¹ Afaho amy fahavaloko rey zaho, lahy Ndranahary,engaho amy ty anabo lavitsy azy mitsanga hanohitsy ahy rey. ² Embeno amy mpanao hadisoa rey zaho. sady afaho amy ty olo teo lio. ³ Fa, ingo, mihevitsy hikinia ty aiko ndrozy. Azy mpanao raty mahery rey le mivory hanohitsy ahy, fe tsy noho amy ty hadisoako ndra ty fahotako, lahy Yaveh. ⁴ Mihentsy hamono ahy ndrozy ndra tsy mana hadisoa aza zaho; mifohaza sady vonjeo zaho le henteo. ⁵ Iha, lahy Yaveh Ndranahary tompoa ty lako, azy Ndranahary ty Israely,miongaha le sazio firenena iaby rey; ka miferinay amy ze mpanao hadisoa. Sela ⁶ Lafa hariva ndrozy mimpoly, mihaokaoky manahaky ty alika ndrozy sady mikarikarioky eraky ty tana. ⁷ Ingo, mandresatsy amy ty vavany ndrozy; mesobe ro amy ty soniny, fa hozao tiasandrozy: "Ia ro mahare anay?" ⁸ Fa Iha, lahy Yaveh le homehy androzy; anovinao fimeheza ty firenena iaby. ⁹ Ndranahary, herikoo, hijanjy Anao zaho; tilikamboko anabo Iha. ¹⁰ Hifankahita amiko Ty Ndranahariko miaraky amy ty fanenkea ho tamany; Ndranahary ro manenga ahy hahita ty faniriako amy ty fahavaloko rey. ¹¹ Ka vonoa ndrozy, tsy no hanalino ty oloko. aparitaho amy ty fahefanao ndrozy sady anovo ho lavo ndrozy, lahy Tompo fiaronay. ¹² Noho ty fahota ty vavandrozy noho ty safa ty sonindrozy, le tokony ho sambory ndrozy amy ty firengirenginy, sady amy ty ozo noho ty vady ro natorony. ¹³ Ravao amy ty helokinao ndrozy, ravao ndrozy mba tsy hisy sasy; engaho ndrozy ro hahay fa Ndranahary ro mpanjaka amy Jakoba noho baka amy ty kila tany. Sela ¹⁴ Lafa hariva ndrozy mimpoly, mihaokaoky manahaky ty alika mikarikarioky eraky ty tana. ¹⁵ Mikarikarioky mila hany ndrozy sady mierotsy manahaky ty alika laha mbo tsy vintsy. ¹⁶ Fa hihira mikasiky ty herinao zaho, sady hihira mikasiky ty fitiavanao lafa maray zaho tsy hiova! Fa fiarova anabo ho tiahy Iha sady fialofa amy ty andro fijaliako. ¹⁷ Ho Ahinao, ry heriko, ro hihirako fanommpoa; fa Ndranahary ro fiarova anabo ho tiahy, azy Ndranahary ty famaloza-po.