¹ Hoasa Njanahary tamy Jakoba hozao: "Mitsangana, mandena mana-Betela any sady mipetsaha any.Manamboara alitara any ho ty ahy Njanahary, ze niseho taminao tamy iha mbo nilay an'i Esao rahalahinao." ² Sady Jakoba nivola tamy ty longony noho ze nanoriky azy iaby rey ho zao: "Engao Njanahary hafa ze aminareo eo rey, anovo malio ty vatanareo,sady solo ty fisikinanareo. ³ Andao tsika handeha ho a-Betela any.Hamboatsy alitara any zaho ho ty ahy Njanahary, ze namonjy ahy tamy ty andron'alaheloko,noho niaraky tamiko avao ndra taia ndra taia nandehanako." ⁴ Le namean-drozy an'i Jakoba NJanahary hafa iaby ze tan-tany teny rey, noho kiviro tan-tsofin-drozy teny rey. Nalevy i Jakoba tambany ty hazo teribina ze anila i Sikeme rey ao. ⁵ Lafa nandehan-drozy, le nandatsahan-Janahary horohoro tamy ty tana manodidy androzy, Le tsy nania anakilahy i Jakoba rey olo rey. ⁶ Niavy ta- Lozy tao i Jakoba (ze a-Betele ao avao), ze amy ty tany Kanana ao, ie noho olo rey iaby ze niaraky taminy. ⁷ Nampitsanga alitara tao ie sady nikaihiny hoe El-betela ty toera zay, safe tao Njanahary ro nanambara ty vatany taminy, laha nilay ty rahalahiny ie. ⁸ Sady maty i Debora,piteza an'i Rebeka. Nalevy tambanimbany ty Betela tambany azy hazo teribina iny ao ie, le nikaihy zay hoe Alona-bakota. ⁹ Lafa nimpoly baka Padan-Arama any i Jakoba, le niseho taminy ndraiky Njanahary sady nitsi-pirano azy. ¹⁰ Hoasa Njanaharytaminy hozao: "Jakoba ro anaranao, lafa tsy kaihy Jakoba sasy iha. Fa atao hoe Israely." Le kaihy Njanahary hoe Israely ty anarany. ¹¹ Hoasa Njanahary taminy hozao: "Zaho ro Njanahary Tsitoha. Miteraha lako sady mihamaroa. Hisy firenena noho ty fiharoam-pirenena hiboaky baka aminao, sady mpanjaka ro ho amy tarihanao eo. ¹² Ty tany ze nameako an'i Abrahama noho Isaka, le hameako anao. Ho ty ahy ty tarihanao ze misolo anao le hameako ty tany avao koa. ¹³ Le nandeha sady niala taminy teo, tamy azy toera ze nivolaniny taminy Njanahary. ¹⁴ Namboatsy tsangam-bato tamy ty toera niresahan-Janahary taminy i Jakoba, tsangam-bato vita tamy ty vato. Nandraraky fanomeza inomy noho nandraraky menaky tamy zay eo ie. ¹⁵ Nikaihy i Jakoba hoe Betela azy toera ze niresahin-Janahary taminy iny. ¹⁶ Niala ta Betela tao ndrozy. Laha mbo lavidavitsy a-Efrata any ndrozy, le maty anaky i Rahely. Saro-piteraha ie. ¹⁷ Laha tanay ty faharary ty fahasarotam-piteraha tao ie, le nivola taminy azy pikarama iny hozao: "Ka matahotsy,fa zao le hahazo aja lahilahy raiky hafa iha." ¹⁸ Sady lafa tam-piala ay eo, tamy ty fara ty imbonainy ro nikaihiny azy hoe Benony ie, nefa ty babany nikaiky hoe Benjamina. ¹⁹ Maty Rahely sady nalevy tamy ty lala mana Efrata any (ze anovy hoe Betlehema). ²⁰ Namboatsy tsangam-bato tanabo ty lolony eo i Jakoba. Zay ro fahaiza ty lolon'i Rahely zisiky amy zao. ²¹ Nanohy ty liany Israely sady nampitsanga ty lainy tambaliky ty tilikambo fandinisa aondry noho aosy rey. ²² Lafa nipetsaky tamy tany zay ao Israely, le niaraky niroro tamy i Bila ze valy keliny i Robena, le re Israely zay. Sady nana anakilahy folo roa amby i Jakoba. ²³ Ty anakilahy baka amy i Lea ro Robena, azy anakilahy i Jakoba velohany, noho Simeona, Levy,Joda, Isakara, sady Zebolona. ²⁴ Ty anakilahy baka amy i Rahely ro Josefa noho Bejamina. ²⁵ Ty anakilahy baka amy i Bila,ze mpiasa ampela i Rahely, ro Dana noho Naftaly. ²⁶ Ty anakilahy baka amy i Zilpa, mpiasa ampela i Lea, ro Gada noho Asera. iabiaby reo ro anaky i Jakoba ze naterakiny ta Padana-Arama any. ²⁷ Jakoba niavy tamy Isaka any, babany, ta Mamre ta Kiriat-Arba any (na Hebrona avao koa), toera ze nipetraha i Abrahama noho Isaka. ²⁸ Niay valopolo amby zato tao Isaka. Niala ay i Isaka le maty sady navory ho amy ty razambeny rey any, zokin'olo velohany ie. ²⁹ Esao noho Jakoba, sady anakilahiny reo, ro nandevy azy.