¹ Tamity fahene amby telopolo tao nanjaka Asa, i Basa, mpanjaka Israely, le nanoro rehareha nandietre Joda naho nananga i Rama, mba tsy hagnengane ania ia hiala na hilitre ao amity tane i Asa, mpanjaka Joda. ² Le ninday ty volafoty vaho volamena niakatre ty efetragno famoria tao amity tragno Yaveh vaho ty tragno ty mpanjaka ty Asa, naho nandefa zay tagne amy Beni-hadada mpanjaka Syria, ze nitoboke tagne Damaskosy. Hoe re hoe: ³ "Ao hisy fifagnenkea amiko eo vaho aminao, hoe ty nisia zay teo amity raeko vaho ty raenao. Ingo, nandefa volafoty vaho volamena taminao raho. Ravao ty fifagnekea nao amy Basa, mpanjaka Israely, mba hahafahane magnenga ahy arere." ⁴ Nidranjy i Asa Mpanjaka Beni-adada ka nandefa reo mpifehe ty tafine handietre reo tana Israely. Nanafike i Iona, Dana, Abela-maima, naho reo tana famoria Naftaly iaby iereo. ⁵ Naho laha fa naharey zay ty Basa, le najanone ty fanangana i Rama, naho nampidrano ty asane. ⁶ Naho nalae Asa Mpanjaka niarake tamine ty Joda iaby. Niente iereo ty vato vaho reo hetae Rama ze nanangana Basa ty tana. Le nampiasae Asa nagnoregna i Geba Mizpa ze zaka fanangana zay. ⁷ Tmize andro zay ty Hanany mpahisake nimbaeo amy Asa, mpanjaka i Joda, ka nanao tamine hoe:" Satria riha nita tamity mpanjaka Syria, fa tsy nita tamy Yaveh Zagnaharenao, le nilay bakeo antagnanao ty tafike ty mpanjaka Syria. ⁸ Feie vao reo Etiopiana vaho reo Lobita tsy tafike bey, miarake amity kalese vaho mpitiki-tsoavale vatane lako? Kanefa, satria nita tamy Yaveh, le nagnomea anao ty faharesea teo amiereo Re. ⁹ Fa ty maso Yaveh le mindeha egne iaby egne magnera ty tane iaby, mba hahafahane maneho ty vatane ho mahere ho ahy reo ze mana fo soa magnoloa Aze. Fa nanao andala tamize zaka zay riha. Ka manomboke eto, le hana aly riha." ¹⁰ Naho le meloke tamity mpahisake ty Asa; ginadrane re, satria meloke tamine noho ze zaka zay re. Tamize andro zay avao, le nampijale ty ilane tamireo vahoake ty Asa. ¹¹ Ingo, reo asa i Asa, zisikamity voalohane hatramity farane, le ingo, le fa voasoratre ao amity boke reo mpanjaka Joda vaho Israely reo. ¹² Tamity fahasive amby telopolo tao nanjakane, le narare ty tombo Asa; nahere vatane ty aretene. Na zay aza anefa, le tsy nipay fagnampea bakamy Yaveh re, fa tamireo mpitsabo avao. ¹³ Nimate tagne amireo razambeine ty Asa; mate tamity faha raike amby efapolo tao nanjakane re. ¹⁴ Naleve iereo tao amity kibory avao re, ze hinaline hoaze tao amity tana Davida. Nampiroroe iereo teo ambone fandrea feno imbo magnitre vaho karazan-draka-magnitre nomane reo mpahay zaka-magnitre re. Naho nanao afo bey iereo mba ho hasy hoaze.