¹ Niay fito amby roapolo amby zato tao i Saraha. Zay ty tao nian'i Saraha. ² Nimaty ta Kiriata Arba i Saraha laha 'zay ie Hebrona, tamy tany Kanana tao. Nisaona noho nitany ahy Saraha i Abrahama ³ Bakeo le nitsanga le niongaky baka amy ty faty ty valiny eo, sary niresakky tamy ty anakilahy Heta rey, nanao hozao: ⁴ "Vahiny aminareo eto zaho. mba ameo toera fandevena aminareo eto lahy zaho, mba hafahako mandevy ty faty ze ahy." ⁵ Namaly an'i Abrahama ty anakilahy Heta rey, nanao hozao: " ⁶ Mijanjina anay, lahy tompoko. Mpanjaka ben-Janahary aminay eto iha. Aleveno amy ty lolo ze notingininao mare ty faty ty valinao. Tsy misy ndra ia ndra ia aminay ro tsy hanenky lolo zay ho tiahinao, mba hafahanao mandevy ty faty ty valinao." ⁷ Nitsang Abrahama le nandohaliky tamy ty olo tan-toera teo rey, tamy anakilah'i Heta rey. ⁸ Nivola tamin-drozy ie, nanao hozao: "Laha manenky nareo fa tokony handevy ty faty ty valiko zaho,le janjino zaho sady angataho i Efrona anakilah'i Zohara, ho tiahy. ⁹ Angataho ie mba hamarotsy amiko azy avaky ty vato i Makpela,ze tiazy, amy fara ty baibohony any. Amy ty viliny atsiky le enganie ie hamarotsy zay amiko am-pahibe maso hanahaky ty fanana ho toera fandevena." ¹⁰ Nipetraky tamy ty anakilahy'i Heta teo Efrona, sady Efrona azy Hetita namaly an'i Abrahama mba ho re ty anakilah'i Heta rey,noho ze niavy iaby ta vavahady ty tanany, nanao hozao: " ¹¹ Aha, lahy tompoko, janjino zaho. Nanome baibo anao zaho, noho ty lava-bato amy zay ao. Nameako ho tiahinao tanila ty anakilahy ty oloko rey teo zay. Ameako anao zay mba handevenanao ty faty ze ahinao." ¹² Bakeo Abrahama nampandohaliky ty vatany tan-toera taloha ty olo teo. ¹³ Nivola tamy Efrona ie mba ho re ty olo tamy tana teo, nanao hozao: " Fe laha enkeninao, janjino lahy zaho. Ho viliko ty baibo. Rambeso ty drala baka amiko, sady handevy ty faty ty valiko eny zaho." ¹⁴ Namaly an'i Abrahama Efrona nanao hozao: ¹⁵ "Engaho lahy, tompoko,janjino ahy zaho. Sekely volafoty efajato ro sahaza ty pan-kilan-tany raiky, hisy dikany iino amiko noho aminao va zay? Aleveno ty faty ty valinao." ¹⁶ Nijanjiny Abrahama i Efrona le nonjoniny ho a Efrona any ty fatsy ty volafoty ze niresahany mba ho re ty anakilah' i Heta rey, sekely volafoty efajato, araky ty fandan-ja mahatsy ty mpamarotsy. ¹⁷ Lafa zay ty safa i Efrona, ze ta Makpela tao, tanila i Mamre teo, zay hoe, azy baibo, azy lava-bato ze amizay ao,noho ty hazo iaby ze amy ty tany noho ty mihodidy ty sisiny rey eo, le niazo i ¹⁸ Abrahama tamy ty fivilia zay tanila ty anakilah'i Heta rey teo, tanilan-drozy iaby ze niavy tamy ty vavahady ty tanany teo. ¹⁹ Tafaran'zay, le nandevy an'i Saraha valiny tamy azy lava-bato azy baibo i Makpela i Abrahama, ze tanila i Mamre,zay hoe, Hebrona, tamy ty tany Kanana. ²⁰ Lafa ze ty baibo noho ty lava-bato ao ze nanjary fanana i Abrahama ho toera fandevena, zay le baka amy ty anakilah'i Heta rey.