¹ Avy tamiko ty safa Yaveh manao hozao: ''Ry ² anakin'olo, anovo miatriky ty vohitsy Israely ty tarehinao le maminania amindrozy. ³ Volano hozao: 'Ry vohitsy an'Israely, janjino ty safa i Tompo Yaveh! Zao ty vola i Tompo Yaveh amy ty vohitsy rey noho amy ty tany abo, amy ty kanalin-drano rey, noho amy ty tany malemy! manday mesobe hanohera anareo Zaho, sady handrava ty fipetraha anabonareo. ⁴ Le ho haolo ty alitaranareo le ho rava ty tohanareo rey, le hajiako aloha ty sampinareo rey ty fandainareo. ⁵ Hengako aloha ty sampindrozy rey eo ty faty ty anak'Israely, sady haparitako mihodidy ty alitaranareo eo ty taolanareo. ⁶ Ndra aia ndra aia ty hipetrahanareo, le ho foa ty tanana rey sady haonnga ty fipetraha anabo rey, le ho foa ty alitaraneo sady ho haolo. Le ho rava ndrozy sady hanjavo, haravoky ty tohanareo sady hofora ty asanareo rey. ⁷ Hiravoky anivonareo eo ty faty le ho hainareo fa Zaho ro Yaveh. ⁸ Fa hitanjaky ty ilany sisa aminareo eo Zaho, le hisy ilany ho tafilay amy ty mesobe amy ty firenena rey, lafa miparitaky heniky ty tana nareo. ⁹ Bakeo azy nilay rey hieritseritsy Ahy amy ty firenena ze hitanjaha androzy ho gadra rey, fa Zaho le niferinay tamy ty fibalibahiha ty fondrozy ze namadiky ahy, sady tamy ty masondrozy rey ze nindranto nanoriky ty sampindrozy rey. Le niboaky tamy ty vatandrozy ty fangarongaroha tamy ty faharatia ze nanovindrozy niaraky tamy ty fahavetavetany iaby ndrozy. ¹⁰ Le ho haindrozy fa Zaho ro Yaveh. Zay ty antony nivolanako fa handay ty raty toy amindrozy rey Zaho. ¹¹ Ty Tompo Yaveh mivola hozao: Mitehafa sady apoaho ty fandeha ty tombonareo! Volano hozao: 'Eee!' noho ty fahavetaveta raty ty longon'Israely iaby! fa ho maty mesobe, mosary sady arety mandripaky ndrozy. ¹² Azy lavitsy rey le ho maty ty arety mandripaky, le ze marikitsy le ho maty ty mesobe. Azy ilany rey noho ty mbo velo le ho maty ty mosary. hanatenteraky ty heloko amindrozy rey amy ty lalany Zaho. ¹³ Le ho haindrozy fa Zaho ro yaveh, lafa ty fatindrozy ro hiampatsy amy ty sampindrozy eo, mihodidy ty alitarandrozy, amy ty tany anabo iaby--- anabo ty vohitsy iaby, sady ambany ty hazo misadrahaky iaby noho hazo terebinta matevy---ty toera ze nandoroandrozy ditin-kazo manitsy hoahy ty sampindrozy iaby. ¹⁴ Hanisy amy ty tanako Zaho sady hanenga ty tany ho haolo noho foa, baka amy ty tany efitsy le zisiky amy Dibla, heniky ty kila toera iaby ze ipetrahan-drozy. Le ho haindrozy fa Zaho ro Yaveh.''