¹ Bakeo Njanahary nitsipy rano an'i Noa noho ty anakilahiny rey, sady nivola hozao tamin-drozy: "Milakoa fara, milakoa, sady atseho ty tany. ² Ty tahotsy noho ty horohoro anao le ho amy biby rey ze miay anabo ty tany, ty voro ty habakabakyt, amy ty kila raha iaby ze mandeha ambany ty tany,sady amy ty hazan-driaky iaby. Ameako an-tanao rey. ³ Ty raha iaby ze miay le hanovinareo sakafo. Henany zao zaho le manome anareo ty raha iaby manahaky ty nanomezako anareo ty raha mitiry maintso. ⁴ Fe nareo le tokony tsy hihina hena miaraky amy ty ainy _ zay le ty liony_ anainy ao. ⁵ Fe laha hoahy ty lionareo, le ay ze anay ty lionareo, le takiaKo ty viliny. Baka amy ty tana ty biby rey ro hitakiako zay. Baka amy ty tanan'olo ze namono ty rahalahiny ro hitakiako ty solo ty fiainan'zay olo zay. ⁶ Ndra ia ndra ia mandatsky ain'olo raiky, le olo ro handatsaky ty ainy, fa tamy ty endrikin-Janahary ro nanamboarany ty olo. ⁷ Laha ty aminareo, le milaoa fara sady milaoa, miparitaha heniky ty tany sady mitomboa amizay eo." ⁸ Bakeo Njanahary niresaky tamy Noa noho anakilahiny rey niaraky taminy nanao hozao: " ⁹ Laha ty amiko, le janjino! Hanamafy ty fanenkea nanoviko taminareo noho ty tarihanareo afaranareo ao Zaho, ¹⁰ noho ty biby managnay ze miaraky aminareo, voro rey,biby fihary, sady ty raha managnay iaby anabo ty tany miaraky aminareo, baka amy iaby ze tanay ty sambo-fiara tao rey, zisiky amy raha managnay iaby anabo ty tany. ¹¹ Zao zaho le hanamafy ty fanenkeako nanoviko taminareo, fe tsy hisy tondr-drano handrava ty nofo iaby sasy. Sady tsy hisy safo-drano handrava ty tany sasy." ¹² Hozao tiasan-Janahary: "Zao ty famantara amy ty fifanaraha ze anoviko Amiko eo noho aminareo eo sady ty raha managnay miaraky aminareo, ho amy tariha ty ho avy: ¹³ Fa nametraky sadian-Janahary amy ty raho eny Zaho, sady zay ro famantara ty fanenkea Amiko eo noho ty tany. ¹⁴ Zay le ho avy lafa handomboky ty tany amy ty raho Zaho sady ho talaky amy ty raho eny ty sadian-Janahary, ¹⁵ Bakeo le ho tiaroko ty fanenkeako,ze nisy tamiko noho taminareo sady ty raha managnay ty nofo iaby. Tsy hahavy tondra-drano hanimba ty nofoiaby sasy rano rey. ¹⁶ Ty sadian-Janahary le ho amy ty raho le hahitaky zay Zaho, Mba ahatiarova ty fanenkea tamin-Janahary noho ty raha managnay ty nofo iaby zay anabo ty tany." ¹⁷ Bakeo le nivola Njanahary nivola tamy i Noa nanao hozao: " Io ty famantara any azy fanenkea nanoviko tamy ty nofo iaby ze anabo ty tany." ¹⁸ Azy anaky Noa ze niboaky baka amy azy sambo-fiara tao le i Sema, Hama sady Jafeta. Hama le baba i Kanana. ¹⁹ Telo rey ro anaky Noa, sady bakamin-drozy rey ro naha atsiky olo ty tany. ²⁰ Nanomboky namboly Noa, sady namboly voaloboky ie. ²¹ Nino ty ilany tamy ty divay ie le nimamo. Niroro tsy nisafotsy tamy ty lainy ie. ²² Bakeo i Hama, baba i Kanana, nahita ty babany tsy nisiky le nivola tamy ty rahalahiny tambaliky tany. ²³ Le nangalaky siky lava i Sema noho i Jafeta sady nametraky zay tamy ty sorikin-drozy roe, sady nandeha tafara nampisafotsy ty baban-drozy tsy nisiky. Nitoliky loha ndrozy, le tsy nahitaky ty raha ty baban-drozy. ²⁴ Lafa nitaitsy tamy ty fahamamoany Noa, le nahay ty nanovy ty anakiny faralahy taminy. ²⁵ Le hozao tiasany: " Ho voahozo lahy i Kanana. Enganie ho nama ty mpiasa ty rahalahany ie." ²⁶ Nivola hozao avao koa ie: "Hotompoa lahy Yaveh,Njanahary ahy Sema, sady enganie ho mpiasany kanana. ²⁷ Hanitatsy ty faritsy ty tany jafeta lahy Njanahary, sady hanenga azy hamboatsy ty tranony amy ty lay Sema rey eo. Enganie ho mpiasany i Kanana." ²⁸ Tafara ty tondra-drano, le telonjato amby dimampolo tao ty niaina i Noa. " ²⁹ Ty fotoa niaina i Noa le limampolo amby sivan-jato tao,le nimaty i bakeo.