¹ Sady Saray, valy i Abrama, le tsy mba niteraky aja ho anazy, fe nana mpiasa ampela raiky ie, ze Egyptiana, kaihy hozao: "Hagara. ² Ka le hoasa Saray tamy i Abrama hoe: "Ingo, tsy nanenga ahy hanananaky Yaveh. Mandehana miroro miaraky amy ty mpiasa ampelako. zay vasa ro mety hahazoako anaky baka aminy." Nijanjy ty feo i Saray i Abrama. ³ Folo tao tan-tany Kanàna ao ro nanomeza i Saray, valy i Abrama, an'i Hagara mpiasa ampelany Egyptiana, ho valiny. ⁴ Ka le ty raiky tamy i Hagara ie, sady nibevoka. Lafa hitany fa nibevoka ie, le nanenty ty tompo ampela tamy ty fananova. ⁵ Sady hoasa Saray tamy I Abrama hozao: " Laha ty aminao avao raty mahazo amiko zao. Nameako ho antsatranao eo ty mpiasa ampela, sady lafa hitany fa nibevoka ie, le nisotsafiny tamasony teo zaho. Enganie Yaveh ro hitsara ahy noho iha." ⁶ Fa hoasa i Abrama tamy i Saray hoe: "Ingo, amy ty fahefanao eo ty mpiasa ampelanao, anovo aminy ze dinikinao ho mety bibiky." Ka le nanao fandaisa mahery taminy i Saray, ka le nilay azy. ⁷ Nahita azy tanila ty loharano raiky tan-tany any ty azy anjely i Yaveh iny, azy loharano tan-dala teny iny nana Sora any. ⁸ Hoy ie hozao: "Hagara, mpiasa i Saray, baka aia iha sady handeha ho aia iha?" Sady hoy ie hozao: "Lomay an'i Saray tompo ampela zaho." ⁹ Ty anjely i Yaveh le nivola taminy hozao: "Mimpolia amy ty tompo ampelanao any, sady miareta amy ty fahefany." ¹⁰ Sady Hoasa azy anjely i Yaveh iny taminy hoe: "Hampitombo Isa ty tarihanao vatany Zaho, hondy ka le tsy ampy isaky ndrozy." ¹¹ Hoy avao koa azy anjely i Yaveh taminy hozao: "Ingo, hobevoka iha, sady hiteraky aja lahilahy, sady ty anarany le hanovinao hoe Ismaela, safe naharé ty fijalianao i Yaveh. Ho boriky ty lia ty olo ie. ¹² Ho raty ty olo iaby ie, sady ty olo iaby hirafy Aminu, sady hipetsaky lavitsy ty rahalahiny iaby ie. ¹³ Sady nameany an'i Yaveh ze niresaky taminy anara zay: " Iha ro Njanahary ze mahita ahy," fa hoy ie hozao: " Mbo mahita avao vatany va zaho, ba le tafara ty nahitany ahy aza?" ¹⁴ Laha zay le nikaihy hoe Bera-lahai-roy azy fantsaka iny; ingo, anivo i Kadesa noho Bereda eo zay. ¹⁵ Niteraky ty anakilahy i Abrama i Hagara, sady namea i Abrama anara hozao Ismaela ty anany, ze naterakiny, ze nateraky i Hagara. ¹⁶ Valopolo enin'amby tao i Abrama tamy ty niterahany i Hagara an'i Isamaela ho anany.