¹ Manompoa an'Yaveh. Manompoa ty anara Yaveh. Manompoa Azy, nareo ry mpanompo an'Yaveh, ² nareo ze mitsanga an-trano Yaveh ao, amy kianja ty tranon-Dranahary ao. ³ Manompoa an'Yaveh, fa soa Ie; mihira fanompoa hoahy ty anarany, fa soa manao zay. ⁴ Fa nitingy an'i Jakoba hoahy tiahy ty vatany Yaveh, sady Israely ho hanagnany. ⁵ Haiko fa bevata Yaveh, sady anabo mandilatsy ty ndranahary iaby ty Tompotsika. ⁶ Ndra ino ndra ino irin'Yaveh, le anoviny an-danitsy any, an-tany etoy, amy ty riaky eny noho ty rano laliky iaby. ⁷ Manday ty zavona baka lavitsy Ie, manao ty tselatsy miaraky amy ty ranon'ora sady mampiboaky ty tsioky baka amy ty trano fitehirizany. ⁸ Namono ty veloha teraky Egypta Ie, ndra ty olo ndra ty biby. ⁹ Nandefa famantara noho hatsereha tanivonareo, Egypta rey Ie, tsy nanoriky an'i Farao noho ty mpanompony iaby rey ie. ¹⁰ Nanafiky firenena lako noho namono mpanjaka mahery Ie, ¹¹ le i Sihona mpanjaka tiahy Amorita noho Oga mpanjakan'i Basana sady fanjaka iaby ta Kanana ao rey. ¹² Nameany ho lovantsika ty tanindrozy, lova hoahy ty Israely olony. ¹³ Ty anaranao, lahy Yaveh, le maharitsy mandrakizay; ty lazanao, lahy Yaveh, le maharitsy heniky ty tariha iaby. ¹⁴ Fa miaro ty olony Yaveh sady mana fo miferinay amy ty mpanompony rey. ¹⁵ Ty sampy ty firenena rey le volafoty noho volamena, nasa ty tana ty olo. Mana ¹⁶ vava sampy rey, fe tsy mivola; mana maso ndrozy, fe tsy mahita; ¹⁷ mana sofy ndrozy, fe tsy mahare, sady tsy misy fofn'ay ambavandrozy ao. ¹⁸ Azy manao androzy rey le manahaky androzy, manahaky ty olo iaby ze matoky androzy rey. ¹⁹ Ry tarihan'Israely, misaora an'Yaveh; ry tariha i Arona, misaora an'Yaveh. ²⁰ Ry tariha i Levy, misaora an'Yaveh; nareo ze manome voninahitsy an'Yaveh, misaora an'Yaveh. ²¹ Isaora lahy Yaveh ze a Ziona, Ie ze mipetraky a Jerosalema. manompoa an'Yaveh