¹ Ny avy ta Sodoma ao ty anjely ty roe rey lafa hariva, laha mbo nipetsaky tambarava i Sodoma eo i Lota. Hita i Lota ndrozy, nitsanga hitsena androzy, sady nampandohaliky ty tarehiny tamy ty tany. ² Hoy ie hozao: "Tompo, mangataky anareo lahy zaho mba hivio an-tsano ty mpiasanareo ao, Mienena ao nandroany haliky, sady sasao ty tombonareo. Le afaky nifoha vo maraindray nareo sady mandeha amy ze lala andehana nareo. Namaly ndrozy hozao: "Aha, handany ty haliky amy ty kianja ty tanà eo zahay." ³ Fa nangataky maré ndrozy ie, ka le niaraky taminy ndrozy, sady nilitsy tan-tsanony tao. Nihina hany noho nanandy mofo tsy misy sira ie, le nihina ndrozy. ⁴ Fe taloha ty niroroan-drozy, ty lahilahy ty tanà, ty lahilahy i Sodoma, le niodidy ty tsano, ty tanora noho ty antitsy, ty lahilahy iaby baka amy ty faritsy ty tanà rey. ⁵ Nikaihin-drozy Lota, ka le nivola taminy hozao: "Aia lahilahy ze avy taminao tamy nandroany haliky tato rey? Andeso aminay atoy ndrozy, mba hafahanay miaraky miroro amin-drozy." ⁶ Ka le niboaky ty varavara ho amin-drozy eo i Lota sady nanily ty varavara tafarany tao. ⁷ Hoy ie hozao: "Rahalahiko, mangataky anareo zaho, mba ka manao raha raty maré. ⁸ Ingo, maba anak'ampela roe ze tsy mbo niaraky niroro tamy ty lahilahy zaho. Engao zaho, mifona aminareo zaho. andesiko aminareo eto rey, sady anovo amin-drozy ze soa amasonareo eo. Mba ka manao ndra ino ndra ino amy ty lahilahy rey, safe avy baka ambany ato ty aloky ty tafoko ndrozy." ⁹ Hoasan-drozy hozao: "Mialà!" Hoasan-drozy avao koa hoe: "Raiky toy le niavy teto mba hipetsaky ho vahiny, sady vo zao ndraiky ie ro hanjary mpitsara antsika! Sady amizao le hanao ze raty bibiky miaraky aminao noho ty miaraky amin-drozy zahay." Nanosiky maré nanohitsy an'i azy lahilahy iny ndrozy, nanohitsy an'i Lota, sady nanarikitsy mba hanaky ty varavara. ¹⁰ Fa lahilahy nanonjotsy ty tanan-drozy noho naninto an'i Lota hilitsy an-tsano ao hiaraky amin-drozy rey sady nanily ty varavara. ¹¹ Sady vahiny i Lota rey ro nahahijiky ty lahilahy ze tambaliky ty varavara ty tsano, mba hahavy an-drozy le vozaky laha niezaky nihilia ty varavara ndrozy. ¹² Le nivola tamy i Lota lahilahy rey Hozao: "Mbo misy olo hafa va aminao ato? Vinanto lahilahy, anakilahinao noho anak-ampelanao rey, sady ze hanananao amy tany toy eo, le andeso miboaky eto ndrozy. ¹³ Le fa ho ravanay toere toy, safe ty fihantona zay anila i Yaveh eo ro avy maré bibiky ka nirahiny handrava zay zahay. ¹⁴ Nandeha i Lota sady nampanambara vinantony lahilahy rey, ze lahilahy da nampanantena hanambaly ty anak'ampelany rey, sady nivola hozao: "Malaky, mialà amy toera toy nareo, le fa horavà i Yaveh tanà toy." Fa tamy vinantony lahilahy rey le nanahy ty somonga ie. ¹⁵ Vo naraindray ty andro, le nifona tamy i Lota anjely rey, nivola hozao: "Mandehana, andeso ty valinao noho anak'ampelanao roe rey ze eto, mba tsy horava koa iha amy ty fanasazia ty tanà." ¹⁶ Fe nivembé ie, Le nitandrahany lahilahy rey ty tanany, noho ty tana ty valiny, sady ty tana ty anak'ampelany roe rey, safe bevata famalozam-po taminy i Yaveh. Nandesin-drozy niala ndrozy, sady napetsan-drozy ambaliky ty tanà. ¹⁷ Lafa tafa-boaky ndrozy tambaliky any ndrozy, le nivola ty raiky tamy ty lahilahy hozao: "Milaisa ho amy ty ainareo! Mba ka mimpoly, na mijano amy ty tany mando. Milaisa ambohitsy any mba tsy ho rava nareo." ¹⁸ Hoasa i Lota tamin-drozy hozao: "Tsy re tompoko e! ¹⁹ Fa nahita sitsaky tamasonao teo ty mpiasanao, sady fa nampiseho ty amasonao ty hasoam-panahy bevata tamiko iha tamy ty namonjeanao ty aiko, fe tsy afaky ty hilay ho ambohitsy any zaho, safe hahatsatsy ahy ty loza, sady ho maty zaho. ²⁰ Fa ingo, tanà roy le mariny vatany le azo ilaisa soa, sady kelikely ie io. Tompoko, enganie lahy zaho hilay ao (tsy kelikely va io?), sady le ho voa sarombaky ty aiko." ²¹ Hoy ie taminy hozao: "Eka moa, enkeko avao koa fangatahanao zay, fa tsy hampitoro ty tanà ze nivolaninao teo zaho. ²² Malaky! milaisa any, fa tsy afaky hanao ndra ino ndra ino zaho zisiky ty hiavianao any." Laha zay ro nikaiha ty tanà hozao: Zoara. ²³ Fa niboaky tamy ty tany ty masoandro lafa niavy ta Zoara ao i Lota. ²⁴ Le nandatsaky havandra noho afo baka an-danitsy tamy i Sodoma noho Gomora any i Yaveh. ²⁵ Nitorony tanà rey, noho ty mando iaby, noho mpipetsaky iaby tamy tanà ao rey, sady raha-mitiry ze nitiry tamy ty tany rey. ²⁶ Lafa valy i Lota, ze tafarany tao, sady le lasa bonga sira ie. ²⁷ Nifoha vo maray i Abrahama ka le nana amy azy toera ze nitsanganany tanila i Yaveh iny any. ²⁸ Nijilo an'i Sodoma noho Gomora noho ty tany mando iaby ie. Nanenty ie ka le ingo, niakatsy nanahaky ty setsotsiky ty laforo bevata ty satsoky baka amy ty tany. ²⁹ Sady lafa nandrava ty tany mando rey Njanahary, le nahatoaro an'i Abrahama. Nandesiny niala baka anivo ty fandrava i Lota ao lafa nandrava ty tanà ze nipetsaha i Lota Ie. ³⁰ Le niakatsy baka Zoara ao i Lota mba hipetsaky any amy ty vohitsy niaraky tamy anak'ampelany roe rey ao, safe natahotsy ty hipetsaky ta Zora ao ie. Nipetsaky tanay ty lava-bato raiky ie, ie noho anak'ampelany roe rey. ³¹ Hosa ty anak'ampela velohany tamy ty zainy hozao: "Fa antitsy ty baba-tsika, sady tsy misy lahilahy hiaraky hiroro amintsika manahaky ze fanovy ty tany iaby toy. ³² Avia, Andao hampinomintsika divay ty baba-tsika, sady hiaraky hiroro aminy tsika, mba hafahatsika manitatsy ty taraha ty baba-tsiky." ³³ Ka le nampinomin-drozy divay ty babany tamy halikio. Bakeo le nilitsy azy anak'ampela velohany iny sady niroro niaraky tamy ty babany; fe ie tsy nahay ty fotoa ze niroroany, na ty nifohazany. ³⁴ Lafa hamaray le nivola tamy ty zainy azy anak'ampela velohany iny hoe: "Janjino, niroro niaraky tamy ty babako zaho nankaly. Ka le andao hampinomintsika divay avao androny haly, sady tokony militsy ao iha sady miroro miaraky aminy, mba hafahatsika manitatsy ty tariha ty baba-tsika." ³⁵ Ka le nampinomindrozy divay ndraiky ty babany tamy halikio, sady nandeha niroro niaraky taminy azy zainy iny. Tsy nahay ze niroroany ie, na ze nifohazany. ³⁶ Laha zay le samby mana anaky tamy ty babany ty anak'ampela i Lota rey. ³⁷ Ty anak'ampela velohany ro niteraky aja lahilahy, sady nikaihy hozao i Moaba. Ie ro nanjary razambe ty Moabita amizao. ³⁸ Sady azy anak'ampela farany iny, le niteraky aja lahilahy avao koa, sady nikaiky azy hozao i Benamy. Nanjary razambe ty tariha i Amona ie amizao.