¹ Nimbaeo Sekema ty Rehoboama, satria niavy tagne Sekema mba hanao aze ho mpanjaka ty Israely iaby. ² Naho rey Jeroboama anadahy Nebata zay (satria tagne Egypta re, tagne amize le fa nilaisane hiala teo amity fagnatreha Solomona Mpanjaka, nefa lefa nihere bakagne Egypta ty Jeroboama). ³ Ka nandefa vaho nampikaike aze iereo, naho niavy Jeroboama vaho ty Israely iaby; niarake tamy Rehoboama iereo ka nanao ty hoe: ⁴ "Nagnasarotre ty ziogane ty raenao. Ka amizao, hamorao ty asa mafe ty raenao. naho hamaivagno ty zioga mavesatre ze natobone teto aminay, le hanompo anao zahay." ⁵ Hoe Rehoboama tamiereo hoe:" Miheregna amiko eto afake telo andro." Ka le lasa reo vahoake. ⁶ Nangalake hevetre tagne amireo raoke ze nitsanga teo agnoloa Solomona raene tamy fahavelo i Rehoboama mpanjaka; hoe re hoe:" Nagnino ro hanoroanareo hevetre ahy mba hindaisako valen-drehake eo amireo vahoake reo?" ⁷ Nirehake tamiereo ka nanao ty hoe:" Laha soa amireo vahoake reo riha naho teane reo, naho mirehake soa amiereo, le ho mpanomponao zisikagne iereo." ⁸ Kanefa tsy nahoa Rehoboama ty torohevetre ze namea reo raoke aze, naho nangalake hevetre tagne amireo ajalahy ze niraike-bey tamine re, ze nitsanga teo agnoloane. ⁹ Hoe re tamiereo hoe:" Ino ro torohevetre hameanareo ahy, mba hahafahantika mamale ty vahoake ze nirehake tamiko ka nanao ty hoe:' Haivagno ty zioga ze natobo ty raenao taminay'?" ¹⁰ Reo ajalahy niara-bey tamy Rehoboama nirehake tamine, nanao hoe:" Hoe zao ro tokone havalenao reo vahoake ze nirehake taminao fa Solomona raenao le namesatre ty zioga iereo, ka tokone haivagnenao zay. Zao ro tokone ho rehafenao amiereo:'Ty anakikiko le mateve noho ty andilan-draeko. ¹¹ Ka amizao, na le nivesare ty raeko tamity zioga mavesatre aza nareo, le mboe hagnampe ty zioganareo raho. Ty raeko nanaze anareo tamireo karavasy, fa zaho hanazy anareo amireo maingoke."' ¹² Ka le nindeha nimbaeo amy Rehoboama ty Jeroboama vaho ty vahoake iaby tamity andro fahatelo, arake ty nirehafe ty mpanjaka hoe:" Mihereha amiko atoy amity andro fahatelo." ¹³ Nirehake mafe iereo ty Rehoboama, tsy niraharaha ty torohevetrireo raoke. ¹⁴ Nirehake tamiereo arake ty toroheve reo ajalahy re, nanao hoe:" Namesatre ty zioganareo ty raeko, fa zaho hagnampe zay. Ty raeko nagnasazy anareo tamity karavasy, fa zaho hagnasazy anareo amity mengoke." ¹⁵ Laha zao le tsy nidranogne ty mpanjaka ty vahoake, fa zay le fagnova tamireo zaka nienten'Agnahare, mba hahafaha Yaveh mandefe ty rehane ze nirehafe Ahia Silonita tamy Jeroboama anadahy Nebata. ¹⁶ Laha fa hisa Israely iaby fa tsy nidranjy iereo ty mpanjaka, le namale aze ty vahoake ka nanao ty hoe:" Ino ro anjaranay amy Davida? Tsy mana lova ao amity anadahy Jese zahay! Ty kirai-kiraike aminareo le tokone hihere agne antragnone iaby, ry Israely. Naho henteo ty tragnonao, ry Davida." Ka le nihere ho agne antragnone iaby ty Israely iaby. ¹⁷ Te laha ty amireo ndaty nitoboke tagne amireo tana Joda, le Rehoboama ro nanjaka teo amiereo. ¹⁸ Naho rehoboama Mpanjaka nandefa i Adorama, ze nandily teo amireo mpanao asa an-tseresere, nefa ty vahoake Israely nitora-bato aze ho mate. Naho nilay malaky tamity kalesene ho agne Jerosalema ty Rehoboama mpanjaka. ¹⁹ Laha zao le tao agnate ty vande nandietre ty foko Davida ty Israely zisikandroany.