¹ Azy mipetraky ambany ty fialofa azy Anabo Mare eo le hipetraky ao amy alok'azy Tsitoha. ² Hivola amy ty Yavehmanao hozao zaho: "Ie ro fialofako noho fiarovako mare, Ndranahary ze itamaniko." ³ Fa Ie ro hamonjy anao amy ty fandriky ty mpihaza noho amy ty arety mandoza mahafaty. ⁴ Handrakotsy anao amy ty elatsiny Ie, sady ambany ty elatsiny ro ahitanao fialofa. Ty famendreham-pitokiany le fiarova. ⁵ Tsy mavaka ty horohoro ty haly iha, ndra ty kititsy ze mitily amy ty andro, ⁶ ndra ty loza ze mikarikarioky amy ty maiiky, ndra ty arety avy amy midy. ⁷ Arivo ro mety ho ravoky anilanao sady ray aly eo amy ty tananao ankavana, fe tsy hahazo anao zay. ⁸ Fa hieritseritsy ty sazy ty raty fanahy avao Iha. ⁹ Fa Yaveh ro fialifako! Anovo fialofa avao koa ty Anabo Biby. ¹⁰ Tsy hisy raty hahazo anao; tsy hisy fijalia hanarikitsy ty fipetrahanao. ¹¹ Fa hitariky ty anjeliny rey Ie mba hiaro anao, hiamby amy ty lalanao iaby. ¹² Hanondrotsy anao amy ty tanany ndrozy mba tsy ho voa ty vato ty tomboky. ¹³ Hamopipotiky ty lion iha noho ty menarana ambany tombonao; hanitsaky ty lion tanora noho ty bibilava iha. ¹⁴ Safe fa nanolo-bata ho tiahy ie, le hamonjy azy Zaho safe tsy nivaliky tamiko ie. ¹⁵ Lafa mikaiky Ahy ie, le hamaly azy Zaho. Hiaro azy Zaho amy ty fijalia; hanome fandresea ho tiazy Zaho sady hanome voninahitsy ho azy. ¹⁶ Hanome fahafaha-po azy amy ty halava ty fiaina Zaho sady hampiro azy ty famonjeako.