¹ Tamy afake ty roa-polo tao, zisike ty nagnamboara Solomona ty tragno Yaveh vaho ty tragnone arere, ² Le namboare Solomona ndarike reo tana ze namea Hirama aze, naho natobone tao ty vahoake Israely. ³ Nanafike i Hamata-zoba ty Solomona naho nandrese zay. ⁴ Naho re nananga i Tadmora tagne agnefetre, vaho reo tana famoria iaby, ze naorene tao Hamata. ⁵ Nananga i Beti-horona Ambone, vaho Beti-horona Ambane, tana voa aro amity manda, baho vavahady, naho fefe vy avao kea re. ⁶ Nananga i Baleta vaho reo tana famoria iaby ze nanagnane re, vaho ty tana iaby ho ahy reo kalesene vaho ty tana ho ahy reo mpitiki-tsoavalene, vaho iaby ze niriene hatsanga arake ze teane tao Jerosalema, tao Libanona, vaho tao amireo tane iaby ambane fehene. ⁷ Naho reo ndaty iaby ze sisa tavela bakamity Hetita, ty Amorita, ty Perizita, ty Hivita, vaho ty Jebosita, ze tsy ahy Israely, ⁸ reo fokone sisa tavela tafara iereo tagne amity tane, ze tsy rinava ty vahoake Israely__le natao Solomona mpiasa an-tseresere, zay iereo zisikezao. ⁹ Na zay aza, tsy natao Solomona ho mpiasa an-tseresere ty vahoake Israely. Fa kea, lasa miaramilane, vaho mpifehene, manam-pahefane, naho mpifehe ty tafike ty kalesene vaho ty mpitiki-tsoavalene iereo. ¹⁰ Reo avao kea ro manam-pahefa bey mpamoteke reo mpagnorimaso ze ahy Solomona Mpanjaka, 250 tamiereo, ro nagnaramaso ty vahoake ze nanao ty asa. ¹¹ Niente Solomona niakatre ty tana Davida ho agne amity tragno ze namboarene ho aze ty akampela Farao, fa hoe re hoe:" Tsy mahazo mitoboke ao antragno Davida mpanjaka Israely ty valiko, satria na ia ia nihavia ty tomabile Yaveh le masy." ¹² Bakeo Solomona nanolotre fagnatetre oroa ho ahy Yaveh teo amity alitarane ze naorene teo agnoloa ty lavaranga. ¹³ Nanolotre soro arake ze tinake ty fatao isan'andro re; nanolotre reo re, nagnorike reo torolala hisake tagnate ty lily Mosesy, tamity andro Sabata, ty vola vaovao, vaho tamity andro fifalea voamare in-telo isan-tao: le ty andro fifalea amity Mofo tsy misy masirasira, ty Heregnandro Fifalea, naho ty andro fifalea ty fialofa. ¹⁴ Tamim-piambena reo lily Davida raene, ro nanondroa Solomona reo mpisoro ho amity asane, naho reo Levita ho amity fitobohane, mba hiantsa an'Agnahare vaho hanompo eo agnoloa reo mpisoro, arake ze take ty fatao isan'andro. Naho nanendre reo mpiambe vavahady tamity fizarane isake ty vavahady iaby avao kea re, fa zay ro le fa nandilia Davida ty lahilahin'Agnahare. ¹⁵ Naho reo vahoake reo le tsy mba nivio tamireo lily ty mpanjaka tamireo mpisoro vaho reo Levita na tamitino ino, na mikasike reo tragno famoria. ¹⁶ Reo asa iaby nampanove Solomona le vita iaby, hatramity andro nagnoregna ty fagnambane ty tragno Yaveh ka zisike ty nivita zay. Vita ty tragno Yaveh. ¹⁷ Bakeo Solomona nimbaeo Ezion-gebera vaho Elota, tegne amoron-driake ty tane Edoma. ¹⁸ Naho nandefasa Hirama sambo niente reo manan-kasy ze tantsambo nana fahaia re. Niantsambo niarake tamireo mpanompo Solomona ho agne Ofira iereo. Nangalake talenta volamena 450 bakagne iereo ze nientene tagne amy Solomona Mpanjaka.