¹ Manompoa an'Yaveh. Hanesy fisaora hoahy Yaveh amy ty foko iaby zaho amy ty fiangona ty olo to amy ty fivoriandrozy. ² Bevata ty asan-Dranahary, niambena ze naniry androzy tamy ty fahazotoa. ³ Maresaky noho lako ty voninahitsy ty asany, sady maharitsy mandrakizay ty hatony. ⁴ Manao raha soa ze ho tiarova ie; mandefitsy noho miferinay Yaveh. ⁵ Manome hany hoahy ty mpanoriky mitama Azy Ie. Hampahatiaro ty fanenkeany saky sanandro Ie. ⁶ Naboakany tamy ty olo ty asa maheriny tamy ty fanomezany androzy ty lova ty firenena rey. ⁷ Maeva ho tamany noho mahity asa ty tanany rey; azo antoky iaby ty fampianarany. ⁸ Mipetraky mandrakizay zay, mba hitandrema amy ty fahatokia noho amy ty toko ho izy. ⁹ Nanome fandresea hoahy ty olo Ie;nampisy ty fanenkeany mandrakizay; masy noho mahatseriky ty anarany. ¹⁰ Ty fanomeza voninahitsy an'Yaveh ro veloha ty fahendrea; azy manatanteraky ty lalany ro mana fahazavan-tsay soa. Maharitsy mandrakizay ty fanompoa Azy.