¹ Ry Yaveh, Ndranahary mamaly raty , Ndranahary mamaly raty, mipiriha aminay eto. ² Mitsangana, lahy mpitsara ty tany, omeo ty mpirengirengy ze sahaza androzy. ³ Zisiky ommbia ty raty fanahy, lahy Yaveh, zisiky ombia ty raty fanahy ro ⁴ hifalifaly? Mandraraky ty safa fiavonavona ndrozy; ze manao rety iaby mievotsevitsy. ⁵ Niravaravandrozy ty olonao , lahy Yaveh; mampijaly ty firenena Ahinao rey ndrozy. ⁶ Mamono somondrara noho ty vahiny ze miay amy ty fireneny ndrozy, sady mamono ty tsy maty baba. ⁷ Hozao tiasandrozy: "Tsy hahita Yaveh, sady azy Ndranahary Jakoba le tsy hahay zay." ⁸ Mieritsereta, nareo lahy olo tsy misay! Nareo gegy, Ombia nareo ro hianatsy? ⁹ Ie ze manao ty sofy, vasa tsy mahare va Ie? Ie ro namboatsy ty maso, vasa tsy mahita va Ie? ¹⁰ Ie ro mamehy ty firenena, vasa tsy mananatsy va Ie? Ie ro manome fahalala ty olo. ¹¹ Yaveh ro mahay ty sain'olo, fa raha fahatany ndrozy. ¹² Sambatsy, ze ampianarinao, lahy Yaveh, azy ampianarinao baka amy ty lalanao. ¹³ Nameanao fitsahara ie tamy ty fotoa ty olo zisiky ty ihalia ty lavaky hoahy ty raty fanahy. ¹⁴ Fa Yaveh tsy mahafoy ty olony ndra hanenga ty lovany. ¹⁵ Le ho to ndraiky ty fitsara; sady ze mahity fo iaby le hanoriky zay. ¹⁶ Ia va ro hitsanga hiaro ahy amy mpanao raty rey? Ia ro hitsanga ho tiahy hanohitsy ty raty fanahy? ¹⁷ Laha tsy Yaveh ro nanampy ahy, manahaky zay zaho fa saiky nitsilany tamy ty toera ty fahangina. ¹⁸ Lafa nivola hozao zaho: "Mangitikitiky ty tomboko," le nnitoha ahy, ty famalozam-ponao, lahy Yaveh. ¹⁹ Lafa lako ty ahiahiko, le mampifaly ahy ty fankaherezanao. ²⁰ Afaky miaraky aminao va ty sieza fiadana ty faharava, azy mamoro ty tsy rariny amy alala ty lalana? ²¹ Niharo hevitsy ndrozy mba hamangoa ty ay ty to sady manasazy ho maty azy tsy mana fahadisoa rey. ²² Fa Yaveh ro fa tilikambo anabo, sady lafiam-bato fialofako ty Ndranahariko. ²³ Handay ty fahadisoan-drozy aminy eo Ie sady handrava androzy mitoka amy ty faharatiany. Hamono androzy Yaveh Ndranaharitsika.