaba. Le nandefa rehake fagnindroene ty Absaloma, kanefa tsy mboe niavy avao ty Joaba. ³⁰ Le hoe Absaloma tamireo mpanompone hoe:" Ingo, eo agnila ty ahy ty tanem-bare Joaba, naho mana vare hordea ao re. Mindehana naho oro zay." Ka noroa reo mpanompo Absaloma ty tanembare. ³¹ Bakeo le nitsanga Joaba naho nimbaeo amy Absaloma tagne antragnone, ka nanao tamine hoe:" Nagnino ro noroa reo mpanomponao ty tanembareko?" ³² Le namale Joaba ty Absaloma hoe:" Ingo, nandefa rehake taminao raho nanao hoe:' Miavia amiko atoy mba hahafahako magnirake anao ho agne amity mpanjaka mba hitalily hoe:" Nagnino raho ro niala tagne Gesora? Soa kea ho ahy ty mboe mijano agne. Laha zao are le ao raho hagnente ty tarehe ty mpanjaka, ka laha meloke raho, le ao re hamono ahy.""' ³³ Le lasa nimbaeo amity mpanjaka ty Joaba naho nirehake tamine. Laha fa nampikaike i Absaloma ty mpanjaka, le namonje ty mpanjaka re naho nihohoke ambane teo amity tane nagnoloa ty mpanjaka, naho norofane ty mpanjaka i Absaloma.