¹ Sady lafa afaky tao roe nanenja ty tanany nofy raiky Farao. Lafa nitsanga tamy Neily teo ie. ² Le ingo, nisy aomby vavy fito niboaky baka ta Neily, mampiriritsy noho vondraky, sady nihina akata tamy ty sisiny rey. ³ Ingo, aomby vavy fito hafa niboaky baka ta Neily tafara rey, tsy soa noho mahia. nagnato tanila ty aomby vavy hafa tanila ty renirano rey. ⁴ Bakeo aomby vavy marary noho mahia rey nihina ty aomby vavy soa noho mampitsiriritsy noho vondraky fito. Bakeo nifoha Farao. ⁵ Niroro ndraiky ie le nanonofy fanindroa. Ingo, nisy salohim-bary fito nitiry baka amy ty tahony raiky, vokatsy mare noho soa. ⁶ Ingo, nisy salohim-bary fito hafa, matify sady maiky ty tsioky antinana, nitiry tafaran'rey. ⁷ Nitely salohy fito hafa vokatsy be rey noho soa salohy matify rey. Taitsy Farao, sady, ingo,nofy zay. ⁸ Le avy ty maray le natahotsy ty sainy. Naniraky le nampikaiky mpahay aoly rey noho ty olon-kendry Egypta iaby ie. Nivolan'i Farao tamin-drozy ty nofiny, fe tsy nisy raiky tamin-drozy afaky nanazava zay tamy Farao. ⁹ Sady ty be ty mpanday kapoaky nivola tamy Farao hoe: "Zao zaho vo Mieritseritsy ty fahotako rey. ¹⁰ Nimeloky tamy ty mpiasany rey Farao, le nandefa ahy tam-pigadra tan-trano tyt kapiteny ty mpiamby, zaho noho ty be ty mpanao mofo. ¹¹ Niaraky nanonofy zahay tamy ty halinio,zaho noho ie. Samby mana ty nofiny araky ty dikany iaby zahay. ¹² Nisy pamaraky Hebreo niaraky taminay tao, mpiasa azy kapiteny ty mpiamby. Novolaninay azy sady nandiniky ty hevitsy ty nofinay rey taminay ie. Nadikany kiraikiraiky taminay araky ty nofiny iabbby ie. ¹³ Sady lafa nandika ty hevitsy ty nofiny rey taminay ie, le niboaky zay. Nampoly Farao tamy ty toera nisy ahy zaho, fa azy raiky hafa iny nahantony." ¹⁴ Bakeo Farao naniraky le nampikaiky an'i Josefa. Naboakin-drozy malaky tam-pigadra ie. Niharatsy ie, nisolo siky, sady nandeha amy Farao. ¹⁵ Hozao tiasa i Farao tamy Josefa: " Nanonofy zaho, fe tsy misy afaky manazava zay. Fa nahare ty mahakasiky anao zaho, ka lafa mahare nofy iha le afaky manazava zay. ¹⁶ Namaly an' i Farao Josefa, nanao hozao: " Tsy amiko ato zay. Njanahary ro hamaly an'i Farao araky ty sitrakiny.'' ¹⁷ Hoasa i Farao tamy Josefa hoe: "Tamy ty nofiko tao, le ingo, nitsaka tamy sisy ty Neily zaho. ¹⁸ Ingo,nisy aomby vavy fito niboaky baka ao Neily, vondraky noho mampiriritsy, sady nandromotsy akata tamy sisiny teo rey. ¹⁹ Ingo, nisy aomby vavy fito hafa niboaky tafarandrozy, tsy soa, sady mahia. Tsy nahita faharatia manahaky zay mihintsy zaho heniky ty tany Egypta iaby. ²⁰ Azy mahia noho aomby vavy raty ro nihina aomby vavy vondraky velohany rey. ²¹ Lafa lanin-drozy zay, le tsy nisy nahay mihintsy ho nihanin-drozy zay, safe mbo raty manahaky ty taloha avao ndrozy. Bakeo le nifoha zaho. ²² Nimpoly nanonofy ndraiky zaho,le, ingo, nisy salohim-bary fito nitiry tamy ty tahony raiky, vokatsy mare sady soa. ²³ Ingo nisy salohim-bary fito hafa, malazo, matify noho maiky ty tsioky antinana, nitiry tafan-drozy. ²⁴ Nitely salohim-bary fito soa rey azy salohim-bary matify. Nivolaniko tamy azy mpahay aoly rey zay, fe tsy nisy tamin-drozy afaky nanazava zay tamiko." ²⁵ Hozao tiasa i Josefa tamy Farao: "Mifanahaky nofy Farao reo. Ze hanovin-Janahary, le nambarany tamy Farao. ²⁶ Azy aomby vavy fito soa rey le fito tao, sady ty salohim-bary fito le fito tao. Mifanahaky nofy reo. ²⁷ Azy aomby vavy fito mahia noho tsy soa ze niavy tafaran-drozy le fito tao, sady azy salohim-bary matify fito maiky ty rivotsy antinana avao koa le tao fito ty mosary. ²⁸ Zay ty raha ze nivolaniko tamy Farao. Ze nanovin-Janahary le nambarany tamy Farao. ²⁹ Ingo fito tao ty halakoa ty vokatsy ro ho avy heniky ty tany Egypta iaby. ³⁰ Fito tao ty mosary ro ho avy manoriky zay, sady ty fahavokara iaby le ho halino amy ty tanny Egypta ao, sady handrava ty tany Egypta, sady handrava ty tany ty mosary. ³¹ Ho halino amy azy faritsy ty fahavokara ho ahy ty kere ze manorikizay ao, le ho meloky vatany. ³² Nampolipoly tamy Farao zay nofy zay safe ze raha hiseho zay le fa namboarin-Janahary. ³³ Sady engaho Farao hila olo mana-tsay noho hendry, le hametraky azy amy tany Egypta . Engaho Farao hanao zay. ³⁴ Engaho ie hifingy mpiandrikitsy ty tany. Engahon-drozy hangalaky ty ampaha-limy ty vokatsy Egypta amy ty fito tao ty fahavokara. ³⁵ Engaho ndrozy hamory ty hany iaby amy ty tao soa ze ho avy io le hanajary ty vokatsy ambany fahefa i Farao eo, mba ho ty hany hoahy nipetsaky rey. Tokony arovan-drozy zay. ³⁶ Ty hany le ho hanomeza hoahy ty tany amy ty fito tao ty mosary ze ho ao amy ty tany Egypta. Amy fomba zay ty tany ro tsy ho rava ty mosary. ³⁷ Soa tamaso i Farao noho tamaso piasany iaby rey teo diniky zay. ³⁸ Hoasa i Farao tamy piasany iaby rey hozao: "Afaky mahita olo manahaky zay va tsika, ze aminy ao ty Fanahin'Janahary?" ³⁹ Le hoasa i Farao tamy i Josefa hozao: "Safe Janahary nampitoro anao iaby zay, le tsy misy hafa mandiniky lavitsy noho hendry manahaky iha. ⁴⁰ Hitanjaky ty tsanoko iha, sady manahaky ty safanao to hanapaky ty olo lako iaby. Amy ty seza fiandriana eo avao zaho le ho anabo noho iha. ⁴¹ Hoasa i Farao tamy i Josefa hozao: "Ingo, engako amina ty tany I Egypta iaby." ⁴² Nala i Farao tamy ty taniny ty peratsy misy ty tampôny sady natsofokiny tamy ty tana i Josefa. Nampisikininy siky longony matify ie, sady nasiany ravaky volamena ty vozony. ⁴³ Nampionjany tamy ty kalesa faharoe eo ze anazy ie. Nikorakoraky talohany ty olo hoe: "Mandohaliha." Nanovy i Farao nanapaky tamy ty tany eo i Egypta iaby ie. ⁴⁴ Hoasa i Farao tamy i Josefa hozao: "zahi to Farao, sady hafa tsy iha, le tsy misy olo hanondrotsy ty tanany na ty tombony amy ty tany i Egypta iaby. ⁴⁵ Nikaiky ty anarany i Josefa hozao: "zafenata Panea" i Farao. Nameany ho valiny i Asenata, azy anak'ampela i Potifera mpisoro i Ona iny. Nanapatapaky ty tany i Egypta iaby i Josefa. ⁴⁶ Telopolo tao i Josefa lafa tsy nitsanga taloha i Farao eo ie, azy mpanjaka i Egypta iny. Niala tanilay i Farao eo ie, sady nanapatapaky ty tany i Egypta iaby. ⁴⁷ tanay ty fito tao afaky ro namokatsy bevata ty tany. ⁴⁸ Navoriny iaby ty hany iaby tanay ty fito tao ze tamy ty tany Egypta ao sady nengany tamy ty tanà bevata. Nengany siaky ty tanà ty hany ze baka amy ty baibo miodidy zay. ⁴⁹ Navory i Josefa manahaky ty riaky ty voany, lako tsy hita zay. ⁵⁰ Taloha ty niavia ty tao ty mosary tao, le nana anakilahy roe, tamy i Asenata, anak'ampela i Potifera mpisoro ta Ora tao, i Josefa. ⁵¹ Nikaihy i Josefa hozao i Manase ty anakilahiny velohany, safe hoasany hoe: "Njanahary nampanalino ahy ty olo iaby noho ty longo ty babako iaby." ⁵² Nikaihiny hoe Efraima ty anakilahiny faharoe, safe hozao ty asany: " Njanahary nahalako ahy tamy ty tany ty alaheloko." ⁵³ Anay ty farany fito tao ty halakoa ty tamy ty tany Egypta ao. ⁵⁴ Nanomboky ty fito tao ty mosary, manahaky ty nivolany i Josefa. Nisy mosary tamy ty tany iaby teo, fe nisy hany koa tamy ty tany i Egypta iaby teo. ⁵⁵ Lafa tanay ty mosary tao ty tany iaby ta Egypta ao, le nikaikaiky hany tamy i Farao ty ololako. Hoasa i Farao tamy Egyptiana iaby rey hoe: "Mandehana amy i Josefa any sady anovo ze volaniny anareo." ⁵⁶ nameno ty faritsy ty tany raiky iaby ty mosary. Namoha ty tsano fanajaria iaby i Josefa sady namarotsy tamy i Egyptiana rey. Mahery vatany ty mosary tamy ty tany i Egypta tao. ⁵⁷ Niavy ta Egypta ao iaby ty firenena iaby mba hivily vary amy i Josefa, safe fa mahery ty mosary tamy ty tany iaby ao.