¹ Ndra ia ndra ia tea fananars le tea fahaiza, fa gegy ze malay fanitia. ² Yaveh le manome sitsaky ty olo soa, fa meloky ty olo ze manao tetiky-raty Ie, ³ Ty olo ro tsy ho tafapetraky amy ty faharatia, fa ty olo-marina tsy afaky hombota. ⁴ Ty valy maeva ro satso-boninahitsy ty valiny, fa ze manday henatsy ro ty arety ze maha-lo ty taolany. ⁵ Mahity ty fikasa ty marina, fa mamitaky ty toro-hevitsy ty raty. ⁶ Ty safa ty olo raty fanahy ro hotsoky mandiny vinta hamonoa, fa ty safa ty mahity koa ro miaro androzy. ⁷ Ty olo raty fanahy ro ombota sady nandeha ndrozy, fa ty tsano ty olo-marina koa ro hitsanga. ⁸ Tompoe amy ty halakoa ty fahendrea hanana ty olo, fa ze manao fitingina raty koa ro anovy tsy misy dikany. ⁹ Soa vatany ty mana toera tsy manan-danja--- mpiasa zao--- noho ty mirengirengy amy ty manambonianao nefa tsy manan-kohany. ¹⁰ Ty olo-marina ro miahy ty mikasiky filà ty bibiny rey, fa ndra le ty fangoram-po ty raty fanahy aza le lozabey. ¹¹ Ze miasa ty taniny le hanasa hany bey, fa ndra ia ndra ia mania tetikasa tsy misy dikany rey koa le tsy misy say. ¹² Ty olo raty fanahy maniry ze nangalary ty olo-raty tamy ty hafa, fa ty vokatsy ty olo-marina koa ro baka amy ty safan-drozy avao. ¹³ Ty olo-raty ro voafandriky ty resan-dratiny, fa ty olo-marina koa ro milay ty olo. ¹⁴ Baka amy ty vokatsy ty safany ro maha-atsiky raha-soa ty olo, manahaky ty hamalea ty asa ty tanany soa azy avao. ¹⁵ Ty lala ty adala ro marina amasony eo avao, fa ty olo-hendry koa mijanjy torohevitsy. ¹⁶ Ty adala ro mampitoro ty helokiny am-belohany, fa ze tsy midary fandratia koa ro mailo. ¹⁷ Ze mivola ty marina ro mivola ze rariny, fa ty fitsangana vavolombelo diso koa mivola vandy. ¹⁸ Ty safa ze miresaky an-kameha le manahaky fanindroe ty meso-bey, fa manday fanafaha koa ty lela ty hendry. ¹⁹ Ty sony marina ro ela zisiky farany, fa ty lela mpavandy koa ho amy ty fotoa tsy ampy avao. ²⁰ Misy fitaky am-po ze manao tetiky-raty rey, fa hafalea koa ro baka amy mpanome-say fiadana rey. ²¹ Tsy misy arety niavy amy ty olo-marina, fa ty olo raty fanahy koa atsiky raha mahazo azy. ²² Malay ty sony mavandy Yaveh, fa ze miay amp-atokisa rey koa ro sitsakiny. ²³ Mamony ty fahaizany ty olo hendry, fa ty fo ty adala koa mihoaky fahadala. ²⁴ Ty tana ty mazoto ro hanapaky, fa ty olo kamo koa akeca manao asa forosé. ²⁵ Ty fanahia am-po ty olo mampiondriky azy ao, fa ty safa soa koa mahafaly azy. ²⁶ Ty olo-marina ro mpitariky-lia ho ahy ty namany, fa ty lala ty raty fanahy mitariky androzy amy ty lala-diso. ²⁷ Ty olo kamo ro tsy hamonjy ty hazan-drozy, fa ty olo mazoto koa hahazo hanana sarotsy. ²⁸ Ze mandeha amy ty lala-marina rey ro mahita fiaina sady tsy misy fahafatesa ty lala zay.