¹ Naho niala tagne Davida ka nilay tao andava-bato Adolama. Laha naharey zay reo rahalahine vaho ty fokon-draene iaby, le nizotro tagne amine iereo. ² Ty ndaty iaby ze tao agnate fijalea, ty ndaty iaby ze tao agnate trosa, naho ty ndaty iaby ze tsy fale__iereo iaby le nivory tamine ao. Lasa kapitene ty mpiambe teo amiereo ty Davida. Nisy teo amity efa-jato lahy teo ro niarake tamine. ³ Naho niala teo ho agne Mizpa ao Moaba ty Davida. Hoe re tamity mpanjaka Moaba ty hoe:" Mba mangatake rie ao ty raeko vaho ty reneko hiakatre hiarake aminao mandram-pahaiako ze hataon'Agnahare ho ahy." ⁴ Nengane niarake tamity mpanjaka Moaba iereo. Ty raene vaho renene nitoboke niarake tamine tamity andro iaby naha-tao amity fiarovane mafe i Davida. ⁵ Naho Gada mpaminane nirehake tamy Davida ty hoe:" Ko mijano ao amity fiarovanao mafe. Mindeha naho mindehana agne amity tane Joda." Ka le niala tao Davida naho nindeha tao amity ala i Hareta. ⁶ Rey Saoly fa hisake niarake tamireo lahilahy ze niarake tamine ty Davida. Naho nitoboke tagne Gibea tambane ty hetae tamariska tao Rama ty Saoly, niarake tamity lefone tegne antagnane, naho ty mpanompone iaby nitsanga nagnodidy aze. ⁷ Hoe ty Saoly tamireo mpanompo nitsanga magnodidy aze:" Njanogno zao, ry vahoake Benjamina, feie vao hagnomea baibo vaho tanem-boaloboke ho ahy ty kirai-kiraike bakaminareo ty anadahy Jese? Feie vao hanao anareo iaby ho kapitene ty tafike agnarivone vaho anjatone re, ⁸ ho takalo ty dinegnareo iaby handietre ahy? Tsy nisy taminareo nampahay ahy laha fa nanao fagnenkea tamity anadahy Jese ty anadahiko. Tsy nisy taminareo niferegnay ahy. Tsy nisy taminareo nampahay ahy fa ty anadahiko le nandrisike Davida mpanompoko handietre ahy. Androany le mihaja vaho mandy ahy re naho mete hanafike ahy." ⁹ Naho Doega Edomita, ze nitsanga teo amireo mpanompo Saoly, namale hoe:" Hisako nimbaeo Noba ty anadahy Jese, tao amy Ahimeleka anadahy Ahitoba. ¹⁰ Nivavake tamy Yaveh re mba hagnampeane aze, naho nameane aze ty vatse vaho ty meso Goliata Filistina." ¹¹ Naho ty mpanjaka nagnirake ndaty mba hikaike i Ahimeleka mpisoro anadahy Ahitoba vaho ty fokon-draene iaby, reo mpisoro ze tao Noba. Ie iaby reo le niavy teo amity mpanjaka. ¹² Hoe ty Saoly:" Njanogno are, ry anadahy Ahitoba." Le namale re hoe:" Intoy raho, tompoko." ¹³ Naho hoe ty Saoly tamine:" Nagnino riha ro nidineke handietre ahy, riha vaho ty anadahy Jese, tamity nagnomezanao aze mofo, vaho meso, naho nivavake tamin'Agnahare mba hagnampeane aze, mba hitsanganane handietre ahy, mba hihaja agne amity tako, hoe ze nataone androany zao?" ¹⁴ Naho Ahimeleka namale ty mpanjaka ka nanao ty hoe:" Ia tamireo mpanomponao iaby feie ro matoky vatane manahake i Davida, vinanto lahy ty mpanjaka ro sady mpiambe anao avao kea, naho amean-kasy antragnonao ao? ¹⁵ Androany asa ty andro voalohane nivavahako tamin'Agnahare mba hagnampeane aze? Sagnatria amiko anie zay! Ko mamototre ty mpanjaka hagnisy na ino ino amity mpanompone na amity fokon-draeko iaby. Fa ty mpanomponao le tsy mahay na ino ino ty amize raraha iaby zao." ¹⁶ Namale ty mpanjaka ty hoe:" Tsy maintsy ho mate vatane riha, ry Ahimeleka, riha vaho ty fokon-draenao iaby." ¹⁷ Le nirehake tamity mpiambe nitsanga nagnodidy aze ty mpanjaka nanao ty hoe:" Mitoliha naho vono reo mpisoro Yaveh. Satria ty tagna iereo avao kea le miarake amy Davida, naho satria nahay iereo fa nilay re, kanefa tsy nagnambara zay tamiko. Fa reo mpanompo ty mpanjaka nefa le tsy te-hamototre ty tagnane hamono reo mpisoro Yaveh. ¹⁸ Naho nirehake tamy Doega ty mpanjaka ty hoe:" Mitoliha naho vono reo mpisoro. Le nitolike vaho nagnisy reo mpisoro ty Doega Edomita; namono ndaty lime amby valompolo ze niakanjo efoda rongone foty tamize andro zay re. ¹⁹ Tamity lela-meso, ro nanafihane i Noba, tana reo mpisoro, na lahilahy na ampela, kolo na aja, naho reo agnombe vaho reo ampondra naho agnondry. Namono aze iaby tamity lela-meso re. ²⁰ Fa raike tamireo anadahy Ahimeleke anadahy Ahitoba, natao ty hoe Abiatara, nilay naho nagnorike i Davida. ²¹ Naho Abiatara nirehake tamy Davida fa vinono Saoly reo mpisoro Yaveh. ²² Hoe ty Davida tamy Abiatara:" Haiko tamigne andro igne, fa laha tao Doeaga Edomita, le tsy maintsy nirehake tamy Saoly re. Zaho ro tompon'asa tamity fate iaby tamity fokon-draenao! ²³ Mijanogna miarake amiko naho ko matahotre. Fa ty ndaty ze mifofo ty arofonao le mifofo ty ahy avao kea. Ho voaaro riha miarake amiko."