¹ Naho Davida nilay bakagne Naiota agne Rama ka nimbaeo amy Jonatana naho nanao ty hoe:" Fa ino ro nataoko? Ino ro heloko? Ino ro hadisoako teo agnoloa ty raenao, ro mipay hifofo ty arofoko re" ² Jonatana nanao tamy Davida ty hoe:" Sagnatria anie zay; tsy ho mate riha. Tsy manao zaka na foloay na kele ka tsy mirehake zay amiko ty raeko. Nagnino ro tokone hagnaja ze zaka zay amiko ty raeko? Tsy zay akore." ³ Naho nanao vava ndraike Davida ka nanao ty hoe:" Hay ty raenao soa fa nahisake saotre teo amasonao raho. Le fa nirehake re ty hoe:' Ko enga ho hay Jonatana zao, laha tsy zay le halahelo re.' Nefa laha velo mare ty Yaveh, naho laha mboe velo kea riha, le kele avao ty halava eo amiko vaho ty fate." ⁴ Naho hoe Jonatana tamy Davida:" Na ino ino rehafenao, le hataoko ho anao." ⁵ Hoe Davida tamy Jonatana:" Hamaray ty voaloham-bola, ka tokone hitoboke hiara-hihina amity mpanjaka raho. Nefa engao raho hindeha, mba hihaja agne ambaibo zisikamity hariva ty andro fahatelo. ⁶ Laha mahatiaro ahy ty raenao, le anovo ty hoe:' Nanao fiera mafe tamiko Davida mba hamonje i Betlehema tanane; satria le fa marine ty soro isan-tao ho ahy ty foko iaby agne.' ⁷ Laha hoe re ty hoe:' Soa zay,' le hanam-piadagna ty mpanomponao. Fa laha meloke mafe re, le dineho fa nanapan-kevetre hanao raty re. ⁸ Laha zao le mifagnaraha soa amity mpanomponao. Fa le fa ninday ty mpanomponao ho amity fagnenkea Yaveh niarake taminao riha. Nefa laha misy hadisoa amiko, le riha ro hamono ahy; ka nagnino raho ro entenao agne amity raenao?" ⁹ Hoe ty Jonatana:" Sagnatria aminao anie zay! Laha nahay raho fa nanapan-kevetre ty hanao raty anao ty raeko, le tsy hirehake aminao vao raho?" ¹⁰ Le hoe Davida tamy Jonatana:" Ia ro hirehake amiko laha sagnatria mamale anao amity rehake mafe ty raenao?" ¹¹ Jonatana nanao tamy Davida hoe:" Andao, hindeha tika hiakatre agne ambaibo." Ka niakatre tagne ambaibo iereo roe lahy. ¹² Hoe Jonatana tamy Davida:" Yaveh, Zagnahare Israely anie ro ho vavolombelo. Laha fa baka magnontane andraeko raho tehamaray amize lera zao, na amity andro fahatelo, henteo, laha misy zaka-soa ho ahy Davida, feie tsy hagnirake ho agne aminao vaho hampahay anao vao raho? ¹³ Laha mahafale andraeko ty hanao raty anao, Yaveh anie hanao zay amy Jonatana naho mihoatre aza laha tsy mapahay zay aminao vaho mandefa anao raho, mba hindehananao ampilamina. Hiomba anao anie Yaveh, manahake ty le fa niombane ty raeko. ¹⁴ Fa laha mboe velo kea raho, feie tsy hanoro ahy ty tsy fivaliham-pagnenkea Yaveh vao riha, mba tsy ho mate raho? ¹⁵ Ko mandily ty tsy fivaliham-pagnenkeanao hiala amity fokoko zisikezay__ne le foagna Yaveh eo amity tane aza ty fahavalo Davida iaby." ¹⁶ Naho Jonatana nanao fagnenkea tamity foko Davida ka nanao ty hoe:" Yaveh anie hitake ty onetre eo amity tagna reo fahavalo Davida." ¹⁷ Nampanao vava Davida ndraike ty Jonatana noho ty hateane aze, satria tea aze manahake ty fiteane ty fagnahine avao re. ¹⁸ Le hoe Jonatana tamine:" Hamaray ty voaloham-bola. Ho tiarove riha satria foa ty sezanao. ¹⁹ Laha fa nijano telo andro riha, le mizotroa malaky naho mindeha agne amity toera ze nihajanao laha fa teo antagna ty raraha, naho mandignasa eo agnila ty vatolampy Ezela. ²⁰ Handefa folose telo eo agnila zay raho, hoe ty mitifitre zaka kendre. ²¹ Naho hagnirake ty ajalahiko raho ka hirehake amine ty hoe:' Andao paio reo folese.' Laha mirehake amity ajalahy raho hoe:' Ingo, io agnilanao o reo folese; alao reo," le miavia; fa hisy fiaro naho tsy hisy raty ho anao, laha mboe velo kea Yaveh. ²² "Nefa laha mirehake amity ajalahy raho ty hoe:' Ingo, ao afaranao reo folese,' le mindehana amity lalanao, fa le fa nandefa anao ty Yaveh. ²³ Laha ty amity fifagnaraha ze nifanaovantika, ingo, eo agnivontika zisikezay Yaveh."' ²⁴ Ka nihaja tagne ambaibo ty Davida. Laha fa avy ty voaloham-bola, le nitoboke nihina sakafo ty mpanjaka. ²⁵ Nitoboke teo amity sezane ty mpanjaka, manahake ty fatao, teo amity seza teo agnila ty rindry. Nitsanga ty Jonatana, naho Abnera nitoboke teo agnila Saoly. Nefa foa ty seza Davida. ²⁶ Tsy mboe nirehake na ino ino Saoly tamio andro o, satria nidineke re hoe:" Nisy zaka nahazo aze. Tsy malio re; azo antoke fa tsy malio re." ²⁷ Fa tamity andro faharoe kea, ty hamaray ty voaloham-bola, le foa ty seza Davida. Hoe ty Saoly tamy Jonatana anadahine:" Nagnino ro tsy niavy tamity fisakafoana ty anadahy Jese na omale na androany?" ²⁸ Jonatana namale Saoly ty hoe:" Nangatake lala mafe tamiko mba hindeha agne Betlehema ty Davida. ²⁹ Hoe re:' Engao rie raho mba hindeha. Fa ty fokonay manao soro ao antana, naho ty rahalahiko nandily ahy ho agne. Henanezao, laha le fa nahisake saotre teo amasonao raho, le engao rie raho hindeha naho hanente reo rahalahiko.' Zay ro antone tsy niaviane teo andataba ty mpanjaka." ³⁰ Ka nirehetre tamy Jonatana ty helo Saoly, naho hoe re tamine:" Riha ry anadahy ty mpivadike, ampela mpavande! Feie vao raho tsy mahay fa le fa nifily ty anadahy Jese ho hamegnara ho anao, vaho ho hamegnara ty tsy fisikin-drenenao riha? ³¹ Fa laha mboe velo eto antane ty anadahy Jese, le tsy ho tafa-petrake na riha na ty fanjakanao. Ka henanezao, alefaso naho ento amiko atoy re, fa tsy maintsy ho mate vatane re." ³² Jonatana namale Saoly raene hoe:" Fa ino ro antone tokone hamonoa aze? Ino ro nataone?" ³³ Naho Saoly nanorake ty lefone tamine mba hamono aze. Ka le hay Jonatana fa tapa-kevetre ty hamono Davida ty raene. ³⁴ Nitsanga niala tam-pivignira teo amity latabatre naho tsy nihina sakafo ty Jonatana ty andro faharoe ty vola, fa nalahelo i Davida re, satria nagnafa baraka aze ty raene. ³⁵ Ty maray, nindeha nimbaeo ambaibo tamity andro voatondro niarake tamy Davida ty Jonatana, vaho ty ajalahy niarake tamine. ³⁶ Hoe re tamity ajalahine:" Milaisa naho paio reo folese ze natifiko." Naho laha nilailay ty ajalahy, le tinifine folese tafarane ao. ³⁷ Laha fa niavy teo amity toera ze nitsatoha ty folese nalefa Jonatana ty ajalahy, le nikaike ty ajalahy Jonatana bakeo, naho nanao ty hoe:" Feie tsy afaranao ao vao ty folese?" ³⁸ Naho nikaike ty ajalahy Jonatana hoe:" Tsiela, malakia, ko mijano!" Naho ty ajalahy Jonatana namory reo folese niakatre naho nimbaeo amity tompone. ³⁹ Nefa tsy nahay na ino ino ty ajalahy. Jonatana vaho Davida avao ro nahay ty raraha. ⁴⁰ Namea Jonatana ty ajalahine reo zaka-fialia maho hoe re tamine:" Mindehana, ento agne antana reo." ⁴¹ Laha vaho lasa ty ajalahy, le nitsanga bakao ambalike ty dongon-tane ty Davida, nihohoke teo amity tane, naho niondreke intelo. Nifagnoroke vaho niara-nitagny iereo, naho Davida nitagny mafe. ⁴² Hoe ty Jonatana tamy Davida:" Mindehana ampilamina, satria le fa sambe nifanta tamity agnara Yaveh tika naho nanao ty hoe:' Yaveh anie ho eo agnivontika, naho eo agnivo reo fokoko vaho reo fokonao zisikezay." Naho nitsanga Davida ka lasa, fa Jonatana kea nihere tagne antana.