¹ Nimate tagne amireo razambeine Abia, naho naleve iereo tao amity tana Davida re. ² Asa, anadahine, Tamity androne le nitsy zisike ty folo tao ty tane. Nanao ze soa vaho mare teo amaso Yaveh Zagnaharene ty Asa, ³ satria nafahane reo alitara vahiny vaho reo fitoera agnabo. Rinavane reo ambem-bato naho tinampane reo baon'Aseraha. ⁴ Nandily Joda re mba hipay Yaveh, ty Zagnahare ty razambey iereo, vaho handefe reo lily aman-dala. ⁵ Nafahane avao kea reo fitoera agnabo vaho reo alitara ty liten-ketae magnitre bakamireo tana Joda iaby. Nijano teo ambanene ty fanjaka. ⁶ Nananga tana manda tagne Joda re, satria nilamy ty tagne, naho tsy nisy aly re tamireo tao reo, satria nagnomea fiadagna aze Yaveh. ⁷ Fa i Asa nanao tamy Joda hoe:" Ao tika hagnore reo tana reo naho hagnisy manda magnodidy iereo, vaho tilikambo, vavahady, naho hiline lavalava; mboe antika ty tane satria le fa nipay Yaveh Zagnaharentika tika. Le fa nipay aze tika, naho nagnomea filamina antika tamity lafine iaby re." Ka le nagnore iereo naho nimete. ⁸ Nana tafike raike ze nita apinga vaho lefo ty Asa; bakamy Joda le nana lahilahy 300 000 re, naho bakamy Benjamina, lahilahy 280 000 ze nita apinga vaho folese. Nimafe reo iaby reo, lahilahy bey herem-po. ⁹ Naho Zera ty Etiopiana niavy nandietre iereo niarake tamity tafike miaramila ray-tapetrisa vaho kalese telon-jato; niavy tagne Maresa re. ¹⁰ Le niakatre hanalaka aze ty Asa, naho nandamy ty laharan'aly tagne ambaibo Zefata tagne Maresa iereo. ¹¹ Nangatake tamy Yaveh Zagnaharene Asa, naho nanao hoe:" Ry Yaveh, tsy misy laha tsy riha ro hagnampe ze tsy manan-kere laha fa miatreke zaka maro re. Ampeo zahay, ry Yaveh Zagnaharenay, naho amity Agnaranao ro hiavianay handietre reo maro bey reo. Ry Yaveh, riha ro Zagnaharenay; ko enga ho rese ty ndaty Riha." ¹² Ka le namofoke reo Etiopiana teo agnoloa Asa vaho Joda Yaveh; ka nilay reo Etiopiana. ¹³ Nagnia iereo zisikagne Jerara ty Asa vaho reo miaramila niarake tamine. Laha zao le Etiopiana maro ro lavo ka tsy afake narova iereo, satria rava vatane teo agnoloa Yaveh vaho ty tafine iereo. Ninday babo maro bey ty tafike. ¹⁴ Rinava ty tafike reo tana iaby nagnodidy i Jerara, satria niavy tamireo vahoake ty horohoro Yaveh. Nalae ty tafike reo tana iaby, ka nisy babo maro tao amiereo. ¹⁵ Rinava reo tafike avao kea reo fitoeran-tragno reo mpiambe mpifindra toera; ninday agnondry maro, vaho rameva iereo, naho bakeo nihere tagne Jerosalema.