¹ Aleo mitingy ty laza soa to zay bey hanana sady soa noho ty volafoty noho volamena ty sitsaky. ² Ty mpanarivo noho ty mijaly le samby mana zay--- Yaveh ro mpihary azy iaby. ³ Ty olo mailo mahita ty loza ka le mivony, fa ty gadra koa mandroso sady mijaly noho zay. ⁴ Ty valisoa ty fampijotsoam-bata noho fatahora an'Yaveh ro hanana, voninahitsy, sady fiaina. ⁵ Ty fatiky noho ty fandriky ro amy ty lala ty maheriloha eo; fa ze miaro ty ainy ro hanalavitsy androzy. ⁶ Ampianaro amy ty aja ty lala tokony handehany sady lafa bevata ie le tsy hiala amy fampianara zay. ⁷ Manapaky amy ty malahelo eo ty mpanan-kanana sady ze miemby to go andevo ze nampindra. ⁸ Ze mandraraky ty tsy rariny ro hijinja ty faijalea sady halazo ty tsorakazo ty helokiny. ⁹ Ze mana maso bey fiantsa ro hotahy, safe mizara ty mofony amy ty mijaly ie. ¹⁰ Roaho ty mpandratiraty le ho lasa ty fifamalea; hijano ty aly noho ty fanativativa. ¹¹ Ze tea fo malio noho ze mivola fahasoava, ro hana ty mpanjaka ho namany. ¹² Ty maso Yaveh ro miemby zisiky any ty fahaiza, fa ty safa ty mpamaliky ro ravany. ¹³ Ty olo malay manao hozao: "Misy lio an-danitsy any! Ho maty an-kalamanjana eny zaho." ¹⁴ Ty vava ty ampela maheriloha ro lavaky laliky; mihetsiky amy ze iaby latsaky ao ty heloky Yaveh. ¹⁵ Mipitiky amy tyvo ty aja ty adala, fe ty ratsan-kazo fanasazia hampiala zay. ¹⁶ Ze mampijaly ty olo mijaly ro mampitombo ty hananany, sady ho avy amy ty fijalea ze manome ty mpanan-kanana. ¹⁷ Ahorirano ty sofinao sady mijanjy safa ty hendry rey ka le ampanenkeo ty fahaizako ty fonao, ¹⁸ safe hoteateanao anao laha embenanao aminao ao rey, laha vonona amy ty soninao eo ie iaby. ¹⁹ Ho amy Yaveh ao laha zay ty fatokisanao, mampianatse anao zay zaho henanio---iha ro iha. ²⁰ Moa va zaho tsy fa nanoratsy ohabola ty fampianara noho fahaiza telopolo ho ahy nao, ²¹ mba hampianara anao ty marina amy safa matoky rey, mba hanomeza valin-tsafa matoky amy ze nanirake anao rey? ²² Ka mandrobaky ty malahelo safe mijaly ie, ndra manosihosy ty ory am-bavahady eo, ²³ fa Yaveh ro hisolo vava androzy, sady Ie handrobaky ty ay ze nadrava androzy rey. ²⁴ Ka minama amy ty olo ze fegezy ty heloky sady ka miaraky amy ze romotsy, ²⁵ tsy noho iha hianatsy ty fanoviny sady hahazo fandriky ho ahy ty fanahinao. ²⁶ Ka mety ho isa ze manampatsy-tana amy ty fiantoha, ndra miantoky-tsosa. ²⁷ Laha tsy mana haloa iha, ino moa ro hahasaka ty olo tsy hangalaky ty fandrea ndreanao? ²⁸ Ka mikasiky ty vala vato faela ze fa napetsaky ty razanareo. ²⁹ Mahita olo mahay amy ty asany va iha? Hitsanga aloha mpanjaka rey eo ie; tsy hitsanga aloha ty olo mahazatsy eo ie.