¹ Ka mirengirengy amy ty hamaray, fa tsy hainao ze mety handresy ty henanio. ² Engao olo-hafa ro hiloka anao fa tsy ty vavanao avao; ty vahiny fa tsy ty soninao avao. ³ Saintsaino ty havesatsy ty vato noho ty lanja ty fasy--- ty fivolana ty adala ro mavesatsy vatany noho roe rey. ⁴ Misy ty habibia ty halaginy noho ty fandriaky ty heloky, fa ia ro afaky hitsanga aloha ty hasarotam-piaro eo? ⁵ Aleo anatsy tamin'olo lako to zay fitea avony. ⁶ Mahatoky ty ratsy anovy ty nama, fa ty fahavalo ro mety hanoroky mitafotafo anao. ⁷ Ty olo ze nihina zisiky-mahavintsy le mandà ndra le ty papon-tantely aza, fa ho ahy ty olo mosary koa, le mamy ty raha-mangily iaby. ⁸ Manahaky ty voro ze miriorio miala amy ty akaniny ty olo ze maniasia miala amy ty fipetsahany. ⁹ Ty ranomanitsy noho emboky manitsy le mampifaly ty fo, fa ty hamamy ty nama le avy baka amy ty torohevitsy amin-kitsim-po. ¹⁰ Ka mahafoy ty namanao noho ty baba ty namanao, sady ka mana amy ty tsano ty rahalahinao any amy ty andro-mahavoa anao. Soa vatany ty nama ze mariny noho ty rahalahy ze lavitsy. ¹¹ Henteo, anako e, le am-pifalea ty foko; le hamaly an'i azy mikizaky iny ahy zaho. ¹² Ty lahilahy malio ro mahatiaro ty loza ka le mivony, fa ty olo bado le mandroso avao ka le mijaly noho zay. ¹³ Alao ty salotsy ze nanome antoky amy ty vahiny, sady tandrano ho antoky zay lafa manome antoky amy ty ampela raty fandaisam-bata ie. ¹⁴ Ndra ia ndra ia manome tsipi-rano ty namany amy ty feo abo vo maraindray-bey, le rambesy hanahaky ty ozo tsipi-rano zay! ¹⁵ Ty valy mpifamaly ro manahaky ty miniminik'ora amy ty andro fahavaratsy; ¹⁶ ty mitandraky azy manahaky ty mitandraky tsioky, ndra miezaky mipiritsy solo-bonio my ty tananao ankavana. ¹⁷ Ty vy mandranitsy vy; manahaky zay, ty lahilahy mandranitsy ty namany. ¹⁸ Ze mikarakara ty hazon'aviavy le hihina ty voany, sady ze miaro ty tompony le hameam-boninahitsy. ¹⁹ Manahaky ty taratsy ty rano amy ty endriky ty olo, ty taratsy ty fo ty olo amy ty olo. ²⁰ Manahaky ty Fiainan-tsy hita noho ty Fandrava tsy afa-po zisiky farany, le to zay ty maso ty olo tsy ho afa-po zisiky farany. ²¹ Ty memy ho ahy ty volafoty sady ty fatapeea fiketseha ho ahy ty volamena; le amy ty fanompoa azy ro hitsapa ty olo. ²² Ndra le totohinao amy ty fandisana aza ty adala ---miaraky amy ty vary---le mbo tsy hiala aminy avao ty hadalany. ²³ Anovo azo antoky fa hainao ty toetsy ty aondrinao sady saintsaino ty mikasiky biby fiharinao rey, fa ²⁴ ty hanana ro tsy zisiky farany. Ela ho ahy ty tariha iaby va ty satso-boninahitsy? ²⁵ Lafa miala ty akata sady mitiry ty solofony, le avory baka amy ty vohitsy eny ty akata ho ahy aondry noho aosy rey. ²⁶ Anak'aondry rey ro hanome ty fisikina sady aosy rey hanome ty sara ty baibo. ²⁷ Hisy rononon'aosy ho ahy ty haninao ---hany ho ahy ty tokatsanonao--- sady hany ho ahy ty mpiasanao ampela.