¹ Mijanjina, lahy Yaveh, sady valio zaho, Fa tsy mana noho mijaly zaho. ² Embeno zaho, fa tsy mpivaliky; lahy Ndranahariko, vonjeo ty mpanomponao ze mitama aminao. ³ Ferineso zaho, lahy Tompo, fa tomany mare aminao amy ty halava ty andro iaby zaho. ⁴ Ampifalio ty mpanomponao, fa aminao ro ivavahako, lahy Tompo. ⁵ Soa, Iha, lahy Tompo, sady vonona hanenga ty fahadisoa , sady hampitoro ty famalozam-po bevata hoahy ze mitoreo aminao Iha. ⁶ Ry Yaveh, janjino ty fivavahako; janjino ty feo ty fangatahako. ⁷ Mikaiky Anao zaho tamy andro fijaliako, le hamaly ahy Iha. ⁸ Tsy misy ndra raiky afaky hampitovia Aminao amy azy ndranahary rey, lahy Tompo. Tsy misy asa manahaky ty asanao rey. ⁹ Ty firenena ibay ze namboarinao le ho avy handohaliky antrehanao eo, lahy Tompo. Le hanome voninahitsy ty Anaranao ndrozy. ¹⁰ Fa bevata Iha sady manao rah mahatseriky; Iha raiky avao ro Ndranahary. ¹¹ Ampianaro ahy lalanao rey, lahy Yaveh. Le handeha amy ty faharinanao zaho. Ampiafandrambeso ty foko mba hampitoroko fanaja Aminao. ¹² Ry Tompo Ndrnahary o, amy ty foko iaby ro hanompoako anao; hanome voninahitsy ty anaranao mandrakizay zaho. ¹³ Fa bevata ty fitiavanao amiko fa namonjy ty aiko tamy ty halaliky ty fiaina tsy hita Iha. ¹⁴ Ndranahary o, fa nitsanga hanohitsy ahy ty mpiavonavo. Ty vondron'olo mahery loha mikinia ty aiko. Tsy nieritseritsy Anao ndrozy. ¹⁵ Fa Iha, lahy tompo, Ndranahary miferinay noho lekko fahasoava, be fandefera noho soa fanahy noho mendrika itokisa. ¹⁶ Toliho zaho sady ferineso zaho; ameo ty herinao ty mpanomponao; vonjeo ty anakilahy ty mpanomponao ampela. ¹⁷ Ampitoro ahy ty famantara ty fankasitrahanao ahy. Azy malay ahy rey le hahita zay sady ho menatsy safe Iha, lahy Yaveh, fa nanampy ahy noho nampionona ahy.