¹ Tsy ho tiahinay, lahy yaveh, tsy ho ahinay, fa hoahy ty anaranao ro anasesea voninahitsy, fa hoahy ty fanenkeanao mahatoky noho hoamy ty famendreham-pitokianao. ² Manino firenena rey mivola hozao: "Aia va ty Ndranaharindrozy?" ³ Ty NDranaharinay an-danitsy any, manao ze kila raha iaby ze teany hanovy. ⁴ Volafoty noho volamena azy sampy ty firenena rey asa ty tanan'olo. ⁵ Mana vava sampy rey, fa tsy mivola; mana-maso ndrozy, fe tsy mahita; ⁶ mana sofy ndrozy, fe tsy mahare; mana oro ndrozy, fe tsy mahare fofo. ⁷ Azy sampy rey mana tana, fe tsy maha tsapa; mana tomboky ndrozy, fe tsy afaky mandeha, ndra mivola amy ty vavany aza. ⁸ Azy nanamboatsy azy rey le manahaky aminy, manahaky ze mitama azy iaby. ⁹ Ry Israely, matokia an'Yaveh; Ie ro famonjea anao noho fiaronao. ¹⁰ Ry tariha i Arona, matokia an'Yaveh; Ie ro famonjea anao noho fiaronao. ¹¹ Iha ze manome voninahitsy an'Yaveh, matokia Azy; Ie ro famonjea anao noho fiarovanao. ¹² Yaveh mahatiaro le hitahy antsika; hitahy ty longo ty Israely Ie; sady hiaro ty valy aminanaky Arona. ¹³ Hiaro ze hanome voniahitsy Azy Ie; ndra tanora ndra antitsy. ¹⁴ Enganie Yaveh hampitombo hisaky anareo bakany bakany, ty ahinao noho ty tarihanao rey. ¹⁵ Yaveh azy namboatsy ty lanitsy noho ty tany lahy hitahy anao. ¹⁶ Ahin'Yaveh ty lanitsy; fe ty tany nameany hoahy ty olombelo. ¹⁷ Ty maty tsy mba hanompo an'Yaveh, dra ze mijotso amy ty mangingiky tsy manao zay; ¹⁸ Fa hisaotsy ahy Yaveh zahay henanio le ho mandrakizay. Manompoa an'Yaveh.