¹ Nimate tagne amireo razanbeine ty Josafata naho naleve niarake tamiereo tao amity tana Davida; Jehorama, anadahine, ro lassa mpanjaka nisolo ty toerane. ² Nana rahalahy ty Jehorama, ana i Josafata: le Azaria, Jehiela, Zakaria, Azaria, Mikaela, naho Sefatia. Anadahy Josafata, mpanjaka Israely iaby reo. ³ Nanolotre fagnomea volafoty, volamena, naho zaka-lafo vily hafa maro le maro, naho tana manada tagne Joda ho ahy iereo avao kea ty raene, feie nameana i Jehorama ty sezan-droandria, satria re ro anadahy voalohane. 4Naho nitsanga teo amity fanjakan-draene ty Jehorama ka nametrake mafe ty vatane ho mpanjaka, le vinonone tamity meso reo rahalahine iaby, vaho reo mpitarike Israely sambe hafa avao kea. ⁵ Roe amby telopolo tao ty Jehorama laha nanomboke nanjaka, naho nanjaka zisike ty valo tao tamy Jerosalema re. ⁶ Nindeha tamity lala reo mpanjaka Israely re, manahake ty natao ty foko Ahaba, fa ty anakampela Ahaba ro valine, naho nanao ze raty teo amaso Yaveh re. ⁷ Kanefa, tsy nagniry ty handrava ty foko Davida Yaveh, noho ty amity fagnenkea ze nataone tamy Davida; le fa nampagnantegna ty hagnomea havelo ho aze vaho reo fokone zisikagne re. ⁸ Tamity andro i Jehorama, le navande hiala tamity fifehea Joda Edoma, ka nametrake mpanjaka ho eo amiereo. ⁹ Le nitsake niarake tamireo mpifehene vaho reo kalesene iaby ty Jehorama. Andro hale ro nindenane vaho nialiane tamireo Edomita ze nagnodidy aze vaho mpifehe ty kalesene. ¹⁰ Ka le fa navande tamity fifehea Joda zisikezao ty Edoma. Navande hiala tamity fifeheane niarake tamizay avao kea Libna, satria Jehorama le fa nahafoe Yaveh, Zagnahare reo razambeine. ¹¹ Fagnampe zay, le nagnore fitoboha agnabo tagne amireo vohitse Joda avao kea ty Jehorama, ka namelo ty vahoake Jerosalema manahake ty mpivaro-bata, naho ninday i Joda hiotake. ¹² Nisy taratasy bakamy Elia mpaminane niavy tagne amy Jehorama. Zao ro nambara zay:" Zao ro safa Yaveh, ty Zagnahare Davida, razambeinao: Satria tsy nindeha tamity lala Josafata, raenao riha, na tamireo lala Asa, mpanjaka Joda, ¹³ fa le fa nindeha tamity lala reo mpanjaka Israely kea, naho nahavy i Joda vaho reo vahoake Jerosalema hiseho hoe ty mpivaro-bata, manahake ty natao ty foko Ahaba__naho satria le fa vinononao tamity meso avao kea reo rahalahinao tao amity fokon-draenao, le reo lahilahy soa noho ty vatanao ¹⁴ ingo, Yaveh hagnisy anao, reo anako, vaho reo valinao, naho ty hareanao iaby amity arete-manadany foloay. ¹⁵ Riha vatane ro harare mafe noho ty arete ao amity tsinainao, zisike ty hahavoa ty tsinainao noho ty arete, isan'andro sanandro." ¹⁶ Le nanao ty fagnahy reo Filistina vaho reo Arabo ze narine reo Etiopiana handietre i Jehorama Yaveh. ¹⁷ Nagnisy i Joda iereo, nanafike zay, naho nangalake reo harea iaby ze hisake tao antragno ty mpanjaka. Nalae iereo avao kea reo anadahine vaho valine. Tsy nisy anadahy sisa ho aze laha tsy Jehoaza, anane-faralahy. ¹⁸ Tafara ze iaby zay, le nagnisy aze tao amity tsinaine tamity arete tsy hay afahe ty Yaveh. ¹⁹ Naho tamity andro voatondro, afake roe tao, le lavo ty arete ty tsinaine, naho mate noho ty arete magnirifiry re. Tsy nandrehetre afo ho hasine arake ty natao iereo ho ahy ty razambeine ty vahoakene. ²⁰ Nanomboke nanjaka re tamity faharoe amby telopolo taone; nanjaka tao Jerosalema zisike ty valo tao re, naho mate tsy nisy mpitagny. Naleve iereo tao amity tana Davida re, fa tsy tao amity kibory ty mpanjaka.