¹ Laha fa tena antetre ty Davida Mpanjaka, le rinako iereo tamity bodofotsy re, Kanefa tsy nimete nafana. ² Ka heo reo mpanompone tamine:" Ao hisy hipay ajampela verijine ho ahy ty mpanjaka tompontika. Ao re hanompo ty mpanjaka vaho hikarakara aze. Ao re hiroro eo antsandrine mba hagnafana ty mpanjaka tompontika." ³ Le nipay ajampela soa tarehe era ty fari-tane Israely iereo. Nahisake i Abisaga Sonemita iereo ka ninday aze tagne amity mpanjaka. ⁴ Tena soa tarehe vatane ty ajampela. Nanompo ty mpanjaka vaho nikarakara aze re, nefa tsy niraike ara-nofo tamine ty mpanjaka. ⁵ Tamize andro zay, ty Adonia anadahy Hagita le nagnakatre ty vatane, nanao ty hoe:" Izaho ro ho mpanjaka." Ka nagnoma kelese vaho mpitiki-tsovale niarake tamine dimampolo lahy mba hindeha hialoha lala aze re. ⁶ Ty raene le tsy mboe nagnorontan-tsay aze, nanao hoe:" Nagnino riha ro nanao zao na zao?" I Adonia le lahilahy tena soa tarehe, terake nagnorikorike i Absaloma. ⁷ Nifampirehake tamy Joaba anagn'i Zeroia vaho tamy Abiatara mpisoro re. Nagnorike i Adonia iereo ka nagnampe aze. ⁸ Fa Zadoka mpisoro, vaho Benaia anagn'i Joiada, vaho Natana mpaminane, Simey, Rey, naho ty lahilahy mahere ze ahy Davida kea le tsy mba nagnorike i Adonia. ⁹ Naho Adonia nanao soro agnondry aman'ose, agnombe naho anak'agnombe mifehe teo agnila ty vato i Zohetela, ty eo agnila En-rogela. Hinafane iaby ty rahalahine iaby, reo anadahy ty mpanjaka, naho ty lahilahy Joda iaby, vaho reo mpanompo ty mpanjaka. ¹⁰ Feie tsy nagnafatre i Natana mpaminane, vaho Benaia naho reo lahilahy mahere, na i Solomona rahalahine re. ¹¹ Naho Natana nirehake tamy Batsela rene i Solomona, nanao ty hoe:" Mboe tsy reinao vao fa lasa mpanjaka i Adonia anadahy Hagita, naho tsy mahay zay ty Davida tompontika? ¹² Laha zao le engao raho hanoro hevetre anao zao, mba hamonjeanao ty fiainao vaho ty fiay Solomona anadahinao. ¹³ Mindehana mbaeo amy Davida mpanjaka; ambarao amine hoe:' Ry mpanjaka tompoko, feie vao riha tsy nifanta tamity mpanomponao, nanao ty hoe:" Azo antoke fa i Solomona ananao lahy ro hanjaka hisolo ahy, naho hitoboke eo amity sezan-droandriako re?" Ka nagnino ro Adonia ro manjaka?' ¹⁴ Laha mboe mirehake amity mpanjaka egne riha, le ho avy ao afaranao raho naho hagnamafe reo rehanao." ¹⁵ Ka nimbaeo amity efetragno ty mpanjaka ty Batseba. Le vatane fa antetre ty mpanjaka, naho Abisaga Sonemita ro nanompo ty mpanjaka. ¹⁶ Nagnondreke ty vatane vaho nandohaleke teo agnoloa ty mpanjaka ty Batseba. Le hoe ty mpanjaka hoe:" Ino ro irienao?" ¹⁷ Le hoe re tamine:" Ry Tompoko, riha nifanta tamity mpanomponao tamity alala Yaveh Zagnaharenao, nanao ty hoe:' Azo antoke vatane fa i Solomona anadahinao ro hanjaka hisolo ahy, naho hitoboke eto amity sezan-droandriako re.' ¹⁸ Amizao, ingo, Adonia ro mpanjaka, naho riha, ry mpanjaka tompoko, le tsy mahay zay. ¹⁹ Nanao soro agnombe, anak'agnombe mifehe, vaho agnondry aman'ose maro le maro re, naho nagnafatre reo anadahy ty mpanjaka iaby, Abiatara mpisoro, naho Joaba kapitene ty tafike, kanefa tsy nagnafatre i Solomona mpanomponao re. ²⁰ Fa laha ty aminao, ry mpanjaka tompoko, ty maso ty Israely iaby le eo aminao, mandy anao mba hitalily amiereo hoe ia ro hitoboke eo amity sezan-droandria hisolo anao, ry tompoko. ²¹ Fa laha tsy zay, le hihere hanahake ty mpanao meloke raho vaho Solomona anako, laha fa homate miarake amireo razane ty mpanjaka tompoko." ²² Naho laha mboe nirehake tamity mpanjaka re, le nilitse ty Natana mpaminane. ²³ Reo mpanompo nirehake tamity mpanjaka hoe:" Io ty Natana mpaminane." Laha fa nindeha teo agnoloa ty mpanjaka re, le nagnohoke ty vatane teo agnoloa ty mpanjaka ro vaho nihohoke tamity tane ty tarehene. ²⁴ Hoe ty Natana:" Ry mpanjaka tompoko, nirehake vao riha ty hoe:' I a donia ro hanjaka hisolo ahy, naho hitoboke eo amity sezan-droandriako re?' ²⁵ Satria nindeha nizotro re androany naho nanao soro agnombe, vaho anak'agnombe mifehe, naho agnondry aman'ose maro le maro, vaho nagnafatre ty ana ty mpanjaka iaby, reo kapitene ty tafike, naho Abiatara mpisoro. Mihinana vaho minoma eo agnoloa iereo, ka manao ty hoe:" Ho ela valo anie ty Adonia mpanjaka!" ²⁶ Fa izaho, mpanomponao, vaho Zadoka mpisoro, Benaia anadahy Joiada, naho Solomona mpanomponao, le tsy hinafane zahay. ²⁷ Le nanao zay ka tsy nirehake taminay, mpanomponao, ze tokone hitoboke eo amity sezan-droandria hisolo aze vaon ty mpanjaka tompoko?" ²⁸ Le namale Davida mpanjaka ka nanao hoe:" Kaiho himpoly eto amiko ty Batseba." Le nilitse teo agnoloa ty mpanjaka re naho nitsanga teo agnoloa ty mpanjaka. ²⁹ Nanao vava ty mpanjaka ka nanao ty hoe:" Laha mboe velo kea ty Yaveh, ze nagnafake ahy tamity ndaty iaby, ³⁰ manahake ty nagnanaovako vava taminao tamity alala Yaveh, ty Zagnahare Israely, manao hoe:" Hanjaka hisolo ahy ty Solomona ananao, naho hitoboke eo amity sezan-drioandriako eo amity toerako re,' le hataoko zay androany." ³¹ Le nagnondreke ty tarehene tamity tane ty Batseba, naho nagnohoke ty vatane teo agnoloa ty mpanjaka nanao hoe:" Ho velo zisikagne anie Davida mpanjaka tompoko!" ³² Hoe ty Davida mpanjaka hoe:" Kaiho hoamiko atoy Zadoka mpisoro, vaho Natana mpaminane, naho Benaia ana i Joiada." Ka nimbaeo agnoloa ty mpanjaka iereo. ³³ Le hoe ty mpanjaka tamiereo hoe:" Ento miarake aminareo ty mpanompo ty tomponareo, naho ampitikiro ty apondraho ty Solomona anadahiko ka ento mizotro agne Gihona re. ³⁴ Ao ty Zadoka mpisoro vaho Natana mpaminane hagnosotre aze ho mpanjaka eo amity Israely naho hitioke ty trompetra ka hanao hoe:" Ho ela velo anie Solomona Mpanjaka!" ³⁵ Le hiakatre hagnorike aze nareo, ka hilitse vaho hitoboke eo amity sezan-droandriako re; satria ho mpanjaka eo amity toerako re. Izaho le fa nanendre aze ho mpinday eo amity Israely vaho Joda." ³⁶ Le namale ty mpanjaka ty Benaia ana Joiada, ka nanao hoe:" Ho lefe anie zay! Ho mafese Yaveh, Zagnahare ty mpanjaka tompoko, anie zay. ³⁷ Manahake ty niomba Yaveh mpanjaka tompoko anie, ro hiombane i Solomona kea, naho hataone bey naho ty sesan-droandria Davida mpanjaka tompoko ty sezan-droandriane." ³⁸ Ka lasa nizotro niarake tamy Solomona nitikitse ty apondra Davida mpanjaka ty Zadoka mpisoro, Natana mpaminane, Benaia ana i Joiada, vaho reo Keretita, naho reo Peletita, niente iereo nizotro tagne Gihona re. ³⁹ Nangalake ty trifa misy menake bakao amity tragno Zadoka mpisoro naho nagnosotre i Solomona. Le nitiofe iereo ty trompetra, naho hoe ty ndaty iaby hoe:" Ho ela velo anie Solomona mpanjaka!" ⁴⁰ Bakeo le niakatre nagnorike aze ty vahoake iaby, naho nitioke sody ty vahoake naho nifalefale tamity hafaleam-bey, ka nihozo noho ty feo iereo ty tane. ⁴¹ Naho i Adonia vaho reo vahiny iaby ze niarake tamine naharey zay laha fa baka nihina iereo. Laha fa naharey ty feo ty trompetra ty Joaba, le hoe re ty hoe:" Magnino ro misy korake eto amity tana?" ⁴² Laha mboe nirehake re, le niavy ty Jonatana ana i Abiatara mpisoro. Hoe ty Adonia hoe:" Mandroso, fa lahilahy mete riha naho minday vaovao mahafale." ⁴³ Le namale Jonatana ka nirehake tamy Adonia hoe:" Davida mpanjaka tompontika le fa nanao i Solomona ho mpanjaka, ⁴⁴ naho ty mpanjaka le fa nagnirake i Zadoka mpisoro, Natana mpaminane, vaho Benaia ana i Joiada, naho reo Keretita vaho reo Peletita. Le fa nampitikire iereo ty ampondra ty mpanjaka ty Solomona. ⁴⁵ Zadoka mpisoro vaho Natana mpaminane le fa nagnosotre aze ho mpanjaka tagne Gihona, naho niakatre tamin-kafalea bakagne, kay ka agnate korake ty tana. Izao ro korake reinao. ⁴⁶ Naho mitoboke eo amity sezan-droandria ty fanjaka avao kea Solomona. ⁴⁷ Fagnampe zay, le niavy nitso-drano i Davida mpanjaka tompontika ty mpanompo ty mpanjaka, nanao hoe:" Hataon'Agnaharenao soa naho ty agnaranao anie ty agnara Solomona, naho hataone bey naho ty sezan-droandrianao anie ty sezan-droandriane.' Le nihohoke teo am-pandreane ty mpanjaka. ⁴⁸ Le hoe kea ty mpanjaka hoe:" Derae anie Yaveh, ty Zagnahare Israely, ze nagnomea ndaty raike hitoboke eo amity sezan-droandriako amizao andro zao, ka afake mahisake zay ty masoko."' ⁴⁹ Le natahotre reo vahiny i Adonia iaby. Le nitsanga iereo ka sambe nindeha tamity lalane aby. ⁵⁰ Naho i Adonia le natahotre i Solomona ka nitsanga, nindeha, naho nita ty trifa ty alitara. ⁵¹ Bakeo le nambara tamy Solomona zay, nanao hoe:" Ingo, namehe i Solomona mpanjaka ty Adonia, satria nita reo trifa ty alitara re, nanao hoe,' Ao ty Solomona mpanjaka hifanta amiko mialoha fa tsy hamono ty mpanompone amity meso re."' ⁵² Le hoe ty Solomona:" Laha hanoro ty vatane ho lahilahy mete re, na le singam-bolone raike aze tsy ho poke amity tane, fa lahan haratia kea ro hisake ao amine, le ho mate re." ⁵³ Ka le nagnirake ndaty Solomona mpanjaka, ze ninday i Adonia nizotro bakeo amity alitara. Le avy re ka nandohaleke teo amy Solomona Mpanjaka, naho hoe Solomona tamine:" Mindehana agne antragno."